Суббота, апреля 20, 2024
Важное

Ульяновск ошонь И. А. Гончаров лемсэ историко-мемориальной центрасо-музейсэ ютась «Авксентий Филиппович Юртов – эрзянь ды мокшонь раськень васенце просветитель» регионъютконь конференциясь. Сон алтавсь Юртовонь чачома чистэнзэ саезь 170 иетненень. Промксонтень сакшность инжеть Татарстансто, Башкортостансто, Мордовиясто.

Тесэ ульнесть Ульяновской областень школань тонавтыцятне, раськень культурань автономиянь важодицятне. Мельспароль неемс А. Ф. Юртовонь нуцьканзо – Анатолий Викторович Юртовонь. Сон эри Башкортостанонь Ильтерякова велесэ.

Лембе вал марто пурнавозтненень пшкадсь Ульяновской областень губернаторонь полавтыцясь А. М. Коробко:
– Юртовонь научной ды просветительской тевтне ушодовсть Ульяновскоень моданть лангсо. Сон ульнесь превей ды виев эрьва кодамо ёнксонь коряс: тонавтыця, кельстэ кельс ютавтыця, просветитель, букварень автор, священнослужитель. Кецявты, лемезэ а стувтови ды тень коряс тееви ламо мезе. Новомалыклинской районсо школась кандтни сонзэ лемензэ, тосо панжозь мемориальной лаз, велень вейке ульцянтень максозь Юртовонь лемесь, Кузоватовской райононь Киватень библиотекась истя жо сонзэ лемсэ. Те пек эрявикс тев. Сюкпря весенень, кить ванстыть лемензэ.
Ульяновской областень губернаторонть пельде Почётной грамотасо казевсть школань прявттнэ ды тиринь келень тонавтыцятне.
– А. Ф. Юртовонь лемезэ ашти истят содавикс учёнойтнень вакссо, кода И. Н. Ульянов, Н. И. Ильминский, Габдулла Тукай, И. Я. Яковлев. Минек автономиясь ды Ульяновской областень Правительствась теить весементь сонзэ лемензэ а стувтомга. 2020 иестэ Ульяновск ошсо панжозель Юртовонь лемсэ сквер. Сонзэ паролгавтомс явозельть малав 6 млн целковойть. Неть ярмактнень лангс ладязь валдомтомкат, эземть, шукшонь пурнамонь паргот, теезь ялго якамонь таркат. Теде башка, максозь тарка, косо бажатано стявтомс Юртовнень памятник. Эрьва иестэ просветителенть чачома чистэнзэ областень Просвещениянь министерстванть марто ютавтано научно-практической конференцият. Васня сынь ульнесть Новомалыклинской райононь Ташто Бесовка велесэ, косо сон эрясь ды важодсь. Ней жо – областень эрьва кодамо районсо ютавтано промкст. Тедеде, зярдо тешкставить сонзэ чачома чистэнзэ саезь 170 иетне, областень школатнесэ ды библиотекатнесэ молить сядодо ламо вастовомат, – пачтясь Ульяновской областень Эрзянь ды мокшонь национально-культурной автономиянь прявтось В. А. Софонов.

МР-нь Прявтонть А. А. Здуновонь пельде лембе валт ёвтась МР-нь культурань, национальной политикань ды архивень тевень министрань васенце полавтыцясь А. И. Карьгин. Промкссонть истя жо ульнесь Эрзянь ды мокшонь раськень регионъютконь общественной вейсэндявксонь прявтось Ю. А. Мишанин. МР-нь народной художникесь А. Н. Баргов казизе Юртовонь портретэнзэ.
Вадря ды мельстуиця доклад ловнось педагогической наукань докторось, профессорось, МР-нь Правительстванть юрсо Гуманитарной наукань НИИ-нь ведущей научной сотрудникесь А. М. Каторова. Сон тешкстась, А. Ф. Юртов ламо тевтнесэ ульнесь васенцекс, икелев молицякс. Васенцель, кие эрзякс ютавтызе «Ташто Заветэнь историянть», кона нолдазель 1880 иестэ. Ванкшнось эрзятнень ды мокшотнень калмамонь, тоначис ильтямонь койтнень. Сон ульнесь «Букварь для мордвы-эрзи с присоединением молитв и русской азбуки» эрзянь букварень васенце авторокс, кона лиссь 1884 иестэ Казаньсэ. Юртов ардтнесь велетнева ды вешнесь эстензэ превей тонавтницят. Сынст марто кизэнь каникулатнестэ пурнась велетнева фольклор. 1970 иетнестэ минек кельсодыесь А. П. Феоктистов кармась ванкшномо педагогической тевензэ. Ансяк седе пек ды домкасто минек учёнойтне ушодсть тонавтнеме-ванкшномо научной тевензэ 1990 иетнестэ саезь. Васняяк эряви ледстямс Е. Г. Осовскиень (сон важодсь М. Е. Евсевьев лемсэ пединститутсо). Казанень архивтнесэ муинзе Юртовонь сёрманзо, конатнень кучнесь Н. И. Ильминскийнень. Теде мейле Юртовонь коряс важодсь учёноесь Н. Ф. Мокшин. Сонгак ульнесь Казанень архивсэ, мусь эрявикс материалт.

– Минек прявт тевесь – а стувтомс сонзэ лемензэ. Васняяк, эряви ванкшномс се шканть, конань учёнойтне эзизь тонавтне-ванкшно. Кеман, муевить ламо од кулят, – тешкстась А. М. Каторова.
Паро инжекс те конференциясонть ульнесь Юртовонь нуцьказо Анатолий Викторович. Сонензэ 76 иеть. Сон пачтясь, Ильтеряковань школасо теить ламо мезе Юртовонь лемензэ а стувтомга, ансяк вана школантень те шкас эзизь максо А. Ф. Юртовонь лемензэ. Тесэ тонавтнить 90 эйкакшт. Велесэнть улить вишкинетькак ды школась карми эрямо седе товгак.

– А. Ф. Юртов содась зярыя кельть. Секскак сонензэ шождаль муемс кель-вал эрьва кодамо раськень ломань марто. Истя лиссь, лемензэ содасызь Ульяновскоень, Самарань, Татарстанонь модатнень лангсо, тосо сон эрясь ды важодсь. Эрямонь меельце чинзэ ютавтынзе Башкириянь Кармаскалинской райононь Андреевка велесэ (ней веленть лемдизь Ильтеряковакс). Велень клубсо сонзэ ледстнемга панжозь музей, паролгавтозь-витнезь калмо лангозо. 1992 иестэ одс вельмевтизь Михаило-Архангельской церькованть. 2024 иесь весе алтазь Юртовнень, Башкортостансо минь ютавтано тень коряс ламо мельстуиця вастовомат, – кортась Башкортостанонь эрзянь ды мокшонь национально-культурной центрань прявтось Ю. Н. Герасимова.
Светлана Петровна Ишмаева сакшнось Новомалыклинской районсто. Сон важоди Ташто Бесовка велень А. Ф. Юртов лемсэ вейксэ иень школань прявтокс. Тонавтыцясь прядынзе Сенгилеень педагогической училищанть, Ульяновской педагогической университетэнть. Школасо важоди уш 35 иень перть, вети рузонь кель ды литература.

– Минек школанок вишкине, ансяк 20 тонавтницят. Эрзянь келесь ветяви 1-9-це класстнэсэ. Эрявикс учебникенек улить. Ней келенть тонавты Т. П. Чичаева. Эйкакшонок свал пелькстакшныть тиринь келень коряс олимпиадатнесэ, сайнить изнямонь таркат. Школасонок тонавтнить татаронь велень эйкакшткак. Секскак колмо кельть ветявить: рузонь, эрзянь, татаронь. Минек ули паро музеенек, косо невтевить эрзянь раськень кезэрень ули-паротне. Эрьва вете иетнестэ Юртовонь чачома читне тешкставить минек школасо. Те тевенть ютазь пингень 90-це иетнестэ ушодызе А. Ф. Сударева (сон мондень икеле, 2008 иес ульнесь школань прявтокс). Самай сон 90-це иетнестэ Саранскоень покш промкссо ламо ёвтнесь Юртовдо. Теде мейле эйстэнзэ кармасть содамо эрьва косо. Школанть вакссо те шкас касыть сэрей пичеть, ломантнень валост коряс, сынст озавтокшнынзе сонсь Юртов.

Ташто Бесовкасо ней эрить 350 ломанть. Тесэ пурназь «Весточка» авань ансамбля, некеть жо аватне сакшныть «Вастома» кувака эрямонь клубов (клуб активного долголетия). Улить эрзянь костюмост, морсить тиринь кельсэ морот. Эрьва ие тешкстыть Эрзянь келень чинть. Течияк састь тей ды каванить инжетнень эрзянь ярсамопельде, – ёвтнесь Свелана Ишмаева.
Инжетнень туртов морась «Эрзянь койть» народной ансамблясь. Виев цяпамосо весе вастызь морыцянть Наталья Скобелкинань. Сон важоди Ульяновской областень Ояксчинь кудосо ды вети эрзянь ды мокшонь культурань отделэнть.

Авксентий Филиппович Юртов чачсь 1854 иень февралень 20-це чистэ Уфимской губерниясо. 1872 иестэ кармась Казанень учителень семинариясо эрзянь васенце тонавтницякс. 1883 иестэ сась важодеме Самара ёнксонь (ней Ульяновской областень Новомалыклинской район) Ташто Бесовка эрзянь велень школань тонавтыцякс. 1891 иестэ Юртов примизе священникень санонть. Уфимской уездэнь Андреевка велесэ сон панжсь колмо классонь церковно-приходской школа ды мейле теевтизе сонзэ земскоекс. Учёноесь тусь эрямосто 1916 иень апрелень 20-це чистэ.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».