Михаил Соломкинэнь аволь весть савкшнось некшнемс эрьва кодамо кенярксчисэ. Сон свал эрси кедьчелькев ломанень выставкасо, косо невтни кшнистэ теевксэнзэ.

Лия ёнов а молиця теевкст-казнеть: кшнинь псакинеть ды кискинеть, эрьва кодамо профессиянь ломанть, чарыця-велиця ракшат, автомобильть, танкт, самолётт… Мезть ансяк арасть! Кода ды мейстэ сон сынст тейни? Те аволь шожда ды мельстуиця тевдензэ пачтясь минек газетанть туртов.

Михаил Викторович чачсь 1982 иестэ Дубёнкань райононь Дубёнки велесэ. Школанть прядомадо мейле тонавтнесь М.Е. Евсевьев лемсэ МГПУ-нь (сестэ – МГПИ) филологиянь факультетсэ. Кемень иень перть эрясь минек масторонь лембе ёнкссо. 2017 иенть прядовомсто семиянзо марто велявтсь Мордовияв. Сон арсезевсь, мезе тесэ карми тееме, ков моли важодеме. Умок ульнесь мелезэ ушодомс тейнеме мезеяк эсензэ кедьсэ. Художественной ушодкс потсонзо ульнесь. Кавто иеть яксесь тиринь велесэ художественной школав. Васня арсесь тейнемс дизайнерской тевть: кшнистэ част, светильникть ды ламо лия мезе.

– Михаил, кода весемесь ушодовсь?

– Монь ули ялгам, кона пек малавикс автомобилень тематикантень. Роботы автосервиссэ. Сонзэ кедьсэ улемстэ свал пильге ало понгонить кшни пелькст. Ванан лангозост ды неян ломанень чачот, рунгот. Карминь вешеме сынст эстень. Ушодынь якамо металлобазава кшни пельксэнь вешнеме. Рамсинь сынст автосервисстэ ды металлобазасто. Вишка кшни пелькстнэнь лангсо тонавтнинь тейнеме васенце важодематнень. Самай те шкане ошсо мольсть покш анокстамот Футболонь коряс масторлангонь чемпионатонтень. Ульнесь мелем теемс футболонь темань коряс оска марто ломаннеть. Теинь команда. Истя ушодовсь весе. Чемпионатонть шкасто сувенирэнь марто аштинь парксо. Теевксэнь сестэ ульнесть аволь пек ламо: футболсо налксицят, вишка ракшинеть. Тосо аштинь лия кедьчелькев ломантнень марто, учинь туристт ды ярмакт (пейди). Ансяк туристтнэ эзть рамсе. Мекс? Вана тень эзия сае мельс, омбо масторонсетне ливтить самолётсо, се шкане тов эзь мереве саемс мартот кшни, сулика, керамика. Лия шкане меревсь, ней эзть нолда. Чемпионатонть шкасто пштистэ весементь мельга вансть. Мейле лия матчтнесэ ульнесть ламо инжеть эсенек масторсто, конат сакшность машинасо. Сынь аламодо рамсесть-сайнесть.

Ярмункасо теевинь содавиксэкс мастертнэнь марто. Карминь содамо, весе сынь кизна ардтнить эрьва кодамо кенярксчива, невтнить ломантненень ды микшнить важодевксэст. Эйсэст тердтнить эли сынсь вешнить истят таркат.
Вейке ковонь ютазь чарькодинь, ломантне тенень явить мель. Кармасть путомо превс ды ёвтамо мелест-арсемаст. Кие пурны-кочкси кискинеть, кие веши псакинеть. Эрьва чи сёрмалинь эстень, мезе вешсть-кевкстнесть ломантне, мезе тенст эряви.

– Кода кшнистэ лиси алкуксонь казнесь-теевксэсь ды мезесь сехте стака те тевсэнть?

– Гайкань, болтонь, автозапчастень пелькстнэнь педявтнян сваркасо – истя лисить сувенирт. Сынь весе кшнинь ды артозь краскасо. Толковаса: теят гайкасто-болтсто ракша эли кодамояк профессиянь ломань. Снартнян невтемс башка тешкстнэнь те эли тона техниканть эли профессиянть, конань эряви невтемс казнесэнть, штобу сеске содаволь. Теемась аволь кувать, зярдо чарькодят – мезестэ теемс ды кода теемс. Автозапчастенть лангс ваномсто, сеедьстэ сеске уш неят ракшань фигуркат. Сехте стака важодемс индивидуальной заказтнэнь марто. Саемга, ней вешсть теемс французонь бульдог. Кисканть эно тейса, а кода невтемс истя – самай те французонь бульдог? Арсят атрибутиканть лангсо. Содат, кодамо гайкасто-болтсто теемс ломанень чачонть. Ней уш аволь стака теемс кодамояк профессиянь ломань. Шкась моли, кедесь тонады, теевкстнэ шождалгадыть. Электрикенть эли гитаристэнть тейсак. Башка (эксклюзивной) заказтнэнь стака теемс. Аволь умок вешсть Ульяновскоев ИЛ-76 самолёт-сувенир. Кавто чис теевсь. Ансяк теде икеле недля ванынь Интернетсэ, кодамо сон. Эрьва техниканть улить эсензэ содавиця тешксэнзэ: зяро чарынзэ, двигателензэ, ванынь, кодат сёлмонзо ды лия пельксэнзэ. Самолётось зярс-бути аштесь выставкасон, весе ванность ды содызь сонзэ. Вешекшнесть Т-62 танк. Эряви тешкстамс прявт ёнкстнэнь, ломанесь содавлизе ды кецяволь. Ламот вечкить чарыця-велиця теевкст. Саемга, танконть прязо чараволь, панжоволь машинань капотось, багажникесь, фотоаппарат теят – объективезэ велявтневезэ. Динамика улевель.

– Косто сайнят кшнитнень?

– Недлязонзо весть якан металлобазава, вешнян ды рамсян кшни пелькст, конатнень лия ёнов а молиця формаст. Кандан мастерскоев. Ламо ярмакт ютыть тень лангс. Ломантне те шкас а чарькодить, мон миян аволь чаво болтт ды гайкат, миян эсь творческой меленть. Сынст лангс ютавтынь вием, шкам. Лиясто рамсицятне мерить: пек тусь мелезэнь, ансяк пелян рамамс казнекс: секень вант, а туи мельс, а чарькодьсызь казненть. Эстень саевлия. Конась эстензэ кочкси, а ваны питне лангскак. Мелезэнзэ тусь ды сайсы. Зярдо казнекс – арсезеви.
Михаилэнь теевксэнзэ ютксо – мотоциклат, самолётт, танкт, эрьва кодамо сферань машинат. Тейни органайзерт: ручкань, телефононь, пилексэнь-кедьксэнь путомкат (подставкат), штатолонь путомкат, кодамояк темас казнеть.

Васенце иестэнть сон аштесь теевксэнзэ марто парксо, невтнесь ошонь покш читнесэ, мейле ардтнесь райононь кенярксчитнева, фестивальга, ярмункава. Валонзо коряс, те тевсэнть покш ярмакт а теят. Но ули эсеть юткошкат, тонсь азорат эсеть лангсо. Яват мель сенень, мезе вечкеви. Михаил Соломкин весе важодевксэнзэ невтни социальной сеттнесэ. Тосояк эряви чарькодемс, кода путнемс ды невтемс. Кода теемс истя – ламо ломанть неевлизь-ванновлизь теевкстнэнь. Интернетсэяк улить башка салавачить.

– Вечкан эксклюзивной заказт. Мезе ансяк а сы ломантнень превс, мезе ансяк а теевтить. Кадык стака, теде а тандадан, тень вельде тонавтнян. Веньберть а удат, арсят, кода теемс, кода мазылгавтомс. Кастат ёрокчить. Кой-кона теевкстнэде теян зярыя. Ломантне фотонь коряс вешить одс теевтемс тень эли тонань. Эстеньгак кадан, мельсэ кирдемс, кода теия. Теемадо икеле ломантнень марто парсте кортасынек весе элементтнэнь. Лиясто сынсь лездыть, кодамо тешкс седе паро ули путомс.

– Кодат лия ёнов а молиця теевкст тейнить?

– Сехте покшось – кубокось, Московов тейния. Кавто кедть кирдсть шар – Мода планетанть. Подшипник лангсо шарось велясь. Сталмозо – 15 кг. Мельспароль теемс «Катюшат» (боевой машинат). Вете тейнинь. Покш пря коршось ламонень тусь мельс. Ульнесь ардтниця вишка паровоз. Ламо эрьва мезть. Сехте покш питнейчись неть тевтнесэ – те лия ёнов а молиця казнеть. Казнень рамицясь чарькоди, сон дивавтсы ломаненть. Вечкан кенярдовтомс ломантнень, кинень алтави. Истямо казне костояк а муят. Валске ланга молят мастерскоев ды а содат, мезе тонь лиси чокшне ёнов. Мейле истя кецнят, зярдо кшнистэ лиси алкуксонь теевкс!

– Косо тейнят, ули мастерскоеть?
– Эсень мастерскоем арась. Ней важодян сиведезь гаражсо. Ули сваркань аппаратом, дрелем ды болгаркам.
– Михаил, кодамо ёнкска ардтнить выставкав?

– Шабра ёнкска: Пензань, Нижнеень, Ульяновскоень областька. Эряви меремс, лия ёнкссо ды тесэяк ярмункасо аштемга эряви пандомс башка ярмакт. Сынь ней весе коммерческойть. Аламо истят таркат, косо а вешить ярмакт. Ламо стакачить сбытэнь коряс, седеяк пек ней, карантинэнь шкасто. Содан, Пензань ды Нижнеень ёнкстнэсэ улить мастертнэнь ассоциацият. Сынь вейсэ важодить теевкстнэнь миемаст коряс. Вешнить мероприятият, ков теевтить мастертнэнень квотат. Минек мезтькак истят арасть. Весе ськамост-ськамост. Таркаяк истямо арась, косо питневтеме аштевлинек ды миевлинек теевксэнек (ансяк ошонь кенярксчитнесэ стякодо).

– Кодат мелеть-бажамот седе тов?

– Арсян весе те тевенть поладомс. Пароль бу муемс ошсо кодамояк гараж, теемс эсень мастерскоекс, тердтнемс тов инжеть. Ветнемс эйкакшт. Рамамс эштё станокт. Прясон ламо мельть, ансяк эрявить ярмакт. Пандемияськак пек токшинзе мастертнэнь. Весе пекстазель, мезтькак эзть ютавтне. Монь койсэ, ярмункатне максыть творческой касома. Ванат, мезе теить лиятне, мезе вешить пельдеть ломантне.
Вана истя кшнинть туртов ушодови омбоце эрямо. Кие лемди тень индустриальной творчествакс, кие лофтокс. Михаил Соломкин минек ёнкссо ськамонзо, кие яви мель те аволь шожда тевентень. Сонзэ кедьсэ теезь казнетне кецявтыть эйкакштнень ды покш ломантнень. Кецявтыть эсензэ авторонтькак. Бути тевесь тукшны мелезэть – весемесь изняви. Кинь ули мелезэ теевтемс казне, пшкадеде Михаилнэнь, сон тенк лезды. Интернетсэ курозо: https://vk.com/ot_vinta_rm


Татьяна Маторкина