Культурань инициативатнень Президентэнь фондонь грантонть лезксэнзэ вельде Инечинь кенярксчитнестэ Саранскойсэ панжовсь сценань од площадка – Од ломанень театра. Таркась кочказель «Россия» кинотеатрасонть.
Сонзэ панжома чистэнть тов сыцятненень теезель алкуксонь казне – «Донбасс: назад в будущее» фотовыставкась, косо невтневить колмосядто ламо кадрат, конатнень эрьва кодамо шкасто теизь профессиональной фотографт Донецкой Народной Республикань территориясо.
Выставканть панжомасо ульнесь МР-нь Прявтось Артём Здунов. Сон тешкстызе те выставканть питнейчинзэ, неень а шожда шкастонть эрявиксчинзэ.
* * *
Теке жо чистэнть Л. П. Кирюков лемсэ Саранскоень музыкальной училищасо Россиянь Скрипичной мастерэнь ассоциациясь ды Павел Тришевень скрипичной мастерскоесь невтсть «Классика, браво!» лем ало концерт. Сонзэ эйсэ ёрокчист невтизь раськеютконь конкурсонь лауреаттнэ. Концертсэнть ульнесть СВО-нь участниктнень семиятне ды ламо лия ваныцят.