Специальной военной операциянть ушодовомсто саезь Мордовиянь ламот семиятнесэ ды предприятиятнесэ теевсь паро кой – лездамс фронтонтень. Ломантне свалшкасто кучнить ярмакт «Мирэнь Российской фондонть» счётс, предприятиятне эрьва ковсто саезь ярмактнестэ пельксэнть истя жо кучить те счётонтень.
Неть ярмактнень лангс СВО-нь боецтнэнь вешемаст коряс пурнави гуманитарной сталмось. Пурнамонть мельга ваны робочей группась, конась теезь Мордовиянь Прявтонть кармавтоманзо коряс.
Неть читнестэ гуманитарной лезксэнь партиясь ускозь Донбассов. Строительной материалдо, инструменттэ, обмундированиядо, цифровой аппаратурадо, личной гигиенань предметтэ ды лецямопельде машинась пештязель пельчасос. Тень теизь #МЫВМЕСТЕ волонтёронь штабонтень совицятне ды «Единой Россиянь Од Гвардиянь» доброволецтнэ.
– Минь долгсотано минек солдаттнэнь ды офицертнэнь икеле, секс лездатано, мейсэ машттано. Тень кувалма аштетяно покш каштанчисэ, эдь минекак ули путовксонок, – тешкстыть од ломантне.
«Мирэнь Российской фондонь» Мордовской республиканской отделениянь правлениянь председателенть Ольга Филёткинань валонзо коряс, ярмактнень пурнамось моли эрязасто.
– Благотворительной организациянть счётс састь уш 126 миллионт целковойде ламо. Ёвтан покш сюкпря минек промышленной предприятиятненень, индивидуальной предпринимательтненень ды весенень, кить максыть лезкс, – мерсь Ольга Филёткина.
«Мирэнь Российской фондонь» Мордовской республиканской отделениянь правлениянь председателесь тешкстась, масторонть туртов истямо стака шкастонть пек эрявикс аволь ансяк финансовой лезксэсь. Ольга Филёткинань валонзо коряс, передовойсэ боецтнэнень лезды истя жо «Кулибинтнэнь» превейчист, ёрокчист. Сынст арсевкстнэнь-теевкстнэнь – квадрокоптертнэнь ды дронтнэнь – пек учить СВО-нь таркасонть.
Ольга Филёткина тешкстась, «Мирэнь Российской фондось» вейсэ Мордовия Республикасо «Защитники Отечества» фондонь филиалонть марто лездыть фронтсто велявтозь СВО-нь участниктненень ды сынст семиятненень изнямс мелявкстнэнь. Сехте пшти кевкстематнень ютксо – компенсациянь пандоматне ды боевой действиянь ветеранонь удостоверениянь максомга документтнэнь пурнамось.
Мордовиясь сайсь шефства Херсононь областень Каланчакской муниципальной округонть лангсо. Республикась лезды инфраструктуранть вельмевтемасо, медицинань, образованиянь ды лия ёнкстнэсэ. «Мирэнь Российской фондоськак» ушодсь ветямо важодема тень коряс, лезды ломантненень, кить понгсть эрямонь стакачис.