А. С. Пушкин лемсэ библиотекасо ютась эрзянь кельсэ кавто книгань презентация. Юлия Мамаева нолдась «Ледстнемасто кодазь каштаз» стихень пусмо. Виталий Картышкинэнь лиссь «Ютан велева» книгазо, ков совась повестезэ. Книгатнень нолдамс лездасть МР-нь Прявтонь Администрациясь ды Правительствась.
Те вастовомантень сакшность ламо инжеть, од автортнэнь малавиксэст, ялгаст, коллегаст. Эрьвась ёвтась лембе ды паро валт. Вал сайнесть книгань сёрмадыцятнеяк, сынь ловность произведенияст, ёвтнесть творчествадост.
– Юлия ды Виталий – минек од сёрмадыцянок, литературасонок од лемть, кеме неженек, поладыцянок. Сынь сёрмадыть умок, школасо тонавтнемстэ саезь. Васня произведенияст лиснесть «Чилисемасо», «Сяткосо», вейсэнь пусмосо. Окойники, лиссть башка книгаст. Сынь сюпалгавтызь литературанок од арсемасо, мельёжосо, эрьва авторонть ули сёрмадомань эсензэ лувозо, конань коряс сон содави ды теньсэ питнейчизэяк. Автортнэ вадрят, виевть, ули, мезень кисэ шнамс. Эрьва иестэ республикасонок ютавтневи книгань нолдамонь коряс конкурс. Лездынек пурнамс материалост, максынек рукописест. Сынст кочкизь ды лиссть книгаст. Тешкстаса, Юля – васенце автор, кинь стихензэ ловновить сеске ды шождасто, тон а арсят, ков путомс ударениянть. Неть стихтнень лангс шождасто теевить морот. Саемга, кавто морот уш морась-тейсь Самарасто Алексей Лесных. Кецятано автортнэнь марто, сынст улить эштё материалост, конат пурнавить башка книгас, кемтяно, зярдояк лисить! – кортась МР-нь Писателень союзонь правлениянь прявтось Т. П. Швецова.
Юлия Мамаева (мирдень коряс ней Исайкина) чачсь 1997 иестэ Орданьбуень Ташто Орданьбуе велесэ. Школасо тонавтнесь Орозбие велесэ. Сон прядызе Н. П. Огарёв лемсэ МГУ-нь филологиянь факультетэнь эрзянь отделениянть. Малав кото иеть важоди Мордовиянь Народной телевидениясо. Ней – общественно-политической программань отделэнь обозреватель. Нучк-пачк ардтнизе минек республиканть, эйсэнзэ сеедьстэ кучнить командировкав лия регионга. Тосто самсто тейни виев ды мельстуиця репортажт. Эсь тевензэ теи парсте, мелень путозь. «Ледстнемасто кодазь каштаз» книгань мазый лемесь саезь вейке стихотворениянь строчкастонзо.
– Те монь васенце пусмом, ков совасть весе стихень, конат сёрмадозельть школань шкасто ды студентэкс улемстэ. Сынь эрьва кодамо темас, ламот алтазь малавикс ломанем туртов: бабанень, аванень, тиринь велентень ды, нама, вечкемадо. Сёрмадан седе, кода эрян, арсян, талнан. Сёрмадомань тевсэнть васенце превс путыцям ульнесь эрзянь келень ды литературань тонавтыцям Н. И. Аржаев. Сон ветясь те кияванть ды мерсь а кадомс сёрмадома тевенть. Ардтнинь республикань од сёрмадыцянь олимпиадав, семинаров. Тосо теевинь содавиксэкс лия од автортнэнь марто. Карминек сеедьстэ пурнавомо вейс, кортамо вейсэнь тевде. Неть вастовоматнесэ чачсь келентень покш вечкема. Меельце шкане а яван покш мель сёрмадомантень, тенень улить зярыя тувталт. Ансяк книгань лисемась макссь од вийть, од мельть-арсемат, кеман, поладса те тевенть. Сюкпря весенень, кить лездасть нолдамс, – кортась Юлия Мамаева.
Виталий Картышкин чачсь 1991 иестэ Отяжелень райононь Ало Чукало велесэ. 2013 иестэ прядызе Н. П. Огарёв лемсэ МГУ-нь филологиянь факультетэнь журналистика отделениянть. Ней важоди Ицялонь средней школасо рузонь келень ды литературань тонавтыцякс.
– «Ютан велева» книгасонть прявт темась – велесь ды Ало Чукало велень эрямось, ломантнень уцяскаст. Тосонь весе персонажтне саезь алкуксонь эрямосто. Кой-кинь леместкак апак полавто. Аштян покш мельспаросо истямо покш тевденть. Книгань нолдамось эрьва ломаненть творчествасо – те эскелькс икелев, – мерсь Виталий.
Книгатнень коряс эсь мелензэ ёвтызе филологиянь наукань докторось, доцентэсь, Н. П. Огарёв лемсэ МГУ-нь финнэнь-угрань литературань кафедрань прявтось Ю. Г. Антонов:
– Кецявты, улить од сёрмадыцянок ды сынст лисить книгаст. Меельце иетнестэ лиснесть поэзиянь ламо пусмот. А вана прозань – умок арасельть. Виталий те тевенть топавтызе парсте. Мельспаро ловномс велень геройтнеде, Чукалсо мон ульнян сеедьстэ. Книгасонть улить таркат, конат кармавтыть пейдевтеме. Пейдемась ды згилямось повестьсэнть аволь кежей, сон лезды чарькодемс эрямонь ёнкстнэнь ды ломанень обуцятнень. Юляньгак шнаса. Сон машты кочкамо валт, конат невтить лирической героенть потмоёжонзо, мелензэ ды арсеманзо.
Инжетне макснесть автортнэнень зярыя кевкстемат, лиссь карадо-каршо мельстуиця кортамо. Те ульнесь алкуксонь кенярксчи, эдь аволь эрьва чистэ лисить тиринь кельсэ книгат.
Татьяна Маторкина
«Мазычинь эрямонть невтьса течи»
Мазычинь эрямонть невтьса течи,
Пилезэть тошказеван: «Вечктян...».
Ды мезе, тиринем, иля веше,
Весементь казьса – вал теть максан.
Эряви лембе? Венстяса кедем...
Мерян: «Кеместэ эйзэнзэ кирдть».
Мон панжса тонеть мештесэ эрькем.
Уйть эзганзо. Вешнек валдо кить.
Шожда чи теть? Варштак монь
сельмезэнь.
Ламо а эряви – ве вановкс,
Кеман мон – марясак тон седейсэ
Монь вечкеманть, конась
сехте покш…
Эряви кеняркс? Кунсолытъ валон.
Ламо лембе валт тонеть ёвтан.
Илямак кадо, инескеть, ськамон,
Ансяк тонь марто мон а кельман…
Мазычинь эрямонть невтьса течи,
Пилезэть тошказеван: «Вечктян...».
Ды мезе, тиринем, иля веше,
Весементь казьса – вал теть максан.
Эряви эрямом? Максса весе...
Шожда толгинекс икелеть пран.
Ськамот тон кенярдома пингесэнь.
Мон эрян, зярс кедьсэм тонь кирдян...
Юлия Мамаева