«Раськень озкс» регионъютконь национально-фольклорной кенярксчись тедеде ютавтови Покш Игнатовань райононь Чукало велесэ июлень 9-це чистэ.

Те – эрзянь раськень кезэрень коень кенярксчи. 2022 иень «Раськень озкс» национально-фольклорной покш чинтень сонзэ ютавтыцятне совавтыть ламо од. Тесэ аволь ансяк невтевить раськетнень лиятнень ёнов а молиця койтне-кирдатне, истя жо од ломанень шкинемань ёнкстнэ, конатне сюлмавозь фольклоронть марто.

Национально-фольклорной кенярксчинтень арсевсь мельстуиця программа: кирвазтеви Штатолось, «Мааронть» перька сокави модась, невтеви «Явление великих» театрализованной представлениясь, ютавтовить «Тюштянь налксемат», пурнави раськень ярсамопелень выставка ды, нама, весе андовить тантей ямдо. «Раськень озкссонть» кармить важодеме эрьва кодат площадкат: декоративно-прикладной творчествань выставкась, раськень оршамопелень невтемась, эйкакштнень ды од ломантнень туртов интерактивной площадкатне, фотозонась ды ламо лия мезесь.

Раськень моронь вечкицятненень тееви морамонь пакся, косо ютавтови «Пересечение культур» раськень творчествань ды ремеслань республиканской фестивалесь. Те площадканть лангсо невтьсызь ёрокчист аволь ансяк Мордовиянь самодеятельной коллективтне, истя жо Россиянь лия регионтнэва эриця эрзянь ансамблятне. Тесэ невтневить раськень художественной промыслань тейневкстнэ: мазылгавтомапельть, сувенирт, чувтосто керсевкст, сёвоньстэ кедьгеть… Ютавтовить мастер-класст гончаронь искусстванть, илевсто кодамонть, чувтосто керсеманть, кружовань кодамонь коряс.
«Раськень озксонть» лиятнень ёнов амолемачизэ сеньсэ, тесэ эрьва ломанесь, сонськак теде апак сода, тееви кенярксчинь участникекс.
Мероприятиясь ушодови 10.00 чассто.

«Республиканский Дом
народного творчества» ГБУК-сь