Эйкакшонь республиканской клинической больницянтень топодсть 60 иеть. Датась покш, ансяк больницясь ашти каштанчисэ аволь ансяк историянть кувалма, меельце шкань изнявкстнэнь коряскак. ПФО-со сон ловови неень шкань медицинской оборудования марто медицинань сехте вадря центракс.
Мордовия Республикань Прявтонть Артём Здуновонь пельде юбилеенть кувалма больницянь коллективентень поздоровт ёвтась региононь Правительствань Председателесь Дмитрий Поздняков.
– Эйкакшонь республиканской клинической больницясь – Мордовиянь лецямонь прявт учреждениятнестэ вейкесь, – тешкстась Дмитрий Александрович. – 60 иетнень перть больницясь медицинань аволь покш организациястонть кассь неень шкань Центракс, косо максови специализированной ды высокотехнологичной лезкс эйкакштненень. Меельце иетнестэ Мордовиясо здравоохранениянть виевгавтомантень явови башка мель, эрямос совавтозь зярыя покш проектт, теезь эйкакшонь больницянь хирургиянь од корпусось. Истя топавтови Россиянь Президентэнть Владимир Путинэнь кармавтомазо медицинань лезксэнть вадрячинзэ кепедеманть коряс. Тынк больницясонть эрязасто тевс нолдавить неень шкань, инновационной технологиятне, кастови-виевгавтови высокотехнологичной лезксэсь. Эрьва иестэ тесэ лецявить 50 тёжадо ламо эйкакшт, теевить 6 тёжадо ламо операцият. Больницясь ашти васенцекс малоинвазивной операциятнень тевс нолдамонь хирургиянь службасонть.
Ламо лембе валт Дмитрий Поздняков ёвтась больницянь важодицятнень лемс: сынь алкуксонь профессионалт, конатне маштыть аволь ансяк лецямо, истя жо вечксызь эсь тевест, эйкакштнень ды мелявтыть кисэст. Сынст лангсо – сядот идезь эрямот!
Кода жо мерсь МР-нь Государственной Собраниянь Председателесь Владимир Чибиркин, неень шкасто Эйкакшонь республиканской клинической больницясь сехте вадря Равчиресэ.
– Эсь профессионализманть марто тынь лецятадо сехте вишкине пациенттнэнь, – мерсь Владимир Чибиркин. – Мордовиянь эрицятне ёвтыть тенк сехте лембе валт. Сюкпря тенк минек эйкакштнень шумбрачист кисэ!
– Тынь вансттадо Мордовиянь ды Россиянь прявт капиталонть! – ушодызе эсь кортамонзо МР-нь Здравоохранениянь министрань васенце полавтыцясь Елена Степанова. – Тынк больницясо виевгавтови специализированной лезксэсь, панжовить од отделеният, эйкакштненень жо максови сехте вадря лецямось. Покш сюкпря Мордовиянь Прявтонтень Артём Здуновнень ды республикань Правительствантень здравоохранениянтень мелень явоманть кисэ!
Юбилеенть коряс эсь коллективентень ламо паро валт ёвтась больницянь главной врачось, Россиянь заслуженной врачось Олег Солдатов.
– Тынь монь туртов – геройть, – мерсь Олег Солдатов. – Минек больницясь свал моли икелев: эсь шкасто васенцекс масторсонть панжинек эйкакшонь реанимационной отделения, седе тов карминек пионерэкс ансяк чачозтненень реанимациянть панжомасо. Пациенттнэнь лецямосо од ёнкстнэ, неень шкань сехте вадря технологиятне кармасть малавикст минек туртов хирургиянь од корпусонть панжоманзо марто. Шумбрачи тенк, вадря тевть минек больницянть, республиканть ды масторонть лезэс!
Кенярксчинь промкссонть Эйкакшонь республиканской клинической больницянь ламот важодицятне тешкставсть государственной покш казнесэ. Республикань Прявтонть пельде ветерантнэнень максовсть цецят.
Юлия Еремина