Россиясо моли «Свеча памяти» онлайн-акциясь. Июнень 22-це чис масторонок келес кирвазтневить штатолт сетнень ледстнемга, кить максызь эрямост Ине Изнямонть кис.
82 иеде икеле, июнень 22-це чинь валске мартонь ниле чассто ушодовкшнось Ине Отечественной войнась, конась мольсь 1 418 чить ды сайсь 27 миллионт ломанень эрямот. 2004 иестэ саезь минек покштятнень-бабатнень ине подвигест ледстнемга Россиясо ютавтови «Ледстнемань штатол» акциясь. Валске марто од ломантне, ветерантнэ, властень ды общественной важодицятне кирвазтезь штатол марто сыть таркатнес, конат сюлмавозь неть иетнень тевтнень марто, штобу ледстямс весень, кить эзть велявто кудов.
2020 иестэ саезь, акциясь ютавтови онлайн-лувсо. «Память поколений» благотворительной фондось, конась максы медицинань лезкс Ине Отечественной войнань ды лия тюрематнень участниктненень, те акциянть васенцеде ютавтызе кезовонь шкастонть, зярдо лисемс ушов, штобу кирвазтемс штатол, эзь мереве. Те шкастонть саезь, акциясь кармась паро коекс. Тедеде сон ютавтови нилецеде.
Ютазь иестэ проектэнть лувсо теезельть 50 видеоинтервьют Ине Отечественной войнань ветерантнэнь-участниктнень, тылэнь тружениктнень, концлагерьсэ улезтнень марто. 2023 иестэ сайтонтень совавтозь ветерантнэнь эштё 9 видеоисторият. Весе неть сёрмадовкстнэ лия ёнов а молицят ды эрявикст. Иестэ иес седеяк аламолгадыть неть тевтнень неицятне, ды сынст ледстнематне – покштояк покш сюпавчи, конань «Память поколений» фондось пурны пельксэнь-пелькс весе Россиянть келес.
Стрижов Константин Павлович, Ине Отечественной войнань ветеранось ледстни войнань васенце читнень: «Минек пурнымизь школасо, арсинь, сайсамизь фронтов. Монень ульнесть 14 иеть. Ильтимизь музыка марто. Лиссь, ардтано Смоленск малав – противотанковой латкотнень чувомо. Верьга ливтнесть немецень самолётт. Кияк мезеяк тень марто эзь тееве. Ды мон сестэ эстень кемекстыя, карман лётчикекс».
Ёвтамс сюкпря ветерантнэнень – те акциянть аволь вейкине тевесь. А эряви стувтнемс сетнень, кить зярс минек ютксо! Весе участниктненень мереви теемс лезкс теске сайтсонть. Пурназь весе ярмактне ютавтовить Ине Отечественной войнань ветерантнэнень медицинань лезксэнь максоманть лангс. Ютазь иестэ «Ледстнемань штатол» онлайн-акциянь участниктне кирвазтсть 479 084 виртуальной штатолт ды пурнасть 600 988 целковойть ветерантнэнень лездамга. Кирвазтемс эсь штатолонть мереви июнень 22-це чинть самс деньпамяти.рф сайтсонть.