Сонзэ кедьга ютыть сехте вишкинетне. Тетяст-аваст ветясызь кедте школав, тосо мельспаросо эйсэст васты Елена Александровна. Ниле иетнень перть сон карми тенст васенце тонавтыцякс, превс путыцякс, омбоце авакс. Весе эрямонзо перть сон важоди Луховкань средней школасо вишка класстнэсэ тонавтыцякс.
А лововитькак, зяро эйкакшт нолдась, тонавтсь ды путсь виде килангс. Вишка шкасто саезь бажась улемс тонавтыцякс, кодамояк лия таркасо эзь нее прянзо. Трудовой книжкасонзо ансяк вейке сёрмадовкс – Луховкань школав саемадо.
Е. А. Великанова чачсь Покш Игнатовань райононь Ежовка эрзянь велинесэ. Тетязо, Александр Иванович Леонтьев, прядсь Кемлянь велень хозяйствань техникум. Пингензэ перть важодсь велень хозяйствань специалистэкс. Ульнесь районсо парторгокс, механикекс, механизациянь коряс прявт инженерэкс. Сон чачсь ламо эйкакшонь триця семиясо, косо ламо важодсть ды лездасть вейке-вейкенень. Авазо, Валентина Осиповна, истя жо покш семиянь. Сон начальной классонь тонавтыцяль, ниленьгемень иеде ламо ульнесь учителекс.
1971 иестэ Елена Александровна васенце классов сыргась тонавтнеме Покш Игнатовань райононь Новобаевской школав. 1975 иестэ Леонтьевтнень семияст сась эрямо Саранск ошонть вакссо Луховка посёлкав. Тесэ Елена сырнень медаль марто прядызе средней школанть. Теке жо иестэнть мольсь тонавтнеме М. Е. Евсевьев лемсэ МГПИ-нь (ней – МГПУ) начальной классонь факультетэв. Нама, кода школасояк, пединститутсо сон тонавтнесь парсте ды прядызе якстере диплом марто. Мекс кочкизе тонавтыцянь тевенть? Паряк, вансь аванзо лангс, кона тонавтыцяль, мельс тукшнось тензэ максомс содамочить вишкинетненень. Истя, 1985 иестэ Елена Александровна ушодсь важодеме Луховкань средней школасо начальной классонь тонавтыцякс. Теке таркасонть сон важоди нейгак.
– Малав комсь иеть минь авань марто важодинек вейсэ, сон тонавтсь шабра классонть. Васень шкасто лездась монень эрьва мейсэ. Паряк, секс стакачить эзинь маря. Авам ды тетям – труженикть, алкуксонь ломанекс ульнесть, паро пример лиятнень туртов. Вечкемасо ды ояксчисэ сынь эрясть ведьгеменде ламо иеть. Ды тусть тоначив мельга-мельцек, ие ансяк ютксост. Сынь ульнесть интеллигентнойть, а покшкавтницят, велень ломанть, – ледстни Елена Александровна.
Е. А. Великанова тонавты эйдетнень ловомо, ловномо ды сёрмадомо. Сонзэ эйсэ мельспаросо кунсолыть весе эйкакштне. Тонавтыцясь максы весе седейлембензэ вишкинетнень туртов. Корты мартост чевтестэ, вайгелень апак кепсе. Маряви, сон муи кель-вал эрьванть марто. Бути мезесь а чарькодеви, тагояк толковасы-ёвтнесы. Ней сон 3 «А» классонь ветиця, тосо тонавтнить 27 эйкакшт. Икеле эрсесть седеяк покш класст, косо ульнесть колоньгеменде ламо тонавтницят. Те уш сонзэ начальной классонь кеменце набор. Кеветее иеть вети эрзянь кель 2-3-4-це класстнэсэ. Васня, кода мерсть тензэ ушодомс ветямо тиринь кель, талнозевсь. Кармась вешнеме эрявикс материалт, литература. Прясонзо аравтызе-ладизе, кода ютавтомс уроктнень мельстуицякс, ды тевезэ сыргась.
Тонавтыцясь эйкакшонзо марто свал яви мель эрьва кодамо пелькстамотнес ды конкурстнэс. Эрьва ие тонавтницянзо лиснить изницякс республикань ды весероссиянь пелькстамотнесэ, эрзянь келень олимпиадатнесэ. Теде башка, Е. А. Великанова тевс нолды исследовательской важодеманть.
Сонзэ классо теевсь паро коекс пурнамс вастовомат содавикс ломантнень марто (писательть, поэтт, Ине Отечественной войнань ветерант, МЧС-нь важодицят ды седе тов). Елена Александровна свал сайни эйкакшонзо выставкав, театрав, музеев, ютавтни эрьва кодат экскурсият, творческой конкурст. Ардтнить паломникень экскурсиява, эйкакштне пек вечкить Инечиде мейле недлястонть якамо церьковав чавомо баягасо.
Елена Александровнань тонавтницянзо зярдояк а аштить тевтеме. Весе сынь яксить спортонь, музыкань ды художественной секциятнес, кружоков. Сонзэ сеедьстэ савкшны некшнемс эйкакшонзо марто театрасо, музейсэ ды лия покш кенярксчисэ.
– Елена Александровна, косто саевсь эйсэнк театрантень истямо покш вечкемась?
– Театранть вечкса вишка пингестэ саезь. Ды кода-бути истя ладявсь – тонавтницятнень марто свал якатано спектаклянь ваномо. Эсень эйдень мартояк яксинек. Ней театрась – эрямонь пельксэм. Бажан а менстямс вейкеяк премьера! Содасынь ламо артисттнэнь, сынь кармасть тень малавикс ломанекс, вастовомсто кортнетяно. Ней вана Эрзянь ды мокшонь национальной драмтеатрась путызе М.П. Девятаевде «Побег из ада» спектаклянть. Сонзэ эряви ваномс школасо тонавтницятненень, од ломантненень. Минь касынек те произведениянть лангсо! Девятаевень подвигте книгась ульнесь малав эрьва кудосо, аштесь неявикс таркасо ды ловнозель аволь весть-кавксть. Ледстнян, кода тешкстынек Ине Изнямонь 30 иетнень. Кодамо покш кенярксчи ульнесь! Те арази стувтови?
Е. А. Великанова ламо иень перть парсте важодеманзо кисэ тешкстазель аволь весть. 2006 иестэ сонензэ максозель РФ-нь Президентэнь грантось, лиснесь Россиянь сехте вадря тонавтыцянь конкурсонь изницякс. 2013 иестэ казезь Саранск ошонь Администрациянь прявтонь грантсо. Теке жо иестэнть невтизе прянзо «Иень тонавтыця» ошонь конкурссо, косо лиссь лауреатокс «Сердце отдаю детям» номинациясонть. 2014 иестэ лиссь изницякс республикань тонавтыцятнень ютксо, сон казевсь МР-нь Прявтонь Грантсо. 2015 иестэ казевсь «МР-нь заслуженной тонавтыця» лемсэ. Трудонь ветеран. Весе содатано, кодамо аволь шожда учителень профессиясь. Эрявить ламо вийть, превть, цидярдома ды васенце таркасо – эйкакштнень вечкемась. Апак сёпо мертяно, весе неть ёнкстнэ улить минек героинясонть.
Истят тонавтыцятне, кода Елена Александровна, кастыть алкуксонь ломанть, тиринь масторонь вечкицят, превейть, арсицят. Сонзэ тонавтницянзо а стувтнить эйсэнзэ, лембестэ ледстнить ды ёвтыть сюкпрянь валт. Ламо ашти седе, мезе тон путат эйкакшонть оймес.
Тонавтыцянь тевтнеде башка, Елена Великанова кармась волонтёрокс. Весемесь ушодовсь 2018 иестэ ютавтовиця Футболонь коряс чемпионатсто. Сон важодсь стадионсо стюардокс. Ней сови Мордовиянь культурань волонтёртнэнь юткс. Республикань покш кенярксчитнестэ свал важоди волонтёрокс: васты инжеть, лезды тенст, пшкадят – ды а ёмат.
Елена Александровнань неемстэ свал кевкстнян, косто сон сайни вийть, кона шкане эрьва ков кенери? Валонзо коряс, весе те ютась тетянзо-аванзо пельде. Кадык мади пелеветь, стякшны свал ранаяк. Авазояк ульнесь эрьва ков кенерицякс, валске марто сыргозят – пряканзо уш анок пидезь столь лангсот, банкасо пекстазь салтозь куярт-помидорт. Кона шкане оймсиль, кияк эзь сода.
Елена Александровнань ды мирдензэ Сергей Ивановичень кавто эйкакшост. Сынь аштить кувалмаст мельспаросо ды каштанчисэ. Андрей цёраст прядызе Н. П. Огарёв лемсэ МГУ-нть, важоди «Мордовия Аренасо» прявт агрономокс. Дарья тейтерест тонавтнесь Санкт-Петербургонь Театральной искусствань академиясо, ней важоди теке ошсонть «Буфф» музыкально-драматической театрасо актрисакс. Великановтнень колмо нуцькаст: Анна, Валентина ды Захар. Сынь лемдезь бабаст-сырькаест-покштяст лемсэ. Одтнэнь ульнесь покш мелест максомс истят лемть, кияк эйсэст эзь кармавто. Ды те пек кецявты малавикстнэнь. Юткошкастонзо Елена Александровна пек вечки аштеме нуцьканзо марто. Анянь марто уш яксить театрава. Каникуласто капши ардомо Питерэв, косо учи эйсэнзэ Валентина нуцькинезэ.
Октябрянь 29-це чистэ Елена Александровна тешкстызе 60 иень юбилеензэ. Покш семиясь пурнавкшнось вейс.
«Эрзянь правдань» коллективенть пельде весе седейстэ арсетяно кеме шумбрачи, уцяска, вечкема, икелев молемань тевть, паро ёжо, мелень топавтома!
Татьяна Маторкина