Меельце шкасто пек ламолгадсть манчицятне, конатне тевс нолдыть эрьва кодат од ёнкст. Зярыя иеть уш якить-пакить телефон вельде манямонь од лувт.
Манчицятне гайневтить а содавикс номерстэ вейке-кавто секундат, штобу автоматической идентификациянь системась аволинзе редя сынст. Ёртсызь трубканть, ды ломанесь сеедьстэ гайневти тенст сонсь. Кода пачтясь «Касперскоень Лабораториянь» экспертэсь Сергей Голованов, эштё иеде икеле истят схемат арасельть.
Кода содатано, фильтрациянь систематне ванкшныть эрьва гайневтеманть: зярдо сынь теезь, номерэсь, кортамонь шкась, ули-арась те контактось пользователенть адресной книгасонть ды седе тов.
«Эрьва гайневтемадонть мейле системась веши ломаненть ёвтамс, арси-арась сон манчицятнень лангс. Бути те номерэсь тешкстазель кода спам, омбоцеде гайневтемстэ телефононть экранс лиси пачтямо – те спам», – толкови специалистэсь.
Васень шкастонть истят систематне ванныльть ансяк телефононтень гайневтиця номертнэнь, эйстэнзэ ютыцятнень жо – арась, эдь кияк эзь арсекшнеяк, што ломанесь сонсь карми гайневтеме манчицятненень.
«Мошенниктне жо те ёнксонть редизь, ней сынь гайневтить ды седе куроксто лоткавтсызь телефононть. Бути ломанесь те номерэнтень гайневти сонсь, манчицятне тевс нолдыть социальной инженериянь свалшкань ёнкстнэнь: ёвтыть эсь пряст банконь безопасностень службань важодицякс, снартнить саемс конфиденциальной максоматнень эли жо мерить ютавтомс ярмактнень манчицятнень счётнэс», – корты специалистэсь.
Теке марто ванстомс эсь прянть манчицятнеде ули ки. Васняяк, уледе седе ёроковокс!
Эрьвась соды, минек шкане манчицятненень персональной максоматнень содамга а эряви тевс нолдамс технической стака ёнкстнэнь, ломантне сынсь весементь пачтить. Социальной сеттнесэ эсь ланга домкасто ёвтнемга, минь кемтяно тёжат ломантненень, ансяк вана аволь весе юткстост вадрят.
Сетьстэ кортамсто профильсэнть мазый фотографиясь сеедьстэ кекши манчицянть. Секскак а содавикс ломантненень а эряви ёвтнемс эсь эрямонь сеть ёнкстнэнь, конат велявтыть берянекс эстенк. Свал кирдеде мельсэ, видео- ды аудиотрансляциятнень, истя жо кода сетьсэнть тынк сёрмадовкстнэнь, вансты зыянонь теицясь ды нолды сынст закононь коламонь тевтнесэ.
Илядо стувтне, тынк ланга личной информациянть кияк а ванстсы седе вадрясто эстеденк башка.
Састо! Илядо маняво!