Н. И. Ишуткинэнь ледстнемга
Кода-бути весть монь кевкстимизь: зярдо теевинь содавиксэкс Николай Ишуткин марто? Монськак арсезевинь, кода жо васенцеде вастовинек минь, кавто журналисттнэ?
Эйкакш шкасто, уш зярдо тонавтнинь Покш Березникень райононь Бозаёвань кавксо иень школасо, терявтнинь сёрмадомо. Эсь сёрмадовксон кучнинь «Заветы Ленина» райононь газетав. Кода кецнинь, зярдо неилия тосто эсь фамилиям. Теде мейле кодамо-бути вий кармавтсь эйсэнь сёрмадомо седе товгак школадо, веледенть… Се шкастонть районсонть лиснесть Шугуровасто Вася Дёминэнь, Симкинасто Коля Ишуткинэнь материалост. Вастовомс жо мартост савсь университетсэ тонавтнемстэ. Сеть шкатнестэ сеедьстэнь инжекс ульнинь «Эрзянь правдасо», косо важодсь «Тештине» литературной вейсэндявксось. Тосо мартонзо вастовинекак. Занятиятнесэ Николай мейсэяк эзь явовкшно. Аштекшнесь чатьмонезь. Тень лангс апак вано, ламо сёрмадсь.
Университетэнть прядомадо мейле важодинь МАССР-нь Гостелерадиосо литературно-драматической редакциянь редакторокс. Ютавтнинь эрьва кодат вастовомат содавикс ломантнень марто. «Литература и люди» тележурналонь ды «Поэтический четверг» радиопередачань участниктнестэ вейкекс ульнесь Николай Ишуткин.
Мейле мартонзо вастневинек од писателень эрьва иень промкстнэсэ-семинартнэсэ, а мейле тердимим сестэнь «Пионерэнь вайгель» журналсо важодеме (ней «Чилисема»). Вейсэ ютавтнинек ловныцятнень марто вастовомат, ардтнинек «Равось – ояксчинь лей» фестивалев-экспедицияв…
Николай Ивановичень Печатень кудонь омбоце этажсо кабинетэзэ свал пешксель ломанде. Весень вастсь мельспаросо. «Чилисема» эйкакшонь журналонь прявт редакторонь тевденть башка, сон ульнесь МР-нь Писателень союзонь Правлениянь Председателекс, совась эрзянь ды мокшонь раськетнень регионъютконь общественной вейсэндявксонтень, «Литературное сообщество писателей России» ОООП-нь МРО-нь директороль… Неть коське строчкатнень ютксо – покш тевть. Эрьва ковсто эрявсь нолдамс журналонть, пурнамс-нолдамс од книгат, кода эрзя-мокшонь литературань классиктнень, истя жо ушодыця автортнэнь. Весень марто эрявсь кортамс лембестэ, кой-зярдо превень путозь, эрьванень лездазь. Ламо шка алтась сёрмадомантень. Сон эдь ламо сёрмадсь стихть, ёвтнемат, юморескат… Сехте вадрятне совасть кочказь колмо томтнес.
Кода уш меринек, Николай Ивановичень кабинетэзэ зярдояк чаво эзь эрсекшне. Седеяк пек маень 28-це чистэ, чачома чистэнзэ. Кенярксчинзэ тешкстамо киньгак эзь тердтне. Ломантне сынсь сыльть поздоровонь ёвтамо, паро мелень арсеме. А кодамо тантейстэ качадыця чаезэ ульнесь, истямонть маштыль анокстамо ансяк Ишуткин!
Сёрмадан ледстнематнень, кеденть жо арась мелезэ сёрмадомс Ишуткиндэ ютазь шкасо. Эдь ломантнень туртов маряви, Николай Иванович те шкас ютксонок. Творчествазо, нама, кадови свалшкас.
Книгань лавсям лангсо ламо книгат. Ютксост улить монсеньгак, конатнень лездась нолдамс Николай Иванович. Истя жо тесэ улить Ишуткинэнь эрзянь ды рузонь кельтнесэ нолдазь книганзо. Панжия вейкенть, ловнан «Нурямот» стихенть:
Верев – алов,
верев – алов –
Нурямотне эйсэнь
салыть.
Верьга-менельга
ливтнеме,
Седейсанонь киневтеме…
Саия лия книганть. Тесэ сельмезэнь каявсь «Васень лов» стихесь:
Васень ловось – теке
васень стих.
Сон менелень ойместэ
прок лиссь.
Зярс пек однэ ды пелиця,
Ашо, ванькске ды
ливтниця.
Мон пелян сонзэ
тандавтомс,
Манямс, пильге алов
правтомс.
Васень стихесь, васень
ловось
Кенярксчи седейзэнь
поводсть.
Сонзэ стихензэ эрзянь кельстэ рузонь кельс ютавтсть А. Громыхин, Т.Швецова, Н. Кузина ды лият. Сонськак Николай Иванович стихть парсте сёрмадсь кода эрзянь кельсэ, истя жо рузонь:
Опустились на крылечко
Две снежинки к вечеру,
Захотелось вдруг
сердечным
За столом попить
чайку.
С крендельком,
из самовара,
Чтобы было угощенье
И с повидлом,
и с вареньем.
На крылечке все
мечтали…
В дом, конечно,
не попали.
Ловнат стихтнень ды ловновлить седе товгак. Кода а панжомс прозасо сёрмадовкс марто книганть. Тесэ ёвтнемат ды юморескат. Кодамо лембечи моли эйстэст, юморескатнеяк сёрмадозь чевтестэ, аволь казямосто. Ловнат эйсэст ды, маряви, неть ломантне эсеть велень…
Н. И. Ишуткинэнь эрьва книгантень икельце валтнэнь сёрмадокшнынзе филологиянь наукань докторось, профессорось В. И. Дёмин, кона истя жо тусь эрямостонть. Омбоце томонтень икельце валось лемдезь «Я светлой поклонюсь звезде, рождая строчки…». А мон сюконян тонеть, Николай Иванович, земляконтень, превс путыцянтень, лездыцянтень…
Геннадий
Гребенцов,
МР-нь заслуженной поэт,
Покш Березникень райононь Почётной гражданин.