Неть читнестэ А. С. Пушкин лемсэ парксо яволявтовсть цётамот «Пернатый квартал» республиканской конкурсонтень. Сон алтавсь Нармунтнень ванстомань чинтень, конась эрьва иестэ тешкстави февралень васенце пельксстэнть.
Самай се шкастонть саезь мартонь 22-це чис эйкакштнень ютксо ютавтовсь нармунень кудынетнень теемань конкурсось. Сонзэ анокстыцянзо-ютавтыцянзо – Мордовия Республикань Государственной Собраниясь, «Пиже мир» экологиянь эйкакшонь общественной организациясь, «Известия Мордовии» газетась.
Те конкурссонть ёрокчист невтицятне иестэ иес яла ламолгадыть. Тедеде пелькстамонтень анокстазельть 600 важодевкст. Сынст теицяст – эйдень кужов ды школав якицят. Нама, тенст лездасть тетяст-аваст, покштяст-сырькаест. Тешкстама, а вишкине путовксост тонавтыцясткак, кить те чистэнть сакшность мартост кенярксчинь явомо.
Алкукскак, стака ульнесь жюринтень кочкамс вадрятнень ютксто сехте партнэнь. Истя, кочказельть ниленьгемень нармунень кудынеть.
…Вана А. С. Пушкин лемсэ оймсемань парконь куншкакуросо ушодовсь цётамотнень яволявтомась, казнетнень явшемась. Конкурссонть пелькстыцятненень ды весе пуромозтненень васняяк пшкадсь МР-нь Госсобраниянь Председателень полавтыцясь Евгений Тюрин. Сон ёвтась изницятненень поздоровт МР-нь Госсобраниянь Председателенть В. В. Чибиркинэнь ды весе депутаттнэнь пельде.
– Эйкакштнень туртов те пелькстамонть минь ютавттано теевезь коень коряс. Сонзэ лувсо минь тонавттано сынст пертьпельксэнть вечкеме ды ванстомо, – мерсь Евгений Тюрин. – Нать, а стяко РФ-нь Президентэсь пертьпельксэнть ванстоманзо ёвтызе сехте эрявикс тевтнестэ вейкекс. Те конкурсось тонавты вечкеме масторонть, республиканть, семиянть ды се тарканть, косо тон чачить-касыть. Конкурссо пелькстыцятне свал эйсэнек кенярдовтыть мазый ды лиятнень ёнов а молиця нармунень кудынетнесэ. Кеман, сыненст муевить таркат минек парксонть, эйкакштне жо седе товгак поладсызь те паро тевенть.
МР-нь Госсобраниянь Председателень полавтыцянть Евгений Тюринэнь марто вейсэ эйкакштненень ёвтасть поздоровт ды макссть казнеть МР-нь Госсобраниянь депутатось Алексей Федьков, «Пиже мир» ДЭО-нь прявтось Ольга Ручина, «Известия Мордовии» газетань прявт редакторонь полавтыцясь Татьяна Налётова.
Тешкстасынек, изницятне казевсть кавксо номинациянь коряс: «Национальный колорит», «Экодом», «Креативный дизайн», «Арт-дворец» ды лият. Ёроков эйкакштненень ды сынст тонавтыцятненень дипломт ды казнеть макссть Мордовия Республикань Государственной Собраниянь Председателенть Владимир Чибиркинэнь, депутаттнэнь Александр Атласовонь, Алексей Федьковонь, Василий Батайкинэнь, Виктор Рубцовонь ды Виктор Ташкинэнь пельде.
Весемева неявсь, эйкакштне покш каштанчисэ аштесть теевксэзэст истямо покш питнень путоманть кувалма. Эрьва кодамо номинациятнева изницякс лиссть: Алина Овчинникова, Анна Атеняева, Екатерина Ерофеева, Мирослав Самойлов, Сабина Хаматдинова, Анисья Аданичкина, Данил Чернов, Андрей Сарванов ды лият. Кемеви, сынь ды ламо лия эйкакштне, кить те пелькстамосонть бажасть лездамс нармунтненень, касыть пертьпельксэнь алкуксонь вечкицякс ды те паро тевентень ялгасткак тонавтыцякс!
Валентина Юдина