Февралень 15-це чистэ юбилеензэ тешксты МР-нь заслуженной артисткась Елена Романовская. Чачсь сон 1974 иестэ Саранскойсэ содавикс актёртнэнь Сидоринтнэнь семиясо. Тетязо-авазо весе пингест алтызь МР-нь Някань государственной театрантень. Истя лиссь, Елена тейтересткак сюлмизе эрямонзо те театранть марто. Сон 33 иень перть роботы тесэ актёрокс-кукловодокс.

Школанть прядомадо мейле мольсь тонавтнеме Н. П. Огарёв лемсэ МГУ-нь филологиянь факультетэнь рузонь келень ды литературань отделенияв. Теке жо шкане ушодсь важодеме театрасо. Васня ульнесь лездыцянь составсо, мейле макснесть тензэ вишка рольть, седе тов – омбоце планонь. Иеде иес содамочитне пурнавсть, лангозонзо кемезевсть, макссть прявт рольть. Ней савкшны налксемс ве спектаклясо зярыя рольть. Ды ансяк сонсь авась соды, кода стака эрси ютамс вейке образонь невтемасто лияс.

Елена Романовская комсь иень перть ульнесь радиосо рекламань ловныцякс. Теньсэ пек лездась театрасо важодемась, сценической кортамось. Някань театрасо сон важоди од актёртнэнь марто, ютавты мартост мазыйстэ, гайтевстэ ды парсте кортамонь мастер-класст. Сон – Някань театрань первичной профсоюзной организациянь ветиця, МР-нь Театральной деятелень союзонь правленияс совиця.

Мирдензэ Евгений Яковлевич марто сынь ламо иень перть вейсэ. Кастыть кавто цёраст – Леонидэнь ды Давидэнь. Эйкакшост эйстэ вейкеськак зярс эзизе кочка театрань тевенть, кие соды, паряк, лиси аваст ладсо, кона истя жо эзь бажа театрав.

Чачома чи марто, Елена Владимировна! Весе седейстэ арсетяно тенк кеме шумбрачи, уцяска, кувака ды сэтьме эрямо, паро ёжо, валдо менель, кадык свал вакссонк кармить малавиксэнк ды лездыть молемс эрямонь кияванть! Седе ламо спектаклят, вадря рольть ды виев цяпамот вишка ваныцятнень пельде!