Четверг, марта 28, 2024
Важное

Тиринь мастор, раськень мода! Зяро тон эсеть элесэть нурсить, трить- кастыть паро ломанть, конатне весе эрямост перть пек ламо важодсть, свал мелявтсть седе, кода юты вандынь чись аволь ансяк эсест кудораськесэ, лия ломантнень кисэяк. 

Нама, улить истят вадря ломанть, конатне весе эрямост перть кадсть эсь мельгаст лембе валсо ледстнемат, конатне зярдояк эзть кекшне лия ломантнень удалга, кода стака тенст илязо уле, кеместэ кандсть эсест эрямонь крёстост ды свал важодсть эсь прянь апак жаля.

Монь ули покш мелем ёвтнемс вейке истямо ломанде, ламо эйкакшонь триця авадо, кона ульнесь ёроков, тевень вечкиця, велень эрьва тевс чарькодиця, видечинь кандыця ломанекс. Истямо ломанденть мерить – алкуксонь велень ава!
Те аванть лемезэ – Оторова Анастасия Николаевна, кона эрясь Покш Березникень райононь Парынзэлесэ малав 93 иеть ды вана аволь умок тусь эрямосто.

Анастасия Николаевна Оторова Парынзэлесэ свал лововсь пек превей, видечинь кис аштиця ды велень вадря ломанекс, конанень ламот сакшныльть превень кевкстеме, мартонзо седейшкава кортнеме ды потмовалонь чамдомо. Те авась эрьванень муиль седеень оймавтыця чевте валт – кода покштнень, истя вишкинетнень туртовгак. Нама, конась тензэ сыль аволь паро мельсэ-превсэ, сетнень аламодо мурнилинзе. Та-кода сетнеяк кеж лангозонзо эзть сайне, маштсь мурнемеяк кода-бути чевтестэ, лембе валсо кортазь, истя, штобу а покордамс мейсэяк истямо ломаненть, мекевлангт, максыль истятнэнень валдо превть, ды ломанесь ушодыль эрямонть лангс лиякс ваномо.

Анастасия Николаевна Оторова чачсь 1927 иень сундерьковонь 4-це чистэ. Те аванть эрямозо зярдояк арасель шождакс… Весе эрямонзо перть важодсь колхозсо, зярдояк эзь пеле стака роботадо, эзь вешне шожда кить-янт, зярдояк эзь кекшне ломань удалга. Анастасия Николаевна свал ульнесь видечинь кис аштиця ломанекс, эзь вечке нузякст ды манчиця ломанть. Кода стака тензэ илязо уле, ялатеке сон кудочинзэ свал кирдилинзе ваньксстэ, эсензэ тейтертненьгак тенень тонавтынзе. Кодат стакачить тензэ эзть савкшно печтямс-цидярдомс, ялатеке сон свал ульнесь лембе седей ломанекс.

Мельс ледстяви вейке истямо умонь тев, конадонть Мордовиянь келес весе марякшность, зярдо Парынзэле велень вадря модатнень максыксэлизь шабра велень Промзань колхозов, зярдо сынь кармасть явомо Парынзэле велень колхозстонть. Сестэ Парынзэлень эрицятне пурнасть велень промкс, косо парсте весе арсизь, штобу ансяк сонзэ – Анастасия Николаевнань – велень ниле цёратнень марто кучомс Москов ошов – Кремляв, тосто лезксэнь ды видечинь вешнеме… Нама, сестэ велень ломантне эзть маняво, кинь кучомс. Московсо Парынзэлень ломантне вастовкшность ды кортнесть мик Горбачёв марто тиринь велень модатнень коряс. Тосо сынст парсте вастызь ды лездасть муемс видечинть.

Секскак Парынзэле велень эрицятне течинь чис кирдить мельсэ-превсэ те вастовомадонть ёвтнеманть ды каштанчисэ аштить кувалманзо, лембе валсо эйсэнзэ свал ледстнить, эдь сестэ видечись изнясь!
Анастасия Николаевна эзь кадово ве ёнов сестэяк, зярдо велесэнть ушодсть церьковань строямо. Сынь вейсэ Ледяйкина Александра Михайловна марто якасть кудодо-кудос, энялдсть велень эрицятнень туртов максомс зярыя ярмакт церькованть строямс. Кода сонзэ панжизь, авась яксиль тов моравтомо, вайгелезэ ульнесь вельть паро!
Анастасия Николаевна 43 иесэ кадовсь довакс, ялатеке кедензэ эзинзе нолда. Сон кастсь вете тейтерть, конатнень весень тонавтневтинзе. Сынь получасть образования, лиссть паро ломанекс, венчнесть, эрьванть ней эсензэ семиязо. Анастасия Николаевна свал тонавтсь тейтертнень эрямо истя, штобу аволь визькс улевель ваномс ломантнень сельмс. Секскак, тонавтнемс ды важодемс лиякс тейтертненень ульнесь а кода. Зоя тейтерезэ ледстни: «Миненек аванок кортнесь, сонензэ ды сонзэ порань войнадо икельксэнь стака шкань ломантнень туртов ульнесь пек стака ды сынст ульнесь ансяк вейке праваст – ламо важодемс! Секс сонськак ульнесь пек тевень вечкиця – важодиця ды минек пельдеяк вешсь секень жо. Минек кудосо зярдояк арасельть верьга вайгельть пижнемкат, срамамкат, свал ульнесь вейке-вейкень ломанькс путома, вейке-вейкень чарькодема. Седе покштненень эрявсь лездамс вишкинетнень туртов, мельгаст ваномс, эдь аванок свал важодсь колхозсо, кудоютконь ды кардазонь тевтне эрявсть весе тейнемс, лездамс сырькаенек туртов».

Видеяк, Анастасия Николаевна ломанесь грамотноель, пек ламонь содыцяль. Сон, весе стакачитнень да ламо тевтнень лангс апак вано, мольсь икелев эрямонть марто вейсэ. Сон пек вечксь ды свал муиль шка ловномс книгат… Яла почтасто сёрмадстовтсь эрьва кодат газетат ды журналт, штобу седе келейстэ ды домкасто ламодо содамс, эрямодонть а кадовомс, парсте чарькодемс неень шкань эрямонть. Сон бажась содамс эрьва мезде: мезе моли минек Мордовиясо, районсонть, весе масторонть келес ды омбо масторсояк.

Мон монськак покш сюкпря ёвтан Пазонтень сень кисэ, што савкшнось те вадря ды превей аванть марто улемс содавиксэкс, мартонзо вастневемс ды седейшкава кортнемс эрямодо-аштемадо, ловнозь книгадо, школасо важодемадо. Видеяк, сонзэ марто вастовомадо ды кортнемадо мейле, мерят, потмозот ды седейзэть совильть ламо вийть ды покштояк покш шумбрачи…

Мила Богатова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».