Покш Березникень райононь Николаевка веленть маласо «Строителям Сурских оборонительных рубежей 1941-1942 гг.» кеврунгонть вакссо июлень 16-це чистэ ютавтовсь покш меропрития. Тесэ ульнесь «Защитники Харинки» регионъютконь военно-исторической реконструкциясь. Сон алтавсь 326-це Краснознамённой Рославльской стрелковой дивизиянь, конанть юрсо малав 70 % ульнесть Мордовиянь ломанть, офицертнэнь ды боецтнэнь ледстнемантень.
Мероприятиясонть весемезэ ульнесть малав 300 ломанть. Неть – масторонь эрьва кодамо регионсто: Мордовиясто, Татарстансто, Марий Элстэ, Чувашиясто, Саратовасто, Ульяновскойстэ – исторической реконструкциянь клубтнень активисттнэ ды истя жо республикань поисковой, кадетэнь ды юнармеецэнь вейсэндявкстнэс совицятне, ветеранонь Советэнь члентнэ, «Волонтёры Победы» вейсэндявксонь, «Поиск 13 регион» вешнемань-идемань отрядонь, «Свято-Предтеченское» казаконь обществань, «Защитники Отечества» МР-ва специальной военной операциянь участниктненень лезксэнь максомань государственной фондонь филиалонь участниктне, Мордовиянь районтнэстэ сазтне ды лиятне.
Мероприятиянть арсицятне-ютавтыцятне – МР-нь Од ломанень тевтнень коряс государственной комитетэсь, «Мордовский республиканский молодёжный центр» ГБУ-сь.
«Защитники Харинки» регионъютконь военно-исторической реконструкциясь ушодовсь Россиянь Гимнастонть. Мордовиянь Прявтонть Артём Здуновонь пельде пурнавозтненень валт ёвтась МР-нь Правительствань Председателень Полавтыцясь Галина Лотванова.
– Течи ульнесь военно-исторической реконструкция минек земляктнень ледстнемга, конатне воёвасть ды чавовсть Калужской областень Харинки веленть маласо. 1941-1945 иетнень Ине Отечественной войнанть шкасто тосо мольсть виев тюремат. Течи неть тевтне тусть историяс ды сындест содатано книгатнень, фильматнень ды исторической реконструкциятнень вельде. Реконструкциянь участниктнень ютксо улить кадетской класстнэс якицят, поисковикень ды юнармеецэнь вейсэндявкстнэс совицят. Те пек вадря, эрьванть тынк ули тевенк, конась тенк вечкеви ды косо тынь приматадо участия. Минь свал лездынек ды карматано лездамо Мордовиянь патриотической вейсэндявкстнэнень, эдь тынь тейтядо покш ды эрявикс тев. Минь ледстнетяно, минек историясь эри! Седе покш мель яводо историянтень, ванстодо сонзэ ды лездадо сеть ломантненень, конатне течи специальной военной операциянь ютавтома таркатнесэ ды ванстыть ине Россиянть границянзо, – мерсь Г. А. Лотванова.
МР-нь Госсобраниянь Председателенть ды депутаттнэнь пельде «Защитники Харинки» реконструкциянь участниктненень ды лия пурнавозтненень пшкадсь МР-нь Госсобраниянь Председателень полавтыцясь Евгений Тюрин:
– Мероприятиянь ютавтома таркась кочказь а стяко. 1941-1942 иетнень якшамо телестэнть республикань тёжат эрицятне минек моданть лангс ятонть а нолдамга тейсть оборонительной сооружениятнень. Республикань ды масторонь эрьва таркась невти народонть героизманзо. Ды неень шкасто минек цёратне лавтовдо лавтовс аштить Россиянть кисэ, топавтыть аравтлувтнень, конатнень путынзе масторонь Президентэсь Владимир Путин. Весе сынь топавтовить, Изнямось карми минек!
Штобу эсь сельмсэ неемс военно-исторической реконструкциянть, Николаевкав сакшность ламо инжеть. Ламотне ульнесть семиянек, вишка эйкакшост марто, штобу сыньгак содавлизь ды а стувтовлизь историянть.
Военной тевтнень невтемась токинзе весень, эдь тесэ истя жо ульнесть якстереармеецтнэнь ды немецтнень ютксо тюремась, полонс саезетнень леднемась, бомбатнень сезевемат, бронемашинасо ды мотоцикласо немецтнень ардомат. Эряви тешкстамс пиротехниктнень виев важодеманть, конат топавтсть весе неть тевтнень. Техниканть жо максызь исторической реконструкциянь клубтнень активисттнэ – эсь тевень алкуксонь патриоттнэ ды энтузиасттнэ. Реконструкциянь меельце невтемасонть изнясть, нама, якстереармеецтнэ.
Теде мейле тюремань паксятнестэ а велявтыцятнень лемс яволявтозель чатьмонемань минута. Седе тов 1941-1945 иетнень Ине Отчественной войнасо Изнямонть кувалма теевсть оружиясто залпт.
Ледстясынек, 1942 иень январьстэ саезь 326-це стрелковой дивизиясь ветясь виев тюремат Калужской областень Харинки веленть маласо. 38 чинь перть 326-це стрелковой дивизиясь весемезэ ютась 506 вайгельбеть ды олякстомтсь 451 веле. Истя жо чавозельть тёжадо ламо немецень солдатт ды офицерт, яжазельть 6 штабт.