Ютазь оймсема читнестэ Мордовиясо келейстэ тешкстызь Весероссиянь велень XII Сабантуенть. Те мазый кенярксчись саи башка тарка Россиянь раськетнень культурань сюпавчитнень ютксо. Мордовиясо Сабантуесь свал кандовиль раськень прявт кенярксчитнень юткс ды пурныль инжеть масторонь ламот регионтнэстэ.
Нейгак минек республикав сакшность официальной делегацият Россиянь Федерациянь 24 субъекттнэстэ: Ульяновскоень, Оренбургскоень, Пензань, Астраханень, Самарань, Нижней Новгородонь, Новосибирскоень, Челябинскоень, Тюменень, Ростовонь областтнестэ, Башкортостансто, Чувашиясто, Марий Элстэ, Удмуртиясто, Бурятиясто, Пермень крайстэ ды лия регионтнэстэ. Сехте покш делегациясь – Татарстан Республикасто.
Кенярксчинь почётной инжекс кармасть мусульманской религиозной лидертнэ, общественной вейсэндявкстнэнь ды национально-культурной автономиятнень прявттнэ, содавикс спортсментнэ, искусствасо важодицятне ды шкинемань коллективтне.
Мероприятиятне, конатне алтавсть сокань кенярксчинть тешкстамонтень, ушодовсть июлень 1-це чистэ Лямбирень Центральной площадьсэнть. Прявт мероприятиятне жо ютасть июлень 2-це чистэ Аксёнова велесэнть. Весе инжетнень туртов арсезель пек сюпав культурной программа, конась таргавсь валскестэ саезь позда чокшнес. Тесэ ульнесть концертт, выставкат, киштемань флешмобт, раськень спортонь ёнкстнэнь коряс спартакиада, «Корэш» Весероссиянь пелькстамотне. Весе инжетнень туртов важодсь велень хозяйствань техникань выставкась, невтевсь Трактор-шоу. Эрьва сыцясь содавтовсь ламот раськетнень лия ёнов а молиця культураст марто, каванявсь раськень ярсамопельтнесэ.
Пек мельстуицякс весень туртов кармась раськень промыслатнень ды ремеслатнень выставкась, косо республикань эрьва районось ды Татарстанонь районтнэ невтизь эсь кедьчелькев ломантнень ёрокчист, невтизь эсь буень сюпавчитнень ды эрямонь койтнень-кирдатнень.
Сабантуенть лувсо минек республикасо васенцеде ютавтовсть лишмень спортонь пелькстамот. Тень туртов Аксёновасо натой теезель ипподром.
Вейсэндявомань ды ялгаксчинь кенярксчи
Аштемковонь 2-це чистэ Лямбирь ёнксонь Аксёнова велентень Весероссиянь велень XII Сабантуенть панжомо сакшность Мордовия Республикань Прявтось Артём Здунов, Татарстан Республикань Президентэсь Рустам Минниханов, Астраханень областень Губернаторонь Администрациянь руководителесь Павел Паутов. Почетонь инжетне теевсть содавиксэкс Мордовиянь лиятнень ёнов а молиця культуранть, сонзэ койтнень-кирдатнень ды ярсамопельтнень марто, ваннызь этновелиненть, косо невтезельть Мордовиянь ды Татарстанонь районтнэнь промыслатне. Артём Здуновнень ёвтасть мель налксемс «Порксак чакшке» татаронь раськень налксемасонть. Ловови, бути налксицясь сюлмазь сельме марто порксасы чакшкенть, сестэ сонзэ топавтови салавань мелезэ. Мордовиянь Прявтось те тевенть вадрясто топавтызе.
Театрань представлениясонть, конась невтезель инжетненень Сабантуень фестивалень прявт площадкасонть, ёвтнесть Россиясо ды Мордовиясо татаронь раськень историядонть.
Сабантуень панжомань торжественной церемониясонть ловнозельть РФ-нь Правительствань Председателень полавтыцянть Марат Хуснуллинэнь ды Равчирень федеральной округсо Россиянь Федерациянь Президентэнь полномочной представителенть Игорь Комаровонь пельде поздоровонь телеграмматне.
Татарстанонь Президентэсь Рустам Минниханов, Сабантуень весе участниктненень ды инжетненень пшкадемстэ, тешкстызе те кенярксчинть содавиксчинзэ: «Сабантуесь келейстэ тешкстави Россиянь 58 регионтнэсэ ды 35 мастортнэсэ, – мерсь сон. – Те пек мазый кенярксчи. Течи тешкстатано сонзэ Мордовиянь моданть лангсо, сюкпря республикань Прявтонтень, Мордовиянь ды Татарстанонь командатненень вадрясто анокстазь Сабантуенть кисэ. Пек паро тарка ды пек паро ломанть!».
Мордовиянь Прявтось инжетненень пшкадекшнесь рузонь, эрзянь, мокшонь, татаронь кельтнесэ. Республикань руководителесь башка тешкстызе, Мордовиясо Весероссиянь Сабантуесь юты Россиянь раськетнень культурань сюпавчинь иестэнть ды Волжской Булгариясо исламонь саемань 1100 иетнень тешкстамонь иестэнть.
«Сюкпря, кемиде тенек ютавтомс вейсэндявомань ды ялгаксчинь те кенярксчинть, – мерсь Артём Здунов. – Мордовиянь модась макссь минек масторонтень ламо содавикс просветительть, Советской Союзонь Геройть, конат лиссть тестэ ды славизь ды славить минек тиринь моданть. Покш уцяска, зярдо тонеть сыть тонавтыцят, превс путыцят, лездыть ды максыть превть. Сехте прявтось – минь вейсэ, минь – важодеме вечкиця ломанть, весемесь минек лиси!».
Мордовиясо эрить 40 тёжадо ламо татарт, сынь теить покш путовкс региононь виевгавтомантень эсест важодемасост ды тиринь модантень вечкемасост. Минек республикась макссь татаронь культурантень истят содавикс сёрмадейть, кода Хади Такташ, Шариф Камал, Абдрахман Абсалямов. Мордовиянть ды Татарстанонть сюлми содавикс летчикенть, Советской Союзонь Героенть, Мордовиянь ды Казань ошонь Почетной гражданинэнть Михаил Девятаевень лемесь. Пингеде-пингес маласо эриця рузтнэ, татартнэ, эрзятне, мокшотне вейсэ печтить кеняркстнэнь ды ризкстнэнь, саить вейсэнь изнявкст ды кенярксчитненьгак тешкстыть вейсэ. Эдь те ламо раськетнень вейсэндявомасонть – минек виесь, минек ине масторонь виесь.
2023 иестэ Весероссиянь велень Сабантуесь ютавтови Астраханьсэ, Мордовиянь Прявтось максызе кенярксчинь эстафетанть Астраханень областень Администрациянь руководителентень Павел Паутовнень.
«Аштян седейшкавань мельспаросо сень лангс ванозь, кода келейстэ ды мазыйстэ Мордовиясь тешксты Сабантуенть, – мерсь сон. – Течи седеяк эрявикстэ гайгить минек Конституциянь валтнэ Россиянь Федерациянь вейкине ламо раськень эрицятнеде, конат ванстыть эсест моданть, гражданской мирэнть, государственной вейкетьксчинть. Сабантуесь – минек вейсэнь кенярксчи, тердтяно весень 2023 иестэ Астраханень моданть лангс».
Лишмень спортонь пелькстамот
Мордовиянь Прявтонть казнензэ лангс рысистой породань лишметнень финалонь ардтнемасонть эсь ёрокчист невтизь Чувашиясто, Татарстансто, Пензань областтнестэ, истя жо минек республикасто командатне. 1600 метрас ардтнемасонть изнясь Чувашиясто лишме лангсо ардтницясь Инсур Галлимзянов. Изницянтень казненть – кубоконть ды автомобиленть – максызь Мордовиянь Прявтось ды Татарстанонь Президентэсь.
Сабантуень эште вейке редявикс площадкатнестэ вейкесь – каркс лангсо бороцямонь коряс пелькстамотне – корэш. Сехте виев цёратне пурнавсть тей. Изницякс кармась Татарстанонь спортсменэсь, титулованной бороцицясь Раиль Нургалиев. Пелькстамотнес якасть Артём Здунов ды Рустам Минниханов.
Покш инжетне истя жо ваннызь Татарстан Республикань Кукморской райононь подворьянть. Самай те муниципалитетэсь кемекстазь Татарстанонть пельде кода Весероссиянь велень Сабантуень анокстыця.