Ноябрянь 21-22-це читнестэ Саранскойсэ ютась од сёрмадыцятнень литературань семинар. Сонзэ ютавтызе МР-нь Писателень союзонь правлениясь. Важодсть зярыя секцият: пурнавкшность эрзянь, мокшонь ды рузонь кельтнесэ поэзиянь, прозань сёрмадыцятне.
Весемезэ кучозельть малав 30 яволявтомат. Сехте ламо инжеть сакшность рузонь поэзиянь ды прозань секциятнес. Сынст ветясть поэтэсь Татьяна Маланьчева, прозаикесь Александр Бажанов. Мокшонь секциянть – «Якстерь тяштеня» журналонь прявт редаторось Вера Брындина. Эрзянь секциясь мольсь «Чилисема» журналонь редакциясо. Семинаронть ветясь «Сятко» журналонь ответственной секретаресь М. П. Левщанова, вечкевикс инжекс ульнесь МР-нь заслуженной поэтэсь Раиса Кемайкина.
– Миненек эряви кастомс од литераторт, писательть, поэтт, кода кастымизь сëрмадыцякс минек. Семинаров сазтнестэ седе ламотне уш зярыя мезе сëрмадсть. Сëрмадомань сяткинесэ казезь ломанесь бажи арсеманзо-ëжонзо ëвтамс валсо, невтемс перьканзо мазычинть. Се, кие тень теи, тонавтови сëрмадомо седеяк ëроковсто, сёрмадовксонзо туить лиятнень мельс. Ды кадык одтнэ а мелявтыть, зярдо сынст кунсолыть ды ванкшныть материалост, витнемадо мейле нолдавить печатьс, – кортась Писателень союзонь правлениянь прявтось Т. П. Швецова.
Семинаров васенцеде сакшнось Юлия Автайкина. Сон чачсь Покш Березникень райононь Бозаёв велесэ. Ней тонавтни М. Е. Евсевьев лемсэ МГПУ-нь филологиянь факультетсэ. Кандсь мартонзо стихть.
Паро ёвтнемасо кецявтынзе весень Яна Кудашкина, сон тонавтни Н. П. Огарёв лемсэ МГУ-со. Истя жо од стихть ловнось Дубёнкань райононь сёрмадыцясь Светлана Фадейкина. Сон ёвтызе кенярксонзо: совавтызь Россиянь Писателень союзс.
Вастовомантень сакшность лия автортнэяк, кить зярыя иеть сёрмадыть: Людмила Рябова, Марина Агафонова, Алёна Артемьева, Виталий Картышкин.
– Седе ламо ловнодо эрзянь кельсэ. Ансяк сестэ шождасто ёвтавить тенк меленк-арсеманк. Саинк К.Г. Абрамовонь, Ф. М. Чесноковонь книгаст. Кодамо тосо келесь! Сёрмадомсто свал мукшнодо мазый образт, – макссь превть Р. С. Кемайкина.
Татьяна Маторкина