Неть читнестэ минек газетань редакцияв сакшнось инжекс Юлия Автайкина. Тейтерькась тонавтни М. Е. Евсевьев лемсэ педуниверситетэнь филологиянь факультетсэ. Ютко шкасто сон сёрмады эрзянь кельсэ стихть. Юлянь чачома тарказо – Покш Березникень райононь Бозаёв велесь. Стихень сёрмадомо тейтересь ушодсь школасо. Васенце стихензэ, «Бозаёв», авторось алтызе тиринь велензэ туртов.

Эряви меремс, васняяк Юля пек виздсь киненьгак невтемс сёрмадовксонзо, ансяк кода сась тонавтнеме педуниверситетэв, мелявксонзо шлязь шлявсть. Истя, ошсо тонавтнемстэ тейтерьканть тердизь од сёрмадыцянь семинарс, конась ютавтовсь МР-нь Писателень союзсо.

– А сёпан, пек кенярдынь те вастовомантень. Зярдо явновинек секциява ды теевинек содавиксэкс эсенек юткова, чарькодинь – неть ломантнень ютксо мон марян прям пек уцяскавокс, сёрмадомань сяткинесь кирвазсь седеяк пек, эдь сёрмадейтнень эйстэ мольсть истят виев превс путомат ды ламо лембе, – ёвтни Юля.
Стихень сёрмадомань мелесь тейтерентень седеяк пек сакшны тиринь велесэ. Тосо, пертьпельксэнть мазычинзэ лангс ванозь, авторонть чачитькак аволь покш, лембе ёжодо пешксе стихензэ.

– Тиринь кельсэ сёрмадомась канды монень покш мельспаро. Мон вечкса эрзянь келенть, раськенть ды коензэ-кирданзо. Бажан вейсэндявомс весе масторонь эрзятнень марто ды ванстомс келенть ёмамодо, – корты Юля.

Истя жо тейтересь путы ламо вийть ды кемема тонавтнема тевензэ туртов. Эрямосонть сехте покш мелезэ – улемс тонавтыцякс. Секскак школанть прядомадо мейле кувать эзь арсе ды мольсь тонавтнеме педагогической университетэв. Тень кувалма тейтересь ашти покш каштанчисэ.


Бозаёв

Мон эрян мазый велесэ,
Пек вадрят ломантне тесэ.
Сынь важодить апак оймсе,
Эрьватась эсензэ койсэ.

Аволь покшке минек велесь,
Чуди тия сэтьме леесь.
Кортатано эрзянь кельсэ
Весе вейсэ паро мельсэ.

Алёна Артемьева