Апрелень 11-це чистэ МР-нь Пресс-центрасо ютавтовсь «Кибермошенничество. Реальность и профилактика» вастовома, косо кортавсь неень шкань манчемань ёнкстнэде. Пресс-конференциянь инжекс ульнесть Саранск ошка Россиянь УМВД-нь общеуголовной ёнксонь манчематнень панжомань коряс отделэнь прявтось Егор Петров, Россиянь Банконь Волго-Вятской ГУ-нь МР-ва Национальной банконь отделениянь безопасностень отделэнь прявтось Александр Петров ды Н. П. Огарёв лемсэ МГУ-нь психологиянь кафедрань доцентэсь, психологической наукань кандидатось Ирина Тараскина.
Кода тешкстызе Егор Петров, тедедень васенце кварталсто республикань эрицятне манчицятненень пандсть малав 80 млн целковойть. Ютазь иенть коряс неть невтематне ков седе кассть.
– Меельце шкасто седе сеедьстэ вастневицякс кармась манчемань истямо ёнксось, зярдо гайневтицятне ёвтыть эсь пряст правоохранительной органонь эли кредитной организациянь важодицякс. Тесэ пачтяви, буто манчицятне снартнить саламс ломаненть ярмаконзо. Сынст лоткавтомга эряви эсь ярмактнень ветямс ёвтазь счётонтень. Вана самай тесэ эрицятне манявитькак, – корты Егор Валерьевич. – Истя жо ламо яволявтомат улить истямо ёнксонь коряс, зярдо гайневтить буто правоохранительной органонь важодицят ды пачтить, келя, малавиксэнк понгсь ДТП-с, сонзэ идемга эрявить пандомс ярмакт. Ютазь иенть коряс истят преступлениятнеде ульнесть тешкстазь малав 60, а вана тедедень колмо ковтнень перть уш малав 40. Весементь коряс ветяви домка важодема. Истя, тедедень васенце кварталонть перть истямо манчемань тевтнень коряс кундазь кото од ломанть, конатне ульнесть курьерэкс ды сайсть ломантнень кедьстэ малавиксэст «идемга» ярмактнень.
Истя жо Егор Петров ёвтась манчемань зярыя лия ёнкст. Тесэ улить манчемань тевть орожиямонть, социальной сеттнень вельде, онлайн-рамамотнень тееманть вельде, БАД-тнэнь ды лецямопельтнень рамамонть кисэ компенсациянть пандомань ёнкстнэсэ ды лиятне.
Весементь коряс эсь ярмактнень ванстомга ули вейке ёнкс – лоткавтынк кортамонть гайневтицянть марто ды зярдояк илядо ёвта эсь банконь картань ды счётонь цифратнень.
Кода тешкстась МР-нь Национальной банконь безопасностень отделэнь прявтось Александр Петров, банконь важодицятне зярдояк а гайневтить тыненк картань ды счётонь максоматнень (ПИН-кодонть, картанть удало тешкстазь колмо цифратнень, реквизиттнэнь) коряс.
– Бути тыненк гайневтсть ды ёвтызь пряст банконь важодицякс, кевкстинк лементь, фамилиянть, тетялементь, лоткавтынк кортамонть, эсь банконь картанть удалдо эли Интернетстэ ванынк кредитной организациянь телефононь номерэнть ды гайневтеде тынсь. Ды малав 99 % лисни истя, тыненк гайневтсть манчицят.
Кода мерсь Ирина Тараскина психологось, манчицятнень ютксо седе покш пельксэсь – пек вадря специалистт, конатне кортамонь коряс ланганк чарькодьсызь весементь. Секскак, бути тыненк гайневтить а содавикс ломанть, ёвтыть пряст правоохранительной органонь эли банконь важодицякс, илядо эйсэст кунсоло ды лоткавтынк кортамонть. Ярмаконк кадовить мартонк.
Юлия Еремина