Апрелень 11-це чистэ Чувашиянь Алатырской райононь Алтышева велесэ ютась лембе вастовома. Сон алтавсь поэтэнть ды прозаикенть Иван Данилович Пиняевень чачома чистэнзэ саезь 100 иетненень ды Эрзянь келень чинтень.
Те кенярксчинь ютавтыцясь – А.С. Пушкин лемсэ библиотекась, конась совавты эрямос «Краеведэнь литературань поезд» проектэнть. Сонзэ вельде арсеви кемекстамс ялгаксчинь сюлмот республикань томбале эриця эрзятнень ды мокшотнень марто. Кода содатано, минек ламо писательтне чачсть Самарань, Пензань, Ульяновскоень ёнкстнэсэ. Самай сындест, сынст лемест ледстнемга арсеви ютавтомс литературань чокшнеть, ловномань марафонт. Теде башка, васоло регионтнэнь марто ютавтовить онлайн-вастовомат.
И. Д. Пиняевень ледстнемга промксось ютась Алтышевань Советской Союзонь Героенть Я. Г. Сульдинэнь лемсэ основной общеобразовательной школасо. Те эрзянь велесэнть эрьва ие ютавтови «Голос эрзи» школань тонавтницятнень творческой пелькстамось. Лембе вал марто пурнавозтненень пшкадсь Алтышева велень прявтось В. И. Кедяров. Сон пачтясь, велесэст эрить эрьва кодамо раськень ломанть: эрзят, рузт, ветькеть, татарт. Малав тёжа эрицят. Икелень шкатнестэ тетятне-аватне мелявтсть, эйкакшост кодаяк а тонадыть кортамо рузкс. Эрзянь келенть таркас седе сеедьстэ кармасть кортамо мартост рузонь кельсэ… Ды ней эйкакштне а содасызь тиринь келест. Школась бажи теемс весементь те тевенть витемга: ветявить келень ды литературань урокт, ламо кортави минек раськень историядонть, койтнеде-кирдатнеде...
А. С. Пушкин лемсэ библиотекань раськень ды краеведениянь литературань отделэнь прявт библиотекаресь В. Б. Бояркина анокстась покш кортамо И. Д. Пиняевень творчестванзо коряс. Писателесь чачсь 1923 иестэ Чувашиянь Порецкой райононь Алвелесэ (Напольное). 1951 иестэ прядызе Чувашиянь государственной педагогической институтонть. Сон – СССР-нь Писателень союзонь член (1951), Мордовиянь Комсомолонь премиянь лауреат (1968), МАССР-нь заслуженной писатель (1973), Ине Отечественной войнань участник. Важодсь «Советская Чувашия», «Советская Мордовия» газетатнесэ, Мордовиянь книжной издательствасо, МАССР-нь Писателень союзсо. Сон нолдась стихень ды поэмань малав комсь сборникть, теде башка, «Шла дивизия вперёд» дилогия, «Я люблю тебя» роман. Писателенть прозаической произведениятнеде седе домкасто пачтясь филологиянь наукань кандидатось, А. С. Пушкин лемсэ библиотекань учёной секретаресь Н.В. Никерова.
Эрзянь ды мокшонь раськень регионъютконь общественной вейсэндявксонть пельде Н. В. Бочканова казинзе школань тонавтыцятнень Благодарностьсэ. Сынст ютксо Алтышева велень школань прявтось И. В. Долгова. Чачсь сон теке велесэнть. Школанть прядомадо мейле тонавтнесь Саранскоень культурань училищань хореографиянь отделениясо. Седе тов мольсь тонавтнеме М. Е. Евсевьев лемсэ МГПУ-в (икеле МГПИ). Валонзо коряс, тонавтыцякс улемс эзь арсеяк, ансяк лиссь весе лиякс.
– Мон тонавтнинь филологиянь факультетсэ заочна. Уш васенце курссо тердекшнимизь роботамо эсенек велень школав, эрявсь эрзянь келень тонавтыця. Ризнынь ды кавтолдынь, кода карман важодеме… Ламо лездасть вузонь вечкевикс тонавтыцян: Л. П. Водясова, О. И. Налдеева, М. Н. Салаева. Те шкас мартост кирдян ялгаксчи, вастовомсто кортнетяно, телефонга гайневтнетяно. Аволь весть пшкалинь тенст превс путома мельга, свал лездасть. Вуздонть кадовсть ансяк лембе ледстнемат. Мон стамбарнэ роботынь школасо, теке жо шкасто тонавтнинь, – ёвтни Ирина Викторовна.
Алтышева велесэ школась вейксэ иень. Ней тесэ тонавтнить 49 эйкакшт. Весе теке велень. Покш класстнэ тонавтнить Алтышева посёлкасо, конась ашти веледенть пек маласо. Школань те зданиясь стявтозель 1986 иестэ. Васенце жо школась тесэ панжовсь 1872 иестэ, сон ульнесь церковно-приходской школакс, важодсь Казанской Пазонь Авань церькованть юрсо. Васенце тонавтницятнень ютксо ульнесь Степан Эрьзя скульпторось. Авазо, Мария Дмитриевна Самаркина, Алтышевань. Самай сестэ школань тонавтыцясь рединзе вишка Стёпань маштомачинзэ ды кармась мартонзо виевстэ важодеме.
Ирина Викторовна тесэ важоди 22 иеть. 2022 иень октябрясто ладизь школань прявтокс. Сон вети эрзянь келень ды литературань урокт 5-9-це класстнэсэ.
– Комсь иеде икеле эйкакштне седе содылизь эрзянь келенть, кортасть кудосояк. Ней сыть школав – мезеяк а содыть. Минь ушодтано васенце эскелькстнэнь эйстэ. Ламо мель явтано эрзянь раськень койтнень-кирдатнень, историянть, культуранть тонавтнемантень, сёрмадтано исследовательской тевть ды лия эрьва кодат проектт. Ламо кортнян тетятнень-аватнень ды эйкакштнень марто эрзянь келень тонавтнемадонть. Те миненек эряви, те тенст маштови. Келень содамосонть мезеяк берянесь арась! Кить минь ультяно, бути а содасынек эсенек ундоксонок, келенек, коенек?
Весе эрявикс учебно-методической литературанок ули. А сатныть ансяк книгат, художественной литература. Эйкакштненень чарькодемга савкшны тень тексттнэнь эрзянь кельстэ ютавтомс рузкс. Истямо коем: кармавтан ловномо эйкакштнень К. Г. Абрамовонь «Эрзянь цёра», «Велень тейтерь» романтнэнь ды лия произведениятнень. Сон минек ине классик. Сонзэ книгатнестэ эрьвась муи эстензэ мезеяк паро.
Зярс ломанесь эри масторлангсонть – сонензэ яла мезе-бути эряви. Зярс эрян – карман топавтомо те тевенть, эрзянь келень тонавтоманть. Монь бажамом – школанок улевель сехте вадря. Сон вейкине эрзянь школа районсонок. Мезе аволь уле, сонзэ эряви ванстомс, – корты школань прявтось.
И. В. Долговань тонавтницянзо эрьва ие пелькстыть регионъютконь тиринь келень олимпиадатнесэ. Тедеде тонавтницязо Полина Долгова лиссь изницякс Тиринь келень ды литературань коряс федеральной олимпиадасо, 100 баллтнэстэ пурнась 98 баллт. Надежда Карпова лиссь изницякс регионъютконь пелькстамосо. Нама, весе те маштови. Эдь нейгак, икелень тонавтницянзо гайневтнить ды ёвтыть сюкпрянь валт, те шкас кирдить мельсэст эрзянь келень уроктнень, косо тонавтнесть койтнень-кирдатнень. Минек стувтозь койтнеде пек ламо: чачомань, урьвакстомань ды мирденень лисемань, калмамонь ды седе тов. Паро, мезесь-бути кадовсь превезэст-оймезэст.
Тедеде Ирина Викторовна сайсь васеце тарка «Тиринь келень сехте паро тонавтыця» райононь пелькстамосонть. Седе тов ульнесь республикань этапось, косо пелькстасть кевейксэе тонавтыцят: ветькень, рузонь келень коряс. Эрзянь келень тонавтыцясь юткстост ськамонзоль. Совась вете сехте паро тонавтыцятнень юткс.
Алтышевань школасо ули краеведениянь музейгак. Тесэ эйкакштненень ютавтовить экскурсият ды занятият. А уш кодат умонь экспонатт пурназь тей! Невтневить кезэрень ули-паротне, стендсэ пачтяви тесэ чачозь содавикс ломантнеде, Ине Отечественной войнань участниктнеде. Аволь умок школасонть панжовсь Героень парта. Сон алтави Сергей Иванович Мадьяновнень. Цёрась чавовсь Украинасо специальной военной операциянь топавтомсто 2022 иень мартонь 6-це чистэ. Казезь Мужествань орденсэ.
Алтышева веледенть ды сонзэ эрицятнеде материалонть ловнодо сыця номертнэстэ.
Татьяна Маторкина