«Защитники Отечества» фондонь Мордовиянь филиалонть участиянзо пингстэ республикасонть ютавтовсть ламо мероприятият, конатне алтавсть Отечествань ванстыцянь чинтень.
Истя, Кочкурова велесэ ютавтовсь ледстнема лазонь ды героень партань панжомась, конась алтавсь Виктор Листраткиннэнь. Службанзо сон ушодызе 2022 иень сёксня, а вана 2023 иень ноябрясто маштовсь.
Истя жо Орданьбуень райононь Тургеневань школасо ледстизь Александр Кипайкинэнь лемензэ. СВО-со служамсто сон маштовсь Спорное донецкой веленть кис тюремасонть. Тейтерезэ Анастасия тетядонзо-геройденть ловнось стихотворения.
Саранскоень 6-це № школасо панжсть мемориальной лаз икелень тонавтницятнень Александр Ведерниковонь, Евгений Паршинэнь ды Игорь Скачковонь лемс. Панжомадонть мейле школань музеень важодицятне пурнавозтненень ёвтнесть боецтнэнь эрямодост ды подвигдест.
Истя жо Сыре Шайговань Мельцанонь средней школасо пажсть героень парта тесэнь икелень тонавтницянть Андрей Илюнинэнь лемензэ ледстнемга.
Рузаевкань 9-це № школасо свалшкань ледстнемакс теизь шожда атлетикань коряс ветексть чемпиононть Дамир Морозкинэнь лемензэ. СВО-со служамо сон тусь эсензэ олясо. «Минь свал карматано ледстнеме Дамирэнь лемензэ, аволь ансяк кода спортсменэнть, истя жо Отечествань ванстыцянтькак», – мерсь школань прявтось Ирина Бодрова.
Кадошкинань райононь Латышовка велесэ мемориальной лазонь ды героень партань панжомась алтазель Ленар Поташовонь ледстнемга. Героенть фотографиянзо марто ледстнемань лазонть понгавтызь школань зданиянтень, конасонть сон тонавтнесь. Мероприятиянь участниктне героенть ледстизь чатьмонемань минутасо.
Алёна АРТЕМЬЕВА