Республикань школатнесэ ютавтовсь «Весточка на фронт» акциясь, конась алтавсь Тиринь масторонь ванстыцянь чинтень. Акциянь участникекс кармасть Мордовия Республикань «Юнармия» ВВПОД-нть юрс совицятне.

Февралень 21-це чистэ минь ульнинек инжекс 23-це гимназиясо, косо 8-це ды 11-це класстнэсэ тонавтницятне сёрмадсть СВО-нь таркатнесэ служицятненень сёрмат. Те акциясь истя жо ютавтовсь Тиринь масторонь чинтень.
– Минек юнармиянь отрядсонок весемезэ 50 ломанть. Отрядонтень совиця эйкакштнень седейсэ эри тиринь масторонтень покш вечкема. Секскак эйстэденек эрьвась чинек-венек анок лездамс лиятненень. Арсян, истят акциятне пек эрявить весе ломантненень, седеяк пек сетненень, кить неень шкасто ванстыть Россиянь сэтьмечинть, секс эйкакштнень кедьсэ сёрмадозь сёрматне ды артозь панжаткетне кармить эждеме седеест ды кепедеме изнямонтень мелест, – мерсь «Простор» юнармеецэнь отрядонь прявтось Сергей Васильевич Ромашкин.
Эрьва юнармеецэсь бажи пачтямс фронтов мелень кепедиця валонзо ды вадря ёжонзо. Истя, 10-це «А» классонь тонавтницясь Валентина Иняткина ёвтнесь, кодамо покш мель марто сон сёрмали неть сёрматнень: «Мон эрьва валонтень путан весе седеень лембенть. Масторонок ванстыцятненень неень шкасто пек стака. Сёрмадомсто яла арсян, паряк, монь сёрмам киньгак ды зярскак витьсы мелензэ».

Алёна Артемьева