Эштё вейке инженек – те превей, мазый ды, теке килейне, ёлганя тейтересь, Н. П. Огарёв лемсэ МГУ-нь эрзянь отделениянь 2-це курсонь студенткась Анастасия Колесникова. Тейтересь ялганзо ютксо содавикс сеньсэ, сон сёрмады эрзянь ды рузонь кельтнесэ стихть. Косто жо саевсь истямо ёроков ды превей тейтерькась? теде ловнодо седе тов.
Настянь чачома-касома тарказо Дубёнкань райононь Поводелесь. Тетянзо-аванзо эрзянь ломанть. Тетязо, Виктор Александрович, важоди эсест велесэ механикекс, авазо, Наталья Ивановна, эрзянь ды рузонь келень тонавтыця. Школасо важодемантень авась алты 20-це ие. Истя жо ютко шкасто Настянь авазо сёрмады эрьва кодамо тема лангс стихть.
– Арсян, стихень сёрмадомась эйзэнь чачсь авань пельде. Васенце стихенть сёрмадыя тейтерькакс, тонавтнинь 7-це классо. Лемезэ мелезэнь а сы. Сельмень икеле ашти, кода талнынь васенце сёрмадовксонть лангсо. Истямо тамашакс тень марявсь. Васняяк ловныя тетянь-авань туртов, сынь шнымизь. Ды теньсэ седеяк кепедизь мелем седе тов сёрмадомантень. Истя аламонь-аламонь карминь сёрмалеме. Ды вана течинь чис седейсэнь палы те сяткинесь, – ёвтни Анастасия.
Школасо тонавтнемстэ Настя кармась кучнеме стихензэ тиринь райононь «Новая жизнь» газетав. Зярдо од авторонть сёрмадовксонзо лиснесть газетань лопатнесэ, тейтерьканть мельспарозо а кельгиль потмозонзо. Истя те вадря ёжонть марто Настянь чачильтькак од стихензэ.
Стихтнеде башка, Настя яви мель викшнемантень. Те тевентень вечкемась сась тензэ школасо тонавтнемстэ технологиянь уроктнесэ. Сехте вадрясто тейтерьканть лиснесь эрзянь орнаментэсь. Секскак ютко шкасто сон кармась тонавтнеме викшнеме седе стака узорт. Школасо тейтеренть тень кувалма пек шнасть. Ды 2009 иестэ Настя эсензэ райононь кедьчелькев ломантнень марто вейсэ невтинзе важодевксэнзэ «Шумбрат, Мордовия!» фестивальсэнть.
Настя школанзо прядызе сырнень медаль марто. Ды покш мельспаросо поладызе тонавтнеманзо Н. П. Огарев лемсэ университетсэ.
– Эйкакш пингестэ саезь уш монь ульнесь покш мелем теевемс филологиянь факультетэнь студентэкс. Эдь монь бабамгак, Татьяна Петровна Волгушева ды авамгак – тонавтыцят, секс моньгак седейсэм палы те тевентень вечкемась. Школасо важодемась монь а талновты, мекевлангт – кенярдовты, – корты од тейтересь.
Бути кортамс Настянь стихень келензэ ланга, эряви меремс, сёрмадовксонзо домкат, пешксеть эрьва кодамо ёжодо, мельде-бажамодо, ловновить шождасто. Седе сеедьстэ тейтересь сёрмады тиринь мастордо, чачома веледе, пертьпелькстэ, ракшадо. Вана вейкесь эйстэдест:
Тиринь велем
Вечкса эсень тиринь веленть,
Веленть велькссэ сэнь менеленть!
Покш Сельме леень чиренть,
Веленть пес сравтовозь виренть.
Вечкса мон тиринь кудонть,
Кудонть вакссо – покш садонть.
Эсень ульцява мон ютан.
Весеменень седей путан.
Мекс мон вечкса тиринь веленть
Ды велькссэнзэ сэнь менеленть?
Тесэ ушодовсть монь китне.
Те таркадонть арась питней.
Кемтяно, од тейтеренть весе мелензэ арсеманзо топавтовить. А миненек кадови ансяк учомс ды седейсэ кеняркс марто лов номс Настянь од стихензэ.
Алена Артемьева
