«Айда играть!» мельстуиця фестиваль васенцеде ютась аволь умок Башкортостанонь Уфа ошсо. Ошонть куншкакуросо сравтозельть эйдень налксемань площадкат, эрьва кодамо налкшке марто лавкат, ульцятнева секе-тев яксесть мультфильмань ды ёвксонь геройть. Эсест теевксэст тесэ невтсть Россиянь зярыя регионтнэстэ кедьчелькев ломантне.
Мордовиясто тов ардтнесть Рав чирень финнэнь-угрань раськетнень культурань куншкакуронь отделэнь прявтось Валентина Дыдыкина ды Тавлань налкшкетнень теицятне, чувтосто керсицятне, лелятне-ялакстнэ Пётр ды Александр Рябовтне.
«Кой» этношколанть юрсо фестивалень вишка инжетнень туртов сынь ютавтсть мастер-класст. Тонавтсть тееме левшстэ черь марто чувтонь лишминеть, нудейть, торамат ды вешкемкат. А мейле эйкакштне мельспаросо эйсэст седясть. Теке шкастонть тонавтыцятне ёвтнесть налкшкетнень историядост, эрзянь ды мокшонь ёвкстнэде, сынст геройтнеде. Валентина Дыдыкина жо содавтсь инжетнень Мордовиясто ускозь книгатнень, газетатнень, журналтнэнь ды кезэрень Тюштянь налксематнень марто. Вейсэнь чийнематнесэ-пелькстамотнесэ пряст невтсть покштнеяк. Тетятне-аватне чоп кевкстнесть, косо Уфасо ашти «Кой» этношколась, бажасть тозонь ветнемс эйдест, ды пек апаркстомкшность, зярдо марильть, те этношколась ансяк сась тенст зярыя чис. Кой-конатне жо эзть кекше кенярксост – Мордовиясь сынст туртов пек вечкевикс тарка. Тосто сынст родняст-раськест, эли тосо тонавтнесть, сакшность инжекс.
«Дивсинь, зяро Уфасо эрзянь ды мокшонь келень содыцят! Минек палатканть ваксс сакшность од ды сыре ломанть, ды сынь весе бажасть кортнемс мартон эрзянь кельсэ. Кой-конатне зярдояк арасельть Мордовиясо, сынь чачсть-кассть Башкортостансо, ансяк ванстызь покштяст-сырькаест келест ды кандызь эйкакшост, нуцькаст-правнуцькаст туртов. Сынь талнозь пурнасть эсь кескавтнес тиринь кельсэ газетат ды журналт, нильнезь-нильнесть тосто кулятнень. Неявсь, кода тошнакадсть тиринь келенть кис. Вейке авась ниле читнень перть сакшнось ваксозонок, ёвтнесь семиядонзо, кода сынь пек вечксызь эрзянь келенть. А меельце чистэнть кандсь тенек башкирэнь раськень каванямкат: чак-чакт, баурсакт, ламбамо прякат. Башкортостанось тенек пек вечкевсь, ломантне весе мизолдыцят, содамочис бажицят, ламодо кевкстницят», – ёвтнесь тенек фестивалень участникесь Валентина Дыдыкина.
Марина Девятова