Апрелень 5-це чистэ ютавтовсь МР-нь Госсобраниянь сисемеце тердемань колоньгемень нилеце сессиясь. Тосо ульнесть Мордовиянь Прявтось Артём Здунов, региононь Правительствантень совицятне, властень исполнительной органтнэнь ды местной самоуправлениянь органтнэнь руководительтне. Чинь повесткасо ульнесть 17 кевкстемат. Сессиянть панжизе ды ветясь Мордовия Республикань Госсобраниянь Председателесь В. В. Чибиркин.
Васенценть коряс совавтозь полавтомат Мордовия Республикань Конституциянтень: Госсобраниянтень максовить полномочият Мордовия Республикань Счётной палатань Председателень полавтыцянть ладямонзо ды каямонзо коряс.
Депутаттнэ вемельсэ примасть полавтомат «О транспортном налоге» Мордовия Республикань Закононтень ламо эйкакшонь семиятнень ды семиятнень коряс, конатнесэ кастови эйкакш-инвалид. Транспортонь средстванть виезэ, конань лангс максови льгота транспортонь налогонть коряс, истят семиятнесэ тетянтень эли авантень, покшолгавтови 200 алашань вийс. Истя жо ванстови правась получамс льгота транспортонь налогонть коряс специальной военной операциясо маштовозь участниктнень семияст туртов.
Мордовия Республикань истят законопроекттнэс, косо кортави минек республикасо межбюджетной отношениятнеде, питневтеме юридической лезксэнь максомадо, кизэнь каникулатнестэ эйкакштнень шумбрачист витемадо ды оймсемань тевтнень ладямодо, виртнень коряс тевтнень регулированиядо, спортонь ды физической культурадо, совавтозь полавтомат.
Правительствань часонть лувсо кортась МР-ва Предпринимательтнень праваст ванстомань коряс уполномоченноесь Елена Юрченкова. Сон ёвтась мель примамс «О семейном предпринимательстве» Мордовия Республикань Закон ды домкалгавтомс Мордовиянь Важодемань династиятнеде положениянть «предприниматель» профессиясонть, истя жо ванкшномс китнень-янтнэнь Предпринимательтнень праваст ванстомга уполномоченноентень законодательной инициативань правань максоманть коряс.
Сессиясонть Мордовиянь Прявтось Артём Здунов кармавтсь депутаттнэнень седе эрязасто важодемс эрицятнень марто республикасонть сэтьмечинь топавтомань кевкстематнень коряс. Истя жо ёвтась мель ютавтомс нормативной юронь мониторинг ды, бути эряви, пшкадемс Государственной Думантень миграционной законодательствасо асатыкстнэнь витеманть коряс.
«Миненек эряви пштистэ ваномс мигранттнэнь самонть мельга. Ды аволь а меремс самс, ваномс ды содамс: кие миненек сы, мезекс. Минь карматано ёвтамо мель важодема таркатнень максыцятненень лия мастортнэстэ сыцятнень роботамо саемстэ тердемс экспертт рузонь келень, минек культурань ды лия эрявикс ёнкстнэнь содамга питнень максоманть туртов. Школатнесэ тонавтыцятненень эряви ютавтомс «Разговоры о важном», а нолдамс раськетнень эли религиятнень ютксо аладямот. Эсенек невтевксэнть вельде эряви тонавтомс эйкакштнень явомс паронть беряненть эйстэ», – мерсь региононь Прявтось.