Течи, мартонь 17-це чистэ, Россиянь Президентэнь Кочкамотнесэ эсь мелензэ ёвтызе Россиянь Федерациянь сенаторось Пётр Тултаев. Вайгелензэ сон макссь Рузонь драмань театрасо важодиця кочкамонь участкасонть.
Кода тешкстызе Пётр Николаевич, Кочкамотнес сон сась покш мельспаросо. Васняяк, кенярдовты перть пельксэсь. Истя жо пек кенярдовты се, кодамо покш мель Кочкамотненень явить республикань эрицятне.
- Течи минь кочкатано эсь сы шканть, кочкатано Президентэнть, - мерсь Пётр Николаевич. - Ней масторось печти а шожда шкат ды миненек эряви улемс вейсэ, штобу теемс Россиянть эштёяк виевекс. Ды течи эрицятнень вейсэ улемась тень парсте невти. Ансяк вейсэ минь топавтсынек весе арсематнень, совавтсынек эрямос прявт теварсевкстнэнь.