Кизэсь – вечкевикс оймсемань шка. Эйкакштнень те шкане эрсить каникулат, важодиця ломантнень – ковонь олячи (отпуск). Ломантне кочкасызь те иень сехте лембе ды мазый шканть аволь ансяк важодемадо мейле рунгонь-санонь лекстямонть туртов, зяро оймевиень пурнамонть кис.
Ды тень коряс эрьвась кочки эстензэ куш кодамо оймсема: кие пулев ошсто арды тиринь велев ванькс коштто лексеме, вирьга-паксява ютамо – кстыень-пангонь пурнамо; кие пачкоди иневеденть чиресэ пулькамо, лембе масторонь пултый чисэнть рунгонь-киськень калямо, тосонь эмежде ярсамо… Лиятне, кода Наталья Ивановна Ерминаяк эсь кудораськензэ марто, вечкить сэрей пандот, конат эсь певтеме мазычисэст ды аёвтавишка сэрейчисэст кенярдовтыть сельметь, кепедить потмоёжо, чаракавтыть превть… Весе те мазычинть Натальянень эряви аволь ансяк неемс, истя жо кенеремс тееме ламо мазый фотографият, конат кувать кармить кенярдовтомо ойменть сеть ледстнематнесэ.
Наталья чачсь-кассь Дубёнкабуень Кобале велесэ 1977 иестэ. Кода содатано, те велесэнть эрясть эрзянь содавикс поэтэсь Александр Арапов ды сёрмадыцясь Леонид Седойкин ды лиссть лия содавикс лемть. Школанть прядомадо мейле тонавтнесь М. Е. Евсевьев лемсэ пединститутонь (ней – университет) филологиянь факультетсэ. А умок прядсь аспирантура, кармась филологиянь наукань кандидатокс. Ней зярс важоди «РСТЦ «Старт» МР-нь ГАУ-со администраторокс.
Фотографиясь Натальянень теевсь вечкема тевекс студентэкс улемстэ. А вана 2018 иестэ сон прядсь фотошкола. Сестэ кандтнесь мартонзо «Зенит» фотоаппаратонть, тейнесь художественно-постановочной фотографият. Ансяк эйсэнзэ ламо фотот а тееват – курок прядовиль плёнкась. Мейле рамась цифровой «Olympus», седе тов – «Soni». Натальянь ледстнеманзо коряс, эштё Леонид Седойкин кочкакшнось зярыя фотографиянзо «Сяткос». Сестэ журналонть прявт редакторокс ульнесь Александр Арапов.
Наталья истя жо тонавтнесь лиянь пельдеяк, зярдо ваннось Интернетстэ важодевксэст, арсесь, а вана кода бу сон тень теевлизе... Истя аламонь-аламонь кассь ёрокчизэ фотографиянь тевсэнть.
Тедеде июльстэ семиянек ардтнесть Кавказов. Минек певтеме масторсонок улить ламо республикат, конатнень эрямост пек явови лиятнень эйстэ. Эряви тешкстамс, эрьва оймсема тарканть Наталья кочкси сонсь: кувать вешни Интернетстэ тарканть, мейле ушоды покш килангов анокстамонть. Те иестэ, кода икелеяк, ардтнесть эсь машинасост ниленест: сонсь, мирдезэ Константин Юрьевич, кона важоди отоларингологокс КИМ-сэ, Юлия тейтерезэ (тонавтни Мединститутсо, прядсь 3-це курс) ды Илья цёразо (прядсь Саранскоень 17-це школань 10-це класс). Кодамо ульнесь кинь печтямось ды мезе од эсь туртов несть Кавказонь модатнестэ, эли седе паро меремс, пандотнень ютксто, Наталья ёвтнизе миненек.
– Наталья, кода ушодовсь ардоманк, мезе неиде-редиде ардомсто?
– Васня сыргинек Астраханенть пачк. Ардомсто сядодо ламо вайгельбень перть перьканок ульнесь коське степь. Нать, пиземетне тува допрок эзть ульне, мерят, модась чентязь – ансяк тюжа-ожо тюст, конатне налкставтсть вановтонок. Астраханев ломантне седе пек ардыть калонь кундамо, секскак вастневсть ламо палаткат. Тосонь калонь рынкантень совсинек миньгак. Мейле совинек Сарай-Бату Сырнень Ордань шкань прявт ошонтень, конань панжизь витнемадо-одкстомтомадо мейле. Ней те покш музей-ош. Абунгавтымизь се, стенатнень теизь истя, кодат ульнесть тёжа иеде икеле, сёвоньстэ, алашань навозсто, тарадсто ды олгосто. Весе те човорявксось «чапаськали» модасо чувозь домка латкосо, теде мейле эйстэнзэ валовить стенатне. Тешкстама, од стявтовкстнэнь перька истямо «стройматериалдонть» срады апаро чине. Ды секе-тев моли певтеме стройка – стявтовить лия объектт, мерят, те – певтеме строявиця музей панжадо менеленть ало. Кезэрень пингень сёвонень чакштне ды чувтонь чарытне сеске тусть минек мельс ды, нама, теинек мартост ламо фотографият. Музеесь покш киденть ашти пек ве ёно, ансяк ялатеке ломантне тов ардыть чуваронь кинть ланга стявтозь тешкстнэнь коряс. Билетэнть питнезэ 450 целковойть. Нама, питней, а эйкакштненень, а тонавтницятненень арасть кодаткак льготат.
– Кодат эрямо лувонь башка ёнкст улить Кавказсо?
– Мезе дивавтымизь, Дагестансо весе туристтнэ ветить пряст тосонь раськенть вешеманзо ды коензэ-кирданзо коряс. Кодамо пси илязо уле, весе якасть кувака ожа палясо. Киньгак а неят нурька понкссо ды панжадо лавтов марто. Миньгак кекшнинек шортанок, таргинек кувака платият ды истя яксинек ошканть. Лиякс ломань икеле прят а невтьсак, сеске кармить кевкстемат. Юля тейтерем, бути оршиль цють кумажа верьга юбка, сеске энялдыль: «Авай, сюлмак верьга тень парео». Лисни, пильгенек кекшнинек целанек. Бути кияк сась нурька топиксэ, верьга каи шожда панар. Натой Дербентсэяк, меремс, истямо покш ошсо, вейкеяк ломань эзинек нее нурька понкссо. Цёранек-аванек якить ансяк келей понкссо ды кувака палясо. Аватнень прясо пацят, цёратне жо весе вейкень пес сакало мартот. А мезть кортамс купальник лангаяк – иневеденть чиресэ арась вейкеяк экшелиця, секскак миньгак тосо вестькак эзинек экшеля. Ведьсэнть пулькасть-экшелясть ансяк эйкакшт. Вакссост аватне якасть паранджасо, конань натой ведь маласояк эзизь кепсе а начтомга. Кадык алксозо лоподи, ансяк пильгеть невтемс ве ваксскак а мереви. Лиясто кумажа видьс совить ведентень, яксить ведьга, паля алксост кода улить, истя кадовитькак апак кепеде.
Эштё абунгавтымизь истямо тев. Весе Махачкаланть келес, Дагестанонь прявт ошканть, олячисэ якить скалт. Саемга, ашти меньгак «бутик», ды сонзэ вакссо порни тикшинеде ваз марто скал. Китнень чирева, микшнема центратнесэ – эрьва косо певтеме скалт. Секскак цецянь пандяст арасть, чарькодеви – скалтнэ порнесызь. Теке марто арасть кодаткак озавтовксост. Неяви, ошось эри аволь сюпавсто. Ламо кудотне стявтозь ансяк пелевидьс ды кадозь. Аштить ачарькодевикс серой зданият, некак, ракушечникть эйстэдест мерить. Мейле, кода сыргинек Чечняв, сеске неинек, тосо аштить вадря кудот. А вана Дагестансо ламо рудаз, антисанитария, эрьва кодамо шукшт ёртнезь аволь ансяк моданть ланга, истя жо иневедьсэнтькак. Арась канализациясткак, рудазов ведесь туи тозонь жо. Ве валсо, тосо кияк а ваны пертьпельксэнь ваньксчинть мельга. Вейкесь, мезень кисэ эряви ардомс Дагестанов, те мазый пандотне. Мон кавксоксть ардтнинь Кавказов (Пятигорскоев, Карачаево-Черкесияв, Кабардино-Балкарияв), а вана истят мазычить арасть, кода тосо. А ёвтавикс мазычист сеске салызь седеем! Те весемесь седеяк пек неяви Гамсутль ёмазь ошонть маласо. Паряк, ваксозост путовить ансяк Грузиянь пандотне. Пек мазыйть! Ды мезе эштё дивавтымизь, верев кузят-кузят – эрьва косо аштить велинеть. Кузят седеяк верев, арсят, тесэ уш кияк а карми эрямо, ансяк таго аштить кудынеть, ды мик истя ламо, кода минек райцентратнесэ. Аштить вадря лавкат, кой-конатне натой кавто этажс. Ве валсо, эрицятнеде пек ламо. Ламо кудотнень вакссо аштить терраскат, конат копачазь мазый пиже тюсонь тикшесэ. Нать, тосо секе-тев валыть пиземеть, секскак истя виевстэ ды мазыйстэ невтить касовкстнэ. Лия виде таркатнева ардомсто арасть зняро эрицят, зяро пандо чаматнесэ. Мекс сынь тосо эрить, эзинек чарькоде, зярдо Дагестансо эрямонть туртов виде таркаткак кочкавить-муевить.
Китне пандо чиретнева пек вадрят. Лавкатнеде пек ламо, питнетнеяк некеть, кода минек. Эрьва косо улить «Магнитт», «Пятёрочкат».
– Кодамо ярсамопель варчниде тосо васенцеде?
– Рамсинек лембе ёнксонь тантейкат: эрьва тюсонь медень пахлава, варчнинек чурчхела, костязь хурмат, конат пек тусть мелезэнек.
– Ёвтнеде тосонь достопримечательносттнеде.
– Сарыкум барханось ловови Европасо сехте покш чуваронь пандокс. Те истя жо менель ало панжадо музей, конантень теезь ламо кузтемат. Эряви пек васов куземс ды се пандо прястонть неяви весе Махачкалась. Сехте тёкшсонть пувить коське вармат, чуварось чави пильге ланга, мезде пильге киськесь пек сэреди. Ды мезесь дивавты, истямо таркасо натой кассть валдо-якстере цецят! Секскак Газмановонь моросо валтнэ «На барханах цветы не растут…», лисни, а видеть (мизолды). Неяви, кияк эзинзе озавто, сынсь касыть пандо чиреванть.
Метьказтнэяк тува чийнить допрок ожот, чуваронть тюссо, мейсэ явовить минек тюжатнень эйстэ. Ёзнэтне истят жо, кода минек. Неинек шахматной гадюка. Цёрам редизе васенцекс, монень мери: «Авай, ансяк иля тандадо, иля пижне, вакссот кев лангсо ашти гуй». Ды сон истя ашти, натой а содавияк кевенть лангсто. Кевкстнян ломантнень, мезе сон тесэ теи. Келя, кевтнень юткова чийнить чеерть, кирнявтнить ватракшт, сон мельгаст охоти…
Мелезэнек тусь Дербентэнь Нарын-Кала цитаделесь, кона сови ЮНЕСКО-нь весемирэнь тевкадовксонтень. Стявтозель минек эрань котоце иестэ иневеденть маласо пек сэрей таркасо. Те Дербентэнь крепостенть пелькс, Каспиень ортат, конат пекстыльть ки Персиянтень.
Сулакский каньонов ардтнинек, тосонь ведесь мазый, менелень тюссо. Перьканзо аштить поронь пандот, конатне теить веденть истямо мазыекс. Пек мазый фотографиятне лиссть верде снимамсто.
Мода алгань лембе Салтинский ведьбрамованть якамсто максыть резинань кемть, конатнесэ яксинек ведьбрамонть малава. Эйзэнзэ молемс эряви ущельява.
Грознойсэ истя жо весе оршнить раськень койтнень коряс. Ломантне якить кувака оршамосо. Прявт достопримечательностесь – Сердце Матери мечетесь – ловови туристэнь таркакс. Тосо аватне озныть цёратнеде башка. Ансяк эрьвантень эрявить каямс карсемапельтнень. Лангозот оршавтыть покш, кувака ожа, капюшон марто оршамо ды ансяк теде мейле мереви совамс мечетентень ды варштамс озныцятнень лангс.
Пятигорскойсэ ютынек М. Ю. Лермонтовонь таркатнева, ванкшнынек кудынензэ, дуэлень тарканть. Истя жо ульнинек «Провалсо», косо Остап Бендер микшнесь билетт. Экшелинек сероводородто пештязь парьсэ, косо температурась 50 градуст, 40, 36 ды седе тов. Те ведесь чави мода потсто. Истя жо симинек эрьва кодамо ведь, кода кортыть тосонь эрицятне: «Это целебная вода из рук матушки-природы».
Кадык ульниньгак кавксоксть Пятигорскойсэ, ялатеке эштёяк сон терди ютамо теке таркатнева. Зяроксть тей иля са, ялатеке свал ули мезе ваномс.
Мекев ардынек Элистанть трокс. Велетне тосо, эряви меремс, кода минек Кобалесь, мейсэяк а явовить, кудотнеяк истят. Калмыктне явовить эйстэнек озномань коест коряс, чамань кикстнэнь коряскак. Буддань сырнень обителентень эзинек совсе, ансяк ве ёндо сниминек мазый храмонть вакссо.
Кудов кись таго ютась степь ланга, ансяк ней сынь ульнесть пижеть, аволь кода Астраханьсэ, допрок коськезь тюжат. Неяви, Калмыкиясо пиземетне ульнесть седе сеедьстэ.
– Мезесь седе вечкеви тенк: иневедесь эли пандотне?
– Нама, пандотне! Зяро вий максыть ойментень, зяро мазычи неить сельметне, те кодамояк валсо а ёвтави! Весе килангонь стакачитнень стувтсыть лангозост ванозь. Рунгоськак шождалгады, ёжоськак витеви! Ансяк верень алкине давления марто ломантненень тосо стака – карми сэредеме прясь. Ды ялатеке те монь а тандавты ды а лоткавты. Кода ёвтазь Владимир Высоцкиень моросонть: «…Лучше гор могут быть только горы, на которых ещё не бывал!»
Марина Агафонова