А. С. Пушкин лемсэ библиотекасо ютась кенярксчи, конась алтавсь Эрзянь келень чинтень. Сонзэ ютавтыцякс кармась эрзянь раськень койтнень-кирдатнень, келень ванстомань ды виевгавтомань фондось, конань вети Т. И. Ларина. Минек республикасо Эрзянь келень чинь тешкстамось ушодовсь 1993 иестэ, сон алтави учёноенть ды педагогонть А. П. Рябовонь ледстнемга (1894-1938).
Коень коряс, кирвазтезель раськень штатолось, конань кепедизе МР-нь народной артистэсь Сергей Адушкин. Чатьмонемань минутасо ледстязельть эрзянь паро ломантнень лемест, кить тусть эрямосто меельце иестэ.
Седе тов яволявтозель А. П. Рябовонь лемсэ лауреатонь лемесь. Сон максовсь учёноентень, историянь наукань докторонтень, профессоронтень В. К. Абрамовнень.
Лембе вал марто пурнавозтненень пшкадсть МР-нь Государственной Собраниянь Председателень советникесь И. М. Москаев, МР-нь Культурань, национальной политикань ды архивень тевень министрань васенце полавтыцясь А. И. Карьгин, Эрзянь ды мокшонь раськень регионъютконь общественной вейсэндявксонь прявтось Ю. А. Мишанин.
– Тей пурнавсть эрзянь келень алкуксонь вечкицят, культуранть, койтнень-кирдатнень содыцят, превей ды паро тонавтыцят. Неть читнестэ Эрзянь келень чись тешкстави ламонь таркава ды республикань томбалеяк. Вастовомат кармить минек весе районтнэсэ. Кадык свал гайги эрзянь келесь! – кортась Юрий Мишанин.
Благодарностьсэ казевсть Е. М. Самаркин, О. Н. Шабанова, Л. Ф. Дергачёва, Е. Н. Шульгов, Л. С. Карпова, С. А. Адушкин ды лият.
Инжеть сакшность районтнэстэяк. Саемга, Орданьбуень Низовка велень эрзянь келень тонавтыцясь З. В. Клементьева, Ромодановань райононь администрациянь организационной отделэнь прявтось Л. А. Гусева. Сон пачтясь, районост ловови рузонь ёнксокс. Тосо ней ансяк вейке эрзянь веле – Куриловась, те – писателенть Никул Эркаень ды РСФСР-нь заслуженной артистэнть, МАССР-нь народной артистэнть Дмитрий Еремеевень чачома таркаст. Райононь кемгавтово школатнесэ ветяви эрзянь кель. Ромодановань Культурань кудонть юрсо важоди «Ялганят» эрзянь ансамблясь, косо морсить ниле ават. Те кенярксчисэнть ульнесть сыньгак ды морасть мельстуиця морот.
Пек лембестэ вастозель Отяжбуень Ламбаське велень школань тонавтницясь Надежда Аитова. Тейтернесь ловнось стих ды морась моро. Мартонзо ламо важоди бабазо, тонавтыцясь Н. А. Вдовина.
Эрзянь келенть течинь эрямодонзо кортасть «Сятко» журналонь редакторось Т. В. Разгуляева, «Чилисема» журналонь редакторось Е. В. Барцаева. Ней моли газетатнень ды журналтнэнь лангс сёрмадстомась, секскак редактортнэ пшкадсть лездамс те тевсэнть, сёрмадстомс изданиятнень лангс.
– Мезе теемс келенть ванстомга? Васняяк, нама, кортамс кудосо эйкакштнень марто эрзянь кельсэ. Кадык содыть тиринь келест, раськень коест-кирдаст, эсь ундоксост, – кортась Е. В. Барцаева.
Паро инжекс те вастовомасонть ульнесть минек морыцятне: МР-нь народной артисткась Анна Атласова, МР-нь заслуженной артисткатне Елена Воронина, Антонина Масягина ды Ирина Рузанкина, весе сынь морсить Г. И. Сураев-Королёв лемсэ «Келу» фольклорной ансамблясо, од морыцятне Андрей Бочканов, Артём Мамаев ды сонзэ «Ялгат» фолк-группазо.
Татьяна Маторкина