Течи минек редакциянь инженек – Московонь М. В. Ломоносов лемсэ МГУ-нь омбо масторонь келень ды регионоведениянь факультетэнь омбоце курсонь студенткась Анастасия Дёмина. Сонзэ тетянзо-аванзо Мордовиясо содавикс ломанть. Тетязо, Василий Иванович Дёмин, ульнесь филологиянь наукань докторокс, профессорокс. Авазо, Любовь Александровна Гурьянова – филологиянь наукань кандидат, «Научно-исследовательский институт гуманитарных наук при Правительстве РМ» МР-нь ГКУ-нь исследованиятнень информационно-аналитической обеспечениянь отделэнь старшей научной сотрудник.
– Анастасия, тон чачить-касыть Саранскойсэ, ансяк тетят-ават велень ломанть. Ков яксиде оймсеме кизэнь каникулатнестэ – тетять эли авать ёнов?
– Те истя, авам чачсь Дубёнкань райононь Тыргак (Турдаково) велесэ, тетям – Покш Березникень Шугуровасо. Кизна шканть ютавтылинь тесэяк, тосояк. Эрьва косо мелезэнь тукшныль. Ансяк ней, тетянь куломадо мейле, ардтнетяно авань тиринь велев. Тосо монь седе ламо ялган ды малавикс раськетнедеяк седе байтяк, конатнень марто ламо шка ютавтынь вейсэ: налксинек ушосо ды паро мельсэ кортнинек эрзянь кельсэ. Те шкас весень марто кирдян лембе ды кеме сюлмот. Кудось тосо чаво, покштям-бабам умок кулость, эрятано тосо кизна авань марто кавонек. Авам вечки пирень путомо, кстыень-мастумарень кочкамо. Мон паро мельсэ тензэ лездан. Лиясто, бути шканок ули, эрятано тосо натой ковонь перть. Коштось Тыргаксо пек ванькс, тосонь Крёст лисьмань ведесь чевтедеяк чевте, сон ашти вирь ало. Тозонь эрьва ёндо ардыть тантей ведь мельга, конань эйсэ ули сия – кувать ашти ды а коли, а чинии. Ве валсо, якатано шумбрачинь пурнамо.
– Кодат кадовсть тетядот сехте валдо ледстнематне?
– Февралень васеце чись – тетядон ледстнема чи. Ютасть уш кото иеть, кода сон тусь юткстонок. Тензэ мольсь ансяк 63-це ие. Ламонь мельс сон кадовсь кода учёной-финноугровед, журналист, литературовед, филологиянь наукань доктор, преподаватель. Монень жо, васняяк, сон ульнесь пек паро тетя. Мелявтыця, седеймариця, превей ды эрямонь вечкиця. Маштсь пеедькшнеме, кеняркшномо, ламо мартонзо налксинек, пек ламо кортнинек эрьва мезде – саемга, ушодылинек меньгак ярсамопелень рецептстэ ды поладылинек книгасо, конань вейсэ ловнынек…
Тетянь 300 ламо важодевксэнзэ. Юткстост сехте пек тукшны мелезэм «Многоцветие смеха: комическое в мордовской литературе» книгазо, кона алтазь минек фольклорсо ды литературасо сатирань жанрань тонавтнемантень. Саинк, ловнынк, кадовтадо мельспаросо.
Университетсэ тонавтнемстэ лексикография предметэнть коряс тейнинь эрзянь-рузонь башка валкске тетянь «Ялганень» валморонзо коряс. Секскак паро мельсэ важодян сонзэ шкинеманзо коряс.
– Анастасия, кода понгить Московов тонавтнеме?
– Те кувака ёвтнемась. Нама, сонзэ ней ледстнян пейдезь, ансяк сестэ монь туртов те ульнесь пек стака шкакс. Те – певтеме талномат, сельведть… Мон меельце чис эзинь кеме – карман тонавтнеме Московсо. Теке шкастонть арасель мелем молемс ковгак лияв, Ломоносовонь МГУ-донть башка. Арсинь уш кандомс конёвом Н. П. Огарёв лемсэ университетэв омбо масторонь келень факультетэв. Ансяк документэнь саеманть лоткамодо кавто чиде икеле монень гайгстасть Московонь М. В. Ломоносов лемсэ МГУ-нь приёмной комиссиясто ды мерсть, келя, монь саить тонавтнеме бюджетэнь таркас ды, натой, се факультетэнтень ды се ёнксонтень, конань мон кочкакшныя. Тесэ, кувать апак арсе, кецязь авань марто саинек билетт ды ускинек документэнь оригиналтнэнь Московов. Тонавтнеме самодонть икеле ульнесь покштояк покш важодема – школасо парсте тонавтнемась, эрьва кодат олимпиадатне, ЕГЭ-нь малав сядо баллтнэс максомась… Понгомс тонавтнеме Московов пек стака. Ансяк, койсэнь, весе те аволь стяко. Монень пек вечкеви тонавтнемань лувось.
Минек келень факультетсэ группатнеде зярыя ды сынь весе вишкинеть. Саемга, группасонть, конасонть тонавтнян, ансяк вейксэ ломанть. Сехте ламо – кемгавтово. Те теезь сень кисэ, штобу улевель седе шожда тонавтнемс келенть. Мон кочкинь тонавтнемс англань ды китаень кельтнень.
– Стакакс маряви китаень келесь? Эдь теде икеле мартонзо эзить вастневе.
– Алкукс меремс, арсинь, карми седе стакакс марявомо. Китаень кельсэ валтнэ нурькинеть ды вейке валось канды ламо смусть, кандови зярыя кортамо пельксэс ды невтеви зярыя иероглифсэ. Аламонь-аламонь тонадови те тапарявксонтень, ялатеке эряви пштистэ ваномс мельгаст, лиякс, маняват ды тапасак смустенть.
Арсян, китаень ды англань кельтне аволь меельцеть, конатнень мон тонавтнян, теде башка, ули мелем тонавтнемс кодамояк финнэнь-угрань кель, нама, эрзянседенть башка, эдь сонзэ мон содаса. Саемга, авам соды венгрань кель, моньгак сельмем сявали сонзэ содамочитнень лангс...
– Анастасия, минь содатано, тон ютавтат важодема од ломантнень марто, инеськеть, ёвтнек, кодамо?
– Се чистэнть, зярдо тынк редакциясь тердимим интервьюс, монень сёрмадсть Московсто истя жо интервьюнь коряс Мордовиянь землячествасто. Тосояк кевкстнесть од ломантнень марто тевтнеде. Мон тенст ёвтнинь, кода Московонь МГУ-со важодян эрзянь ды мокшонь кельтнеде лиятненень пачтямонть лангсо, презентация вельде ёвтнян койденек-кирдадонок, культурадонок. Сынь покш мельспаросо кунсолыть эйсэнь. Теде жо кортынь Мордовия Республикань Прявтонть икеле ВДНХ-нь «Россия» выставкасонть. Мейле монень мерсть: вана самай истят од ломантненень эрявияк важодемс кельтнень виевгавтомаст коряс.
– А вана кодат стакачить улить Московонь студентэнть эрямосо?
– Васняяк, кудосто туемась, авань марто явовомась, те свал пек стака. Теде башка, кудоютконь тевтнень ськамозон теемат. Те весе саи ламо шка. Эрян общежитиясо, секскак весементь теян монсь… Ды, нама, эсь прянть кис ответственностенть кандомась, мезесь истя жо а шожда кудосто туемадо мейле.
– Улить-арась мельть тонавтнемадо мейле самс Мордовияв эрямо ды мекс?
– Московось ды тосо тонавтнемась, нама, пек тукшныть мелезэнь, ансяк мон вечкса Мордовиянть. Шкась невтьсы, зярс а содан. Тесэ эри седеем, семиям, ялгам… Теде башка, вечкевикс тевемгак тесэ улить. Пек стака весементь кадомс. Секс од ломантненень, конань ули мелест тонавтнемс Московсо, мон бу меревлинь васня арсемс, мезекс, кодамо тувталонь коряс эряви туемс тов. Ды видестэ путомс питне эсь вийтненень, эдь кудосо ве ёно эрямось эрси а шожда. Ламо ков эряви кенеремс. Лиясто арсят, кода кенеремс сеске эрьва ков – тонавтнеме, важодеме, кудоютконь тевень тееме…
– Кода вечкат оймсеме?
– Ютко шкась кадови пек аламо, ды бути муеви, сестэ яван мель спортонтень, картинань викшнемантень, аудиокнигань кунсоломантень.
Ули мелем ушодомс ардтнеме Россиянть келес. Мелят васенцеде пачколинь Санкт-Петербургов, пек мелезэнь тусь тосонь мазычись – Исаакиевской, Юсуповской дворецтнэ, Рузонь ды Фабержень музейтне, Петергофось. Тосо ульнинь июнень меельце читнестэ, секскак савсь неемс ашо ветнень. Мелем ули тагояк тов понгомс, ансяк авань марто. Маень васенце читнестэ пачколинь Владимир ошов, косо мелезэнь пек тусь архитектурась – церьковатнеде тосо певтеме ды эрьванть эсензэ мазычизэ.
– Анастасия, ёвтык эсь мелеть, мезе эряви теемс, штобу сыремтемс од ломантнесэ тиринь келентень вечкеманть?
– Мон пек сеедьстэ арсян те кевкстеманть лангсо. Университетсэяк ламо кортнинек кельтнень ванстомадо. Вейке лингвистэсь, Дэвид Кристал, мерекшнесь: эрьва кавто тарготнестэ кулы вейке кель. Ды, нама, истямо уцяска эрзянь келентень аволинь арсе. Тесэ эряви од ломантнень оймесэ покш чарькодема – те келесь тетянь-авань, покштянь-бабань, секскак эряви сонзэ тонавтнемс. Ды келесь те аволь ансяк гайтть, букват, валт, валрисьметь… Те седеяк ламо – культура, лиятнень ёнов а молема, раське. Кельтеме ёми раськесь целанек. Ды сехте эрявиксэсь – эряви вечкемс келенть ды пештемс эйсэнзэ перькат эрямонть. Лиякс меремс, кортнемс, ловномс, кунсоломс, сёрмадомс... Тешкстаса, вишка пингестэ саезь монь перька ульнесть книгат, тетям-авам кортнесть эрзякс, лангозост ванозь, монгак карминь вечкеме эрзянь келенть.
Чарькодеви, Анастасия тусь тетянзо-аванзо киява – филологиясь сонзэ туртов те се, мезе канды кеняркс ды домка смусть эрямосонзо. Арсетяно те эрзянь мазый, превей, ёроков тейтерентень топавтомс весе мелензэ-бажамонзо ды улемс уцяскавокс. Истямо оймевий марто од ломантнень лангс ванозь, чарькодят, минек келенть ды раськенть ули вандынь чизэ! Паз лездазо весенень эрьва паро тевсэнть!
Марина Агафонова