Течи ютась вастовома, кона алтавсь «Шумбрат, школа» акциянтень. Сонзэ ютавтыцятне – «Единая Россия» партиясь, милосердиянь ды шумбрачинь Россиянь фондось, МР-нь профсоюзонь Федерациясь ды «Единая Россиянь Молодая гвардиясь».
Промксонть панжизе «Единая Россия» партиянь МРО-нь секретаресь В.В.Чибиркин. Сон тешкстызе, тедеде акциясь ютавтови аволь кода свал – Раськень театрасо, ков пурнавкшныльть эйкакштне ды тетяст-аваст. Коронавирустонть ней казнетне максовить кудова.
– «Шумбрат, школа» акциянть прявт мелезэ – ломантне явовольть мель ды лездавольть нужачисэ эриця ды ламо эйкакшонь триця семиятненень пурнамс эйкакштнень школав. Истямо акциясь юты кемгавтовоцеде. Тедеде арсеви максомс 160 казнеть, – кортась Владимир Васильевич.
Вал сайнесь МР-нь профсоюзонь Федерациянь Председателесь С.В.Борисов. Сон пачтясь, профсоюзтнэ эрьва ие максыть лезкс те акциянтень.
Те вастовомасонть истя жо ульнесь «Единая Россия» партиянь депутатось В.И.Пискарев. Сонзэ валонзо коряс, весе депутаттнэ явсть мель те акциянтень, весе мельспаросо лездасть. «Эйкакштне – те минек сы шканок, поладксонок. Одтнэнь ды эйкакштнень марто эряви важодемс», – кортась В.И.Пискарев.
– Минь пек мелявтынек акциянть коряс. Кармить-арась лездамо? Пандемиясь ломантнень седеяк малавгавтынзе. Тагояк мерян, минек ломантне паронь арсицят ды чевте седейть, – кортась «Крепкая семья» партийной проектэнь координаторось, «Российский фонд милосердия и здоровья» благотворительной общественной фондонь минек региононь отделениянь прявтось Л.В.Никонова.
Теде мейле инжетне сыргасть кудова казнень явшеме. Тейтернетнень ды цёрынетнень туртов казевсть мазый рюкзакт, пеналт, ручкат, карандашт, тетрадть. Софья Афонина пурны васенце классов. Ансяк сон сэреди ды парсте а якави. Госдумань депутатось В.И.Пискарев алтась тензэ максомс лезкс: саемс лецямо паро таркав. Кемтяно, весемесь топавтови.
Эйкакштне пек кецнесть казнетненень. Сынь пек учить таштамковонь 1-це чинть.