Россиянь УМВД-нь Саранск ошонь округонь васенце номер полициянь отделэв лезкс мельга пшкадсь 73 иесэ цёра. Мартонь меельце читнестэ пенсионерэсь Интернетстэ редясь пачтямо, конань вельде арсесь сюпалгадомс. Сёрмадсь яволявтомат эрьва кодамо проектэнь коряс ды кучсь заявкат. Манчицятне эзизь кармавто кувать учомо…
Сонензэ гайневтсь вейке компаниянь представитель ды толковась, кода телефононзо вельде муемс эрявикс приложениянть. Мейле кучомс тов ярмакт. Васня сон макссь 9000 целковойть. Теде мейле мартонзо кортыцясь сыре ломаненть кармавтызе кучомс инвестицияс весе ярмаконзо.
Истя, пенсионерэсь кучсь ёвтазь счётонтень 5 157 000 целковойть. Шкань ютазь компаниянь представителесь лоткась мартонзо кортамодо.
Неень шкасто Саранскоень полицейскойтне манязенть яволявтоманзо коряс ютавтыть ванкшномат зыянов тевень теицянть лангс ливтемга.