Четверг, марта 28, 2024
Важное

А. С. Пушкин лемсэ библиотекасо ютась лембе вастовома. Тесэ мольсь «Тядянь-авань вал» книганть презентациясь. Пусмось лиссь уш 2019 иестэ. Ды ансяк ней вастовсть сонзэ автортнэ ды нолдыцятне. Сынст лемс библиотекань важодицятне пурнасть книгань ды периодикань сюпав выставка.



«Тядянь-авань вал» – те книга, ков совасть эрзянь ды мокшонь кельтнесэ поэттнэнь произведенияст. Весемезэ 21 автор. Сынст ютксто кемнилее эрзянь. Неть: Н.Ишуткин, М. Кемаль, Д. Таганов, Л.Дергачёва, Л. Рябова, М. Ерёмина, Т.Мокшанова, М. Слугина, А.Подгорнова, Ю. Мамаева, Ю. Демяшкина, С. Фадейкина, Т. Шлабина, А. Салдаева. Мейстэ весемесь ушодовсь? 2018 иестэ Эрзянь ды мокшонь раськень драматической театрасо ютась минек поэттнэнь ды писательтнень покш вастовома. Пуромкшность ламо ломанть. Автортнэ ваныцятнень туртов сцена лангсо ловность стихест. Сестэ чачсь мель нолдамс сынст сёрмадовксост башка книгасо. Истямо меленть ёвтызе РФ-нь АФУН-нь прявтось Пётр Тултаев (сестэ важодсь Саранск ошонь мэрэкс). Самай сон лездась нолдамосо. Ды вана пусмось анок.

– Эрьва книгань лисемась – те покш чи. Минек литературанть ули течинь ды вандынь чизэ. Нама, тусть сеть шкатне, зярдо од книгатнень мельга ломантне аштесть очередьсэ. Ней лия стакачить ды сынь улить лия раськетнень литературасояк. Эрьва келенть ули эсензэ танстезэ ды мазычизэ. Бути кармат ютавтомо рузонь кельс – те танстесь ёми. Сон а ёвтави истя, кода алкукс гайги тиринь кельсэ. Сюконян сетненень, кить сёрмадыть тиринь кельсэ. Паро улевель, иезэнзэ весть нолдамс истят пусмот. Миненек эряви седе сеедьстэ вастневемс, кортамс стакачитнеде, лездамс ёроков ломантненень, – пачтясь РФ-нь сенаторось Пётр Тултаев.
Чатьмонемань минутасо ледстязельть поэттнэнь Николай Ишуткинэнь ды Виктор Лобановонь валдо лемест. Сынь тусть эрямосто тедеде ды мелят.

– Меельце шкасто чуросто нолдавить тиринь кельсэ од книгат. Мезесь кецявты, те пусмосонть ламо автортнэ од ломанть. Те – кемема. Кортыть, стихтне сакшныть косто-бути верде. Поладовлия, – аволь эрьвантень. Поэттнэ, койсэнь, – валонь каштазонь кодыцянь ёрокчисэ Пазонь казевть ломанть. Ёроковсто сёрмадозь валморосост сынь кандыть тенек мазычи, кеняркс, валдо, сыремтить раськенсенть вечкеме. Тиринь авань валтнэде башка, мезесь лиясь марявкшны седе вадрякс, питнеекс, лембекс? – кортась «Сятко» журналонь прявт редакторось Т. В. Разгуляева.

Те вастовомасонть эсь стихест ловнызь сетне, кинь произведенияст лиссть книгасонть. Николай Карпов морызе Мария Ерёминань стихензэ лангс моронть.

Пурнавозтне кортызь мелявксост: те – газетатнень ды журналтнэнь вишка тиражтне, аволь покш гонорартнэ, кона пандовить сёрмадыцятненень. Од автортнэнень пек стака нолдамс книгаст. Сыненст савкшны эсь ярмакост лангс ливтемс пусмост. Ёвтазель мель, вастневемс седе сеедьстэ, кортамс стакачитнеде. Сы вастовомась – тунда. Эряви пурнамс од пусмо.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».