Неть читнестэ Саранск ошонь округонь Пролетарской райононь авань советэсь ютавтсь промкс, косо ванкшновсть ламо кевкстемат. Тешкстасынек, те вейсэндявксось сови «Союз женщин России» Общероссиской общественно-государственной организациянь Мордовской региональной отделениянтень, конань прявтсо Ольга Викторовна Игнатова.
Ледстясынек, кементь иетнеде икеле теезь те организациясь вейсэнди образованиясо, культурасо, эрямонь-коммунальной хозяйствасо, промышленной предприятиятнесэ ды лия сфератнесэ важодиця тейтерь-аватнень.
Икеле, сехте пек ютазь пингень 90-це иетнестэ, те советэнтень совицятне сеедьстэ яксесть промышленной предприятиятнес, эрямонь-коммунальной хозяйствань управлениятнес. Истя, Пролетарской райононь тейтерь-аватне арсизь вельмевтемс те паро коенть ды неень промксост ютавтызь республикасонок икеле молиця ды масторлангонь келес содавикс «Оптикэнерго» ГК-со, тезэнь совить 22 предприятият.
Неень вастовома таркакс кочказель «Сарансккабель-Оптика» ООО-сь. Те предприятиянь профсоюзонь прявтось Анжелика Уланова тейтерь-аватненень ютавтсь экскурсия заводонь цехтнева, невтизе кодамо продукция нолдави тосо, евтнесь сеть ломантнеде, кить тосо се шкане топавтсть тевест, пачтясь важодемань условиятнеде.
Седе тов предприятиянь музейсэ ютавтовсь Пролетарской райононь авань советэсь. Сонзэ панжизе ды ветясь Авань вейсэндявксонь прявтось Татьяна Барашихина. Татьяна Васильевна пачтясь ютазь 2023 иестэ теезденть. Сон тешкстась, тейтерь-авань активенть покш путовксозо Светотехстроень эрицятнень лезэс культурно-нравственной лувонть ветямосо, од ломантнень апаро тевтнеде ванстомасо. Тоско жо невтезель видеоролик тейтерь-авань советэнть важодемадо. Вастовомасонть ульнесь музыкальной казнеяк, сонзэ анокстызе Пролетарской райононь Эстетической воспитаниянь центрась, конань прявтсо ламо иень перть Елена Ивановна Давыдова. Те центрань тонавтыцясь Наталья Николаевна Маринина эйкакштнень марто анокстась концерт, мейсэ витинзе пуромозтнень ёжост.
Теде мейле тов пуромозтненень ютавтозель экскурсия те предприятиянть коряс. Тейтерь-аватненень пачтязель важодиця династиятнеде, конатнень ютксо «Оптикоэнерго» ГК-нь директоронь советэнь прявтось, масторонь келес содавикс промышленникесь-руководителесь, Мордовия Республикань Славань Орденэнь полной кавалерэсь, Саранск ошонь ды Мордовия Республикань Почётной гражданинэсь Эвир Аврамович Боксимер. Текенень поладсынек, Эвир Аврамович ды Зинаида Самуиловна Боксимертнэ вейсэть кодгемень иеде ламо шкань перть. Семиянь иестэнть сыненст ули мезде ёвтнемс те предприятиясонть важодицятненень, кода ванстомс вечкеманть, кода вейсэ, вейке-вейкень чарькодезь кастомс алкуксонь ломанекс эйкакштнень ды нуцькатнень!
* * *
Тейтерь-авань кенярксчинть каршо «Союз женщин России» Общероссийской общественно-государственной организациянь Мордовской региональной отделениясь тейсь цётамот ютазь иень перть важодемантень. Республикань Национальной драмань театрасо ютавтозь кенярксчистэнть, Авань раськеютконь чинтень алтазь промкссонть васенце таркась максозель Саранск ошонь Пролетарской райононь тейтерь-авань вейсэндявксонтень. «Союз женщин России» организациянть пельде Почётонь грамотасо казевсть Татьяна Барашихина ды Валентина Дёркина. «Дочери Отчизны» Россиянь тейтерь-авань медалесь максозь Саранск ошонь 2 № поликлиникань прявт врачонь полавтыцянтень Александра Федотованень. Тешкстасынек, Александра Анатольевна сови Пролетарской райононь тейтерь-авань вейсэндявксонтень.
Аволь умок истя жо тешкстазельть те вейсэндявксонь эряза ломантне. Т. В. Долгованень, Л. М. Буренкованень, Т. В. Щанкинанень, В. П. Зоринанень максозельть Почётонь грамотат Тейтерь-авань Мордовской региональной отделениянть пельде. Эрьвась юткстост аволь ансяк важодема таркасонзо парсте топавты тевенэ, истя жо свал муи шка общественной тевскак.
Саемс, Саранск ошонь «Средняя школа № 5» МОУ-нь воспитательной тевень коряс прявтонь полавтыцянть, Российской Федерациянь общей образованиянь почётной роботникенть Людмила Буренковань. Сон малав ниленьгемень иеть алтась од ломантнень тонавтомантень, сынст патриотической лувсо кастомантень. Людмила Михайловна, аволь ансяк алкуксонь тонавтыця, кенери лия тевскак. Сон – ламо иень перть «Единая Россия» весероссиянь политической партиянь первичной организациянь секретарь, сови Пролетарской райсоветэнь политсоветс. 2011 иестэ саезь – участковой кочкамонь комиссиянь прявт. Теде башка, вечкиця ни, кавто тейтерень ава ды колмо нуцькань сырькай. Эрьва тевенть топавты седейшкава ды весе содамочинзэ, виензэ максозь.
Истят тейтерь-аватнеде Пролетарской райононь вейсэндявкссонть ламо, эрьвадонть ёвтневат певтеме. Ков бу тенст авольть мере молемс – сыретненень лездамо, спецоперациянь участниктненень гуманитарной лезксэнь анокстамо, алтымань кодамо, – свал анокт. Сынь вечкить вейсэ оймсеме, вирев пангонь-ягудань кочкамо, чачома чинь кувалма поздоровонь ёвтамо.
Неть тундонь читнестэ ули мель весенень арсемс кеме шумбрачи ды кувака пинге! Кадык сынст семиятнесэ свал карми уцяска, чарькодема, вандынь чинтень кемема!
Валентина Юдина