Саранскоень 43 № лицеень 5-це ды 10-це класстнэсэ тонавтницятне вастневсть «За отвагу» медалень кавалерэнть, специальной военной операциянь участникенть марто. «Мужествань уроксонть» инжесь макснесь каршо валт тонавтницятнень кевкстемаст лангс, мейле эйкакштне невтизь тензэ фронтовой кинооператоронтень Владимир Сущинскийнень алтазь школань музеенть.
Вейсэ лицеень директоронть Николай Чиняев марто «Мужествань уроксонть» ульнесь Саранск ошонь округонь прявтонь полавтыцясь – Социальной политикань коряс департаментэнь директорось Оксана Шуляпова.
– Тиринь масторонь ванстыцятнень ледстнемат аволь ансяк Изнямонь чистэ. Эсь масторонть, койтнень-кирдатнень вечкицякс улема свал, – истя ушодызе уроконть лицеень прявтось Николай Чиняев. – Неень инженек – Владимир Евгеньевич – алкуксонь герой, боевой действиятнень участник. А эштё – сон прядызе минек школанть.
– Те школанть мон прядыя 45 иеде икеле, – мерсь Владимир Евгеньевич. – СВО-нь таркасонть ульнинь кото ковт, вейксэксть ранявкшнынь. Фронтов тукшнынь эсь олясо. Од таркатнесэ, конатне аволь умок совасть Россиянтень, мон эсь боевой ялган марто ванстынь ошонть, конань 90 процентт эрицятне – рузт, ды тосонь весе ломантне кецнить минек масторонтень вейсэндявоманть кувалма. Вадрясто тонавтнеде историянть, мейле содамочинк макссынк эсь эйкакшонк туртов. Украинань историянь учебниктнесэ сёрмадозь, келя, Ине Отечественной войнасонть «изнясть» американецтнэ ды украинецтнэ (истя арсить превтеметне). Бути тынь, эйкакшт, карматадо содамо алкуксонь историянть – карми Россияськак. Стувтсынк историянть – минек «сэвсамизь» ятось.
Инжентень ёвтнезель, лицеень тонавтницятне лездыть СВО-нь участниктненень: теить окопной штатолт, аволь умок ушодсть кодамо маскировкань сетть. Ванстомс жо ды мельсэ кирдемс минек покштятнень героической ютазь шкаст лицеисттнэнень лезды фронтовой содавикс кинооператоронть Владимир Сущинскиень музеесь.