Вторник, марта 02, 2021
Важное

Ютасть уш 75 иеть, кода оймасть Ине Отечественной войнань меельце леднематне. Яла седе удалов кадовить историяс неть читне, седеяк аламолгадыть сынст неицятне ды седеяк покш питнейчи се шкань ванстовозь пачтямотне кандыть минек туртов.

Течи, Ине Изнямостонть 75 иетнень ютазь, а кода а ледстямс войнань шкань боевой ды трудовой подвигтнень. Сынст ютксо – Волжско-Сурской оборонительной рубежень сооружениятнень теемась, конась ветявсь 1941-1942 иетнень телестэнть.

…1941 иень сёксесь. Фашистэнь ятось эрязасто пачколесь Московонтень. Истя, зыяндонть ванстомга ды гитлерэнь войскатнень кирдемга 1941 иень ожоковонть ушодовомсто Равчирень покш оштнень малава, Сура леенть чирева, кемекстазель ушодомс ванстомань сооружениятнень строямонть. Сурской оборонительной рубеженть кувалмозо, кона ютась Ульяновскоень, Пензань, Куйбышевань (Самарань) областтнева, Чувашиява ды Мордовиява, 380 ламо вайгельпеть, конатнестэ 80 вайгельпеде ламо – минек республикава.
Сурань рубежень строямонь тевтне ушодозельть уш 1941 иень ожоковсто. Эрявсь теемс укреплениятнень линиянть, кона аштесь противотанковой ровстонть, отсечной ровтнестэ, панжадо окоптнестэ, стрелковой отделениястонть. Паксянь укреплениятнень юрс совильть мода потс теезь кудотне (землянкатне), блиндажтне, командной пункттнэ. Строямонь тевтне кодаяк эзть топавтово ансяк военнойтнень, сапёрной ды инженерной часттнень вийтнесэ, секскак тердезельть велетнес кадовозь атятне, аватне ды эйкакштне. Весемезэ тесэ важодсть 70 тёжадо ламо ломанть. Ды седе ламотне – ават. Роботатне пек стакальть, кедьёнкстнэстэ ульнесть ансяк киркат, койметь, ломт, узереть ды пилат.

Рубежень строямонь шкатне пек нурькинельть. Якшамо телесь эштёяк весементь стакалгавтсь, ансяк мезеяк лангс апак вано, Сурской оборонительной рубежень строямонь коряс кармавтомась топавтозель. Модалангонь тевтнень покшолматне – 3 миллионт колмонзазь метрат, теезь 1600 толонь точкат (дзотт ды площадкат), 1500 модань кудот ды 80 окопт.
Школань вейкеяк учебниксэ арасть пачтямот Сурань оборонительной рубежень строицятнень героической подвигтест, сеть стакачитнеде ды цидярдоматнеде, конатнень сынь кирдизь. Сынь ветясть эсест войнанть, конань эзь нее масторось: эсь кедьсэст тапасть кшникс кельмезь моданть, верьс човасть сурост ды тейсть эрявикс тевенть. Кинь-бути туртов те рубежесь кармась эрямонь меельце рубежекс. Те ульнесь ломанень алкуксонь подвиг ды героизма тылсэ, конадонть аламо сёрмадыть ды конась паро ладсо апак тонавтнеяк. Ансяк эсест участниктнень ёвтнематне пачкодсть миненек. Ды стувтомс сынст кодаяк а эряви.

Неть читнестэ Мордовиянь Пресс-центрасо ютавтовсь пресс-конференция, кона алтавсь республиканть историясо покш тевентень – Сурань оборонительной рубежень строямонть ушодовомсто 80 иетненень.
Мероприятиясонть ульнесть Войнань, трудонь, вооружённой вийтнень ды правоохранительной органтнэнь ветерантнэнь (пенсионертнэнь) весероссиянь общественной организациянь МРОО-нь председателесь Иван Цыганок, «Большеберезниковский «Дом детского творчества» МБУДО-нь дополнительной образованиянь тонавтыцясь, Покш Березникень райононь «Память » вешнемань отрядонь ветицясь Сергей Косынкин ды Вячеслав Кормилицын.

– Тедедень ожоковсто топодить 80 иеть, кода ушодовкшнось Сурань оборонительной рубеженть теемазо, – тешкстызе Иван Семёнович. – Важодсть тосо малав 70 тёжат ломанть. Ды седе ламотне эйстэст – ават ды эйкакшт. Кедьёнкстнэстэ ульнесть ансяк койме ды кирка. Ушосонть цят якшамоль, 40 градусто седе ламо, эсь норманть жо эрявсь топавтомс. Ды колмо ковонь перть икелест аравтозь задачась топавтозель. Пек паро, оборонительной рубежесь эзь эряво, ятось тей эзь пачкоде. Течинь шкане жо минек прявт тевенек – ёвтнемс те подвигтенть од ломантненень, штобу содавольть ды авольть стувтне историянть.

Иван Цыганоконь валонзо коряс, ветеранонь организациянть вийтнесэ течи удалась муемс Сурань рубежень теемань 55 участниктнень, конат ёвтнесть се шкадонть ды тевтнеде ледстнематнеде. Сынст ёвтнемаст коряс, кшникс кельмезь моданть чувомо ушодомадо икеле савсь пултамс покш толпандят, штобу сон куш аламодо солаволь. Коймесэ, узересэ ды ломсо роботасть валскестэ саезь позда чокшнес, а мейле ялго велявтыльть маласо велетнес, косо эрильть. Сеть жо, кить састь васоло велетнестэ, кадовильть якшамо барактнес, палаткатнес, конат теезельть теске. Сеедьстэ лисиль истя, што начко оршамотне венть перть а кенерильть коськеме, ялатеке валске марто сынст савиль оршамс одс ды кундамс тевтнес. Андстькак пек лавшосто ды свал текеденть. Тень лангс апак вано, ломантне путсть весе виест ды роботасть эрьва чистэ.

Мордовиясо те подвигтенть а стувтнить. Вячеслав Кормилицынэнь валонзо коряс, самай тень коряс Россиянь МЧС-нь «Школа безопасности» экспериментальной лагеренть тееманзо туртов кочказель Сура леень вить берёкось (Покш Березник ёнксось). Теде башка, 2002 иестэ Сурской рубежень теицятнень ледстнемга тесэ теезель а покшке тешкс.
Эрьва иестэ тесэ ютавтневить эрьва кодат мероприятият, экскурсият, военно-исторической реконструкцият, башка мель явови эйкакштнень ды од ломантнень тиринь масторонь ды кисэнзэ аштемань тонавтомантень.

Кода мерсь Сергей Косынкин, Покш Березникень школасонть важоди музей, косо пурназь Сурань рубежень теицятнень фотографияст, курмост-кармост ды кедьёнкстнэ, конат нолдазельть тевс строямстонть.
Сень коряс, што иесь юбилейной, ледстнемань датантень арсеви алтамс-ютавтомс эрьва кодат мероприятият, покш мель арсеви явомс школасо тонавтницятнень ды од ломантнень марто вастовоматненень. Теке марто тедедень сёксня арсеви ютавтомс митинг-реквием Сурань рубежень теицятнень подвигест ледстнемга. Истя жо се таркасонть арсеви теемс мемориал, стявтомс геройтнень лемс кеврунго: атя, ава ды эйкакш.

Юлия Еремина.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».