Мордовиянь Прявтось Артём Здунов ютавтсь «Защитники Отечества» специальной военной операциянь участниктненень лездамонь государственной фондонь региононь отделениянь теемань кевкстематнень коряс промкс. Фондонть теемадо меленть ёвтызе РФ-нь Президентэсь Владимир Путин.
«Кевкстемась пек эрявикс, – тешкстась Артём Здунов. – Фондонть покшт полномочиянзо ды тевензэ, секскак васняяк эряви пурнамс виев команда сонзэ ветямонзо коряс. Омбоцесь – СВО-нь весе участниктне ды сынст семиятне улест учётсо, штобу шкастонзо явомс эрявикс лезкс».
Специальной военной операциянь участниктнень семиятненень социальной лезксэнь явомась ютазь иень сентябрясто саезь башка вановт алов. Важодемась нежеди исполнительной властень, местной самоуправлениянь органтнэнь ды велень поселениятнень, «Единая Россия» партиянть, волонтёртнэнь, эрьва кодат предприятиятнень, «Российский фонд мира» общественной фондонь Мордовиянь отделениянь вейсэнь тевтееманть лангс. Тень вельде явови весемеёндонь социальной лезкс.