Минек редакцияв сеедьстэ сакшныть инжеть. Вейкесь юткстост, конань мельспаросо васттано, – Михаил Васильевич Маторкин. Сон тукшны мартонзо од сёрмадовкст, конат лиснить газетасонок. Журналистэсь ды писателесь свал кевкстни, кода молить тевенек, мезе одось. Нама, ёвтни икелень шкань эрямодонть, лембестэ ледстни журналистикасо важодемадонть.
Монь эйсэ свал кевкстнить: сон аволь покштят? Мерян, аволь, паряк, кува-бути пек васолга роднятано. Кода корты Михаил Васильевич, покштязо сась эрямо Отяжбуев минек Орданьбуень Орозбие велестэ. Секскак, паряк, улить вейсэнь ундокст. Мартон важодицятне ялатеке тошкить тень: «Покштят сась…»
М. В. Маторкин чачсь 1937 иень январень 25-це чистэ Отяжелень райононь Пилезелесэ. Средней школанть прядомадо мейле саизь Советской Армияв. Служась Средней Азиясо, радиолокационной войскатнесэ. Армиядо мейле велявтсь тиринь ёнксов, документэнзэ максынзе Н. П. Огарёв лемсэ МГУ-нь филологиянь факультетс. Тесэ варчизе эсь прянзо литературной произведениянь сёрмадомасо. Университетэнть прядомадо мейле М. В. Маторкин сась важодеме «Эрзянь правда» газетав литсотрудникекс.
Важодемань уш васенце шкастонть Михаил Васильевич невтизе прянзо ёроковокс, эрьва ков кенерицякс. Сёрмадсь аволь ансяк корреспонденцият, статьят, репортажт, литературной произведенияткак – юморескат, баснят. «Эрзянь правда» газетасо нейгак лиснить сонзэ ёвтнеманзо, баснянзо, мизолксонзо.
Зярыя иень перть М. В. Маторкин важодсь «Горьковгипросельхозстрой» проектэнь институтсо инженерэкс-геологокс, промышленной предприятиянь ды велень хозяйствань организациянь проектированиянь коряс инженерной изысканиянь отделсэ. Оймсема читнестэяк Михаил Васильевич якиль ялганзо марто важодеме. Сынь ютызь республикань малав весе велетнень. Тосонь эрицятненень лездасть ведень улема таркатнень вешнемстэ. Эрьва косо сынст вастсть вадрясто, теке малавикс инжетнень.
Проектэнь институтсо важодемадонзо Михаил Васильевич ледстни ансяк паро валсо. Тесэ тонадсь ояксчинь ванстомо, тесэ кармась содамо коллективенть виензэ. Проектэнь институтось явсь сонензэ эрямо таркаяк.
Михаил Васильевич ютко шкасто сёрмадсь ламо ёвтнемат, баснят. Сынст нолдыльть «Советская Мордовия» (ней «Известия Мордовии»), «Эрзянь правда» республикань газетатнесэ, «Сятко» журналсо. Ёвтнематне – эсь ялгатнеде, инженертнэде-геологтнеде, седе, кода сынь важодить, мезе ютавтыть эсь оймест пачк.
Авторось пурнынзе весе очерктнень вейс ды анокстась «Мелиораторт» книга, конань 1980 иестэ нолдызе Мордовиянь книгань издательствась. Те книганть сеске редизь, ды сон вечкевсь эрзянь ловныцятненень.
Малав комсь иеть Михаил Маторкин важодсь «Мордовия» ГТРК-со. Тов сон мольсь уш аволь одсто. Тиринь кельсэ сёрмадомо ды радиос материалонь пурнамо сонзэ тонавтсь А. И. Михатов режиссёрось. Михаил Васильевич сеске мусь кель-вал «Сияжар» редакциянь корреспонденттнэнь марто. Ардтнесь командировкава. Ламо вастневсь велень ломантнень марто. Ютксост – скалонь потявтыцят, школасо тонавтыцят, культпросветроботникть, велень хозяйствань прявтт... Сындест тейнесь репортажт, сёрмадсь «Эрзянь правда» газетас очеркть. Те шканть перть Михаил Васильевич теевсь эсь тевень алкуксонь специалистэкс. Сонзэ радиопередачатне, конат лиснесть эрьва чистэ валске ды чокшне ёнов, кадовсть «Сияжар» редакциянь сырнень фондс.
Михаил Васильевичень валонзо коряс, сон эрьва материалонть ютавтылизе седеензэ пачк. Зярдо те тееви, сестэ лиси вадря, лембе материал, сестэ ловныцятнеяк кадовить мельспаросо. 1985 иестэ совавтозель СССР-нь Журналистэнь союзс.
1997 иестэ лиссь «Варма ковол» книгазо, козонь совасть ёвтнеманзо ды повестезэ. Колмоце книганзо лемдизе «Сюрко кумбря» (2007). Сонзэ истя жо нолдызе Мордовиянь книгань издательствась. Тосо ёвтнемат, стихотвореният. Эйзэст сёрмадыцясь путызе весе оймензэ. Тень кувалма книганть ловныцятне вастызь мельспаросо. Ламо произведениятне пейдемань. Сынь шождасто ловновить ды ёжоткак паролгады.
2000 иестэ М. В. Маторкин совась Россиянь Писателень вейсэндявксос. Те седеяк кепедизе ёвтнемань, баснянь сёрмадомань меленть. Баснянзо лиснить «Сятко» журналсо, «Эрзянь правда» республикань газетасо. Михаил Васильевич сёрмадсь зярыя морот. Сынст морсить покш сцена лангсо. Стихензэ лангс кой-кона моротне совасть «Келу» фольклоронь ансамблянть репертуарс.
М. В. Маторкин казезь Мордовской АССР-нь Верховной Советэнь Президиумонь Почётонь грамотасо.
Лариса Зубкова, икелешкань коллегазо: – Михаил Васильевич Маторкин марто минь васенцеде вастовинек, зярдо мон, университетэнь «Журналистика» отделениянь «пиже» студентка, сынь практикас Мордовиянь телевиденияв. Сон сестэ роботыль корреспондентэкс радиосо. «Сияжар» национальной программань редакциянть марто вейсэ минь ардтнинек ламо велеть, сайнинек интервьют, теинек сюжетт. Михаил Васильевич свал ульнесь вакссонок, теке алкуксонь тетя ды тонавтыця: максыль превс путомат, каваниль тантей прякинеде, конатнень, нать, килангов тензэ стряпилинзе низэ. Сон пек парсте содасы эрзянь келенть ды сеедьстэ лездась практиканткатненень видестэ ладямс кевкстематнень, сёрмадомс сценариенть. Свал ледстнян эйстэдензэ паро валсо: сон ломанесь шожда, обуцязо вадря, зярдояк эзинь маря пельдензэ берянь тевть. А кода стихотвореният ловны ды морот морси – тень эряволь неемс. Ламотнень эйстэст сон сёрмадынзе сонсь. Мейле, зярдо сон уш тусь пенсияв, а мон сынь важодеме корреспондентэкс, яксинь снимсеме ланганзо сюжетт ды неинь, кода кургонь автезь кунсолыть эйсэнзэ школасо тонавтницятне. Сон машты кирдемс аудиториянть, ули эйсэнзэ ораторонь докачи.
Содан, январень 25-це чистэ Михаил Васильевич тешкстызе юбилеензэ, тензэ топодсть 85 иеть. Тень кувалма арсян тензэ ванстомс шумбрачинть, а максомс прянть стакачитненень ды иетненень, кадык весе моли парсте!
Исяк, январень 25-це чистэ, Михаил Васильевичнень топодсть 85 иеть. Тень кувалма «Эрзянь правда» газетань теицятне ды ловныцятне ёвтыть седейшкавань лембе валт, арсить кеме шумбрачи, уцяска, сэтьме эрямо!
Анокстызе Татьяна Маторкина