Чаунзань райононь Покш Маризь велень Культурань кудонь вальмалксось ашти цеця потсо. Кодат ансяк тесэ а касыть! Мазылгавтызь весе пертьпельксэнть, кецявтыть тия эрьва ютыцянть. Сынст озавтызь ды мельгаст якить велень культурань важодицятне.
Аволь умок пачколинек тенст инжекс, аватне ёвтнизь эрямост, кенярксост ды мелявксост. Сынь весе панжадо седейть, тиринь келенть ды культуранть кисэ аштицят – алкуксонь велень ават: простойть, мизолдыцят, ламо трудицят.
Ней велень Культурань кудось ашти администрациясо. Тесэ жо библиотекаськак. Кинь трокс аштиця клубонь зданиясь пек таштомсь, латось лондадсь, пецькатне а маштовить. Секскак 2018 иестэ савсь ютамс тей. «Од клубонть» мазылгавтомс-паролгавтомс лездасть веленек. Витнизь-петнизь, рамасть од занавескат, аппаратура, вальма лангсо кастыть цецят. Лия ёндо лезкс костояк эзь учово. Ней тесэ ули сцена, озамо таркат, зал, косо ютавтовить эрьва кодат кенярксчить ды вастовомат. Од ломантнень туртов – киштемкат.
1998 иестэ саезь Культурань кудонь прявтокс важоди Елена Баранова. Авась чачсь теке велесэнть. Школань прядомадо мейле, 1993–1996 иетнестэ, тонавтнесь Саранскоень культпросветучилищасо покш мероприятиянь режиссёрокс. Важодеме ушодсь Чаунзань райононь Сырятина велесэ клубонь прявтокс. Мейле сась эсензэ велев.
Покш Маризь велень эрицятне мельспаросо аштить «Килейне» фольклорной ансамбляст кувалма. Сон теевсь 1973 иестэ. Елена Григорьевнань кедьсэ альбом, косо седейшкава ванстови ансамблянь историясь, улить васенце морыцятнень фотографияст, кой-кона аватне умок уш арасть ютксост.
– «Килейне» ансамблянть пурнызе Анастасия Ивановна Капитанова, сон ульнесь моронь рангстыця. Васенце составстонть кадовсть пек аламо. Сынст ютксо Т. И. Сорокина, Н. А. Низовкина. 1993 иестэ сынь натой якасть морамо Венгрияв. Ней минек коллективсэ морсить кавксо ават. Кие роботы, кие пенсиясо. Минек репертуарсо эрзянь кезэрень ды неень шкань морот. Вечксынек моротнень «Вай, луга, луга», «Ёмась од душманось» ды лиятнень. Эрьва концерттэ икеле ютавттано репетицият. Бути уш анокстатано кодамояк кенярксчис – сестэ ковдо икеле ушодтано пурнавомо. Эрьва ковсто ютавттано мезеяк. Теде башка, улить кенярксчить: Од ие, февралень 23-це чись, мартонь 8-це чись, Мастя, Изнямонь чись, Тундонь ильтямот, Сыре ломанень ковось ды седе тов. Сы недлясто тейтяно «Од ломанень бум» – одтнэ кармить морамо морот. Велень ломантне свал сакшныть покш читнес, вечкеви тенст, миненек жо мельспаро каземс тенст паро ёжо. Од ломантне вечксызь дискотекатнень, – ёвтни Елена Григорьевна.
Аватне морсить эштё «Рябинушка» рузонь ансамблясо. Лиякс меремс, «Килейненть» ды «Рябинушканть» вейке составост. Улить оршамопелень зярыя комплектэст: эрзянь, рузонь, палят, сарафант. Эрьва кенярксчис оршнить лиякс. Эрзянь оршамопельтнень умок уш рамакшнынзе тенст велень администрациясь, лиятнень лездасть рамамс спонсортнэ Владимир Соловьев ды Евгений Куприянов. Аватне ёвтыть тенст ламо сюкпрянь валт.
Течи «Килейнесэ» морсить Л.Н. Чичамкина, Л. Н. Белякова, Н.И. Мясникова, Е. В. Козлова, Т.В. Зотова, Г. Н. Видяйкина, Н. И. Платонова, В. Н. Курганова ды Е. Г. Баранова. Ськамост морсеме сцена лангс лиснить Любовь Чичамкина, Любовь Белякова, Надежда Платонова. Кода корты Елена Григорьевна, аватнень пурнамс аволь стака, ансяк мерят самс, сеске чиить, кадсызь весе тевест. А эдь эрьванть кудозо, семиязо, важодемазо, пирезэ. Ансамблясонть алкуксонь ялгаксчи, вейкень-вейкень чарькодема. Сынь ёвтнесызь кенярксост ды апарост. Бажить лездамс эсь ютковаст. Аватне весе вейсэ артызь Ине Отечественной войнасо чавовозтненень памятникенть, пурнасть калмолангонь паролгавтомс ярмакт. Паро валсо ледстнить Владимир Николаевич Чичамкинэнь. Сон сакшныль тенст гармониясо седямо, лездыль ютавтомс кенярксчить. Мелят апак учне 66 иесэ тусь эрямосто. Лия гармонист велесэнть арась.
Пек вечки ансамблясь ардтнеме морамо лия велева. Аволь умок якасть Мокшалеев, косо ютась «Прякань чи». Икеле ламоксть ульнесть «Шумбрат, Мордовия!» раськень творчествань республикань фестивальсэ, морсесть покш сцена лангсо. Пандемиянть самонзо марто васов тердтнемест лоткасть. Эрьва ие Чаунзасо юты «Родные напевы» морамонь фестивалесь, тов сынь свал пачколить.
Тедедень майстэ ансамблянтень сась од морсиця. Галина Николаевна Видяйкина теке велень. Школань прядомадо мейле тукшнось Саранскоев. 33 иеть роботась «Лисма» заводсо, лиссь пенсияв ды сась эрямо велев.
– Вечкан морот. Морсинь школасо, хорсо. Сюкпря аватненень, саимизь эсест юткс, састыне тонавтнян весе моротнень, – корты Галина Видяйкина.
А вана Любовь Николаевна Чичамкина морси 43 иеть! Васня яксесь рузонь ансамбляв, мейле кармась морсеме «Килейнесэ».
– Морсицяль авам ды монгак, нать, туинь сонзэ ёнов. Васенце классо тонавтнемстэ саезь кода кармавтымизь морамо, весе школань иетнень морсинь. Ледстнян, олимпиадав-ков усксесть эйсэнек районов тракторсо, олгот ацатано ды ардтано. Мартонок кудосто максыльть ловсо ды сюкорот ярсамс. Малав колмо иеть тонавтнинь Рузаевкань техникумсо стыцякс. Аламос роботынь райононь КБО-со, пальтот стынь. Вастовинь вечкевикс ломанем марто ды лисинь мирденень. 1981 иестэ карминь роботамо Покш Маризь велень «Рассвет» колхозсо скалонь потявтыцякс. Сеске макссть колмо нупальс квартира. Ламо од ломанть ульнесть, весе роботасть колхозсо. Председателекс важодсь И. С. Видяйкин, пароль ломанесь, мейле ульцянокак лемдизь сонзэ лемсэ. Се шкане ульнесь покш ферма, косо трясть-кастсть 1100 скалт ды букат. 800 скалтнэ ульнесть потявтовицят. Кедьсэ эзинек потявто, ладязельть аппаратт. Те шкас роботан скалонь потявтыцякс. Ней уш «Хорошее дело» агрогруппань ловсонь комплекссэ, конась ашти веленек вакссо. Кодат технологият тенек састь, а мезть кортамс! Ведрасо ведь, ловсо, кедьсэ тикшеть-мезть кандтнемс а эряви. Весе те тееви кнопкатнень вельде. Лепштясак, неяви скалонь номерэсь, зяро максы ловсо ды седе тов. Нама, ней седе шождалгадсь тевенек. Омбо велев ардтнемс а эряви, весе теске.
Морось – седеень витема. Пингем перть морсян. Ледстнян, валске марто ардтано фермав, весе удыть, минь – моратано, паксясто мекев сатано таго моро марто. Икеле пек весёласто эринек, а ней ве моро костояк а марят, – кортась Любовь Николаевна.
Аванть кавто эйкакшонзо, вете нуцьканзо. Весе сынь эрить Покш Маризь велесэ, ковгак васов эзть тукшно. Эрить тетяст ды аваст чачома кудонь юрттнэсэ (покштяст-бабаст кудотнень таркасо), козонь стявтсть од кудот.
Культурань кудонь сехте покш мелявксось – каладозь кузтембрятне. Сынст умок эрявить витнемс. Аватне ризныть, прындерят – весе порксават-яжават. Ансяк косто саемс ярмакт паролгавтомантень, кинень пшкадемс, а содыть. Покш Маризь велесь – эриця. Улить эйдень кужо, школа, почта, лавкат. Культурань эрямоськак лаказь лаки, аволь кода республикань лия таркатнесэ. Тесэ эрить ломанть, конат пиить-палыть чачома модаст кисэ, ды кадык истя ули свал!
Татьяна Маторкина
Ней велень Культурань кудось ашти администрациясо. Тесэ жо библиотекаськак. Кинь трокс аштиця клубонь зданиясь пек таштомсь, латось лондадсь, пецькатне а маштовить. Секскак 2018 иестэ савсь ютамс тей. «Од клубонть» мазылгавтомс-паролгавтомс лездасть веленек. Витнизь-петнизь, рамасть од занавескат, аппаратура, вальма лангсо кастыть цецят. Лия ёндо лезкс костояк эзь учово. Ней тесэ ули сцена, озамо таркат, зал, косо ютавтовить эрьва кодат кенярксчить ды вастовомат. Од ломантнень туртов – киштемкат.
1998 иестэ саезь Культурань кудонь прявтокс важоди Елена Баранова. Авась чачсь теке велесэнть. Школань прядомадо мейле, 1993–1996 иетнестэ, тонавтнесь Саранскоень культпросветучилищасо покш мероприятиянь режиссёрокс. Важодеме ушодсь Чаунзань райононь Сырятина велесэ клубонь прявтокс. Мейле сась эсензэ велев.
Покш Маризь велень эрицятне мельспаросо аштить «Килейне» фольклорной ансамбляст кувалма. Сон теевсь 1973 иестэ. Елена Григорьевнань кедьсэ альбом, косо седейшкава ванстови ансамблянь историясь, улить васенце морыцятнень фотографияст, кой-кона аватне умок уш арасть ютксост.
– «Килейне» ансамблянть пурнызе Анастасия Ивановна Капитанова, сон ульнесь моронь рангстыця. Васенце составстонть кадовсть пек аламо. Сынст ютксо Т. И. Сорокина, Н. А. Низовкина. 1993 иестэ сынь натой якасть морамо Венгрияв. Ней минек коллективсэ морсить кавксо ават. Кие роботы, кие пенсиясо. Минек репертуарсо эрзянь кезэрень ды неень шкань морот. Вечксынек моротнень «Вай, луга, луга», «Ёмась од душманось» ды лиятнень. Эрьва концерттэ икеле ютавттано репетицият. Бути уш анокстатано кодамояк кенярксчис – сестэ ковдо икеле ушодтано пурнавомо. Эрьва ковсто ютавттано мезеяк. Теде башка, улить кенярксчить: Од ие, февралень 23-це чись, мартонь 8-це чись, Мастя, Изнямонь чись, Тундонь ильтямот, Сыре ломанень ковось ды седе тов. Сы недлясто тейтяно «Од ломанень бум» – одтнэ кармить морамо морот. Велень ломантне свал сакшныть покш читнес, вечкеви тенст, миненек жо мельспаро каземс тенст паро ёжо. Од ломантне вечксызь дискотекатнень, – ёвтни Елена Григорьевна.
Аватне морсить эштё «Рябинушка» рузонь ансамблясо. Лиякс меремс, «Килейненть» ды «Рябинушканть» вейке составост. Улить оршамопелень зярыя комплектэст: эрзянь, рузонь, палят, сарафант. Эрьва кенярксчис оршнить лиякс. Эрзянь оршамопельтнень умок уш рамакшнынзе тенст велень администрациясь, лиятнень лездасть рамамс спонсортнэ Владимир Соловьев ды Евгений Куприянов. Аватне ёвтыть тенст ламо сюкпрянь валт.
Течи «Килейнесэ» морсить Л.Н. Чичамкина, Л. Н. Белякова, Н.И. Мясникова, Е. В. Козлова, Т.В. Зотова, Г. Н. Видяйкина, Н. И. Платонова, В. Н. Курганова ды Е. Г. Баранова. Ськамост морсеме сцена лангс лиснить Любовь Чичамкина, Любовь Белякова, Надежда Платонова. Кода корты Елена Григорьевна, аватнень пурнамс аволь стака, ансяк мерят самс, сеске чиить, кадсызь весе тевест. А эдь эрьванть кудозо, семиязо, важодемазо, пирезэ. Ансамблясонть алкуксонь ялгаксчи, вейкень-вейкень чарькодема. Сынь ёвтнесызь кенярксост ды апарост. Бажить лездамс эсь ютковаст. Аватне весе вейсэ артызь Ине Отечественной войнасо чавовозтненень памятникенть, пурнасть калмолангонь паролгавтомс ярмакт. Паро валсо ледстнить Владимир Николаевич Чичамкинэнь. Сон сакшныль тенст гармониясо седямо, лездыль ютавтомс кенярксчить. Мелят апак учне 66 иесэ тусь эрямосто. Лия гармонист велесэнть арась.
Пек вечки ансамблясь ардтнеме морамо лия велева. Аволь умок якасть Мокшалеев, косо ютась «Прякань чи». Икеле ламоксть ульнесть «Шумбрат, Мордовия!» раськень творчествань республикань фестивальсэ, морсесть покш сцена лангсо. Пандемиянть самонзо марто васов тердтнемест лоткасть. Эрьва ие Чаунзасо юты «Родные напевы» морамонь фестивалесь, тов сынь свал пачколить.
Тедедень майстэ ансамблянтень сась од морсиця. Галина Николаевна Видяйкина теке велень. Школань прядомадо мейле тукшнось Саранскоев. 33 иеть роботась «Лисма» заводсо, лиссь пенсияв ды сась эрямо велев.
– Вечкан морот. Морсинь школасо, хорсо. Сюкпря аватненень, саимизь эсест юткс, састыне тонавтнян весе моротнень, – корты Галина Видяйкина.
А вана Любовь Николаевна Чичамкина морси 43 иеть! Васня яксесь рузонь ансамбляв, мейле кармась морсеме «Килейнесэ».
– Морсицяль авам ды монгак, нать, туинь сонзэ ёнов. Васенце классо тонавтнемстэ саезь кода кармавтымизь морамо, весе школань иетнень морсинь. Ледстнян, олимпиадав-ков усксесть эйсэнек районов тракторсо, олгот ацатано ды ардтано. Мартонок кудосто максыльть ловсо ды сюкорот ярсамс. Малав колмо иеть тонавтнинь Рузаевкань техникумсо стыцякс. Аламос роботынь райононь КБО-со, пальтот стынь. Вастовинь вечкевикс ломанем марто ды лисинь мирденень. 1981 иестэ карминь роботамо Покш Маризь велень «Рассвет» колхозсо скалонь потявтыцякс. Сеске макссть колмо нупальс квартира. Ламо од ломанть ульнесть, весе роботасть колхозсо. Председателекс важодсь И. С. Видяйкин, пароль ломанесь, мейле ульцянокак лемдизь сонзэ лемсэ. Се шкане ульнесь покш ферма, косо трясть-кастсть 1100 скалт ды букат. 800 скалтнэ ульнесть потявтовицят. Кедьсэ эзинек потявто, ладязельть аппаратт. Те шкас роботан скалонь потявтыцякс. Ней уш «Хорошее дело» агрогруппань ловсонь комплекссэ, конась ашти веленек вакссо. Кодат технологият тенек састь, а мезть кортамс! Ведрасо ведь, ловсо, кедьсэ тикшеть-мезть кандтнемс а эряви. Весе те тееви кнопкатнень вельде. Лепштясак, неяви скалонь номерэсь, зяро максы ловсо ды седе тов. Нама, ней седе шождалгадсь тевенек. Омбо велев ардтнемс а эряви, весе теске.
Морось – седеень витема. Пингем перть морсян. Ледстнян, валске марто ардтано фермав, весе удыть, минь – моратано, паксясто мекев сатано таго моро марто. Икеле пек весёласто эринек, а ней ве моро костояк а марят, – кортась Любовь Николаевна.
Аванть кавто эйкакшонзо, вете нуцьканзо. Весе сынь эрить Покш Маризь велесэ, ковгак васов эзть тукшно. Эрить тетяст ды аваст чачома кудонь юрттнэсэ (покштяст-бабаст кудотнень таркасо), козонь стявтсть од кудот.
Культурань кудонь сехте покш мелявксось – каладозь кузтембрятне. Сынст умок эрявить витнемс. Аватне ризныть, прындерят – весе порксават-яжават. Ансяк косто саемс ярмакт паролгавтомантень, кинень пшкадемс, а содыть. Покш Маризь велесь – эриця. Улить эйдень кужо, школа, почта, лавкат. Культурань эрямоськак лаказь лаки, аволь кода республикань лия таркатнесэ. Тесэ эрить ломанть, конат пиить-палыть чачома модаст кисэ, ды кадык истя ули свал!
Татьяна Маторкина