Алексей Михайлович Адушкин «Тепличное» АО-со важоди уш зярыя иеть. Неень шкане цёрась топавты 3-це № цехень прявтонь тевенть. Ды эряви меремс, те цехень теплицатне предприятиясонть сехте покшт – целанек саить 10 тёжат гектарт. Важодицятнеде лововить 165 ломанть.

– 3-це цехсэ прявтокс важодян 2020 иень декабрянь 31-це чистэ саезь, теде икеле вете иеть топавтынь 4-це цехень прявтонь тевенть, – ёвтни Алексей Адушкин. – 2021 иенть перть минек цехсэ саезь 13 тёжат 470 тоннат продукция. Эряви меремс, иесь ульнесь вадря, урожаесь пек пароль. Бути ваномс невтематнень, 3-це цехсэ истя ламо эмежть пурназельть васенцеде. Те иестэ неть невтематнестэ арсетяно а кадовомс, карматано тееме весементь, штобу минек важодемань невтематне кенярдовтовольть.

3-це № цехень теплицатнесэ седе покш пельксэсь максови куяртнэнь кастоманть алов, улить помидорткак. Кода тешкстызе цехень прявтось, кизна тесэ кастсть розовой помидортнэнь.

– Меельце иетнестэ предприятиясонть весемесь пек полавтовсь: технологиятнеяк, важодемань условиятнеяк. Ды неть полавтоматне весе ансяк вадрянть ёнов.

Ёвтавлинь коллективенть лангаяк. Сон тесэ пек вадря. Важодтяно ояксчисэ, вейке-вейкенень лездазь. Миненек свалшкане сыть од важодицят ды сынст мартояк кодаткак стакачить а лиснить. Минь тенст весть-кавксть весементь невтьсынек-толковасынек ды уш зярыя чинь ютазь роботыть, мерят, ламо иеть уш тесэть. Паряк, те ояксчись ды вейке-вейкень чарькодемась лездыяк предприятиянтень свал улемс васенцетнень ютксо. Эдь вадря коллективенть невтевксэнзэяк вадрят, – кемекстызе Алексей Адушкин.

Эряви тешкстамс сеньгак, Алексей Михайлович – ламо эйкакшонь тетя, вечкиця ды кемевикс мирде. Адушкинтнэнь семиясо касыть вете эйкакшт – колмо тейтерькат ды кавто цёрынькат. Ды весе юткошканзо цёрась яви эсь семиянтень. Сон корты, эрямосонзо ули сехте прявтось – покш семия ды вечкевикс важодема.

Юлия Еремина
Фотось: Э.Ретунский