Воскресенье, февраля 28, 2021
Важное

Лямбирень районсо «Малое и среднее предпринимательство и поддержка индивидуальной предпринимательской инициативы» нацпроектэнь «Агростартап» программанть коряс грантт максовсть крестьянонь-фермерэнь хозяйствань кото азортнэнень. Сынст ютксо – Алексей Елфимов. 

Грантонь ярмактнень лангс сон рамась голштино-фризской породань кеветее скалт, пресс-подборщик, тикшень ледемка ды пурнамка, скалонь потявтомань туртов эрявикс кедьёнкст. Теке марто сиведсь кавто важодицят.

Ловсонь нолдамонь ёнксось, конань кочкизе Алексей Елфимов, течинь чине пек эрявикс. Ансяк вана цёрантень эстензэ савсь теевемс весемесэнть чарькодицякс ды докакс. Тонавтнесь строямонь тевентень, скалтнэнь потявтомо ды ваномо, ветеринаронь содамочитнень.

– Мон чачинь ошсо, тетям-авам жо ульнесть Ицяло ёнксонь Ламбаське велестэ. Тосо эрясть покштям ды бабам, ды весе вишкапингем ютась те велесэнть, – ёвтни Алексей. – Ансяк ушодовиль кизэсь, ускилимизь тов, ды тосо эринь сёксенть самс. Ды, эряви меремс, тосо весементень тонадыньгак, теньстэ, паряк, весемесь ушодовськак. Иван покштям свал сайнилимим скалонь ваномо, ёвтниль-толковиль, кода ветяма ракшанть марто прянть, кода чарькодема сонзэ ёжонзо. Ды неть ёвтнематне кеместэ озасть превезэнь.

Школадо мейле цёрась прядызе Мордовиянь Гуманитарной институтонть, получась экономистэнь ды налогонь тевтнень коряс важодицянь специальность. Мейле служась армиясо ды тосто самодо мейле варчнизе эсь прянть эрьва кодамо тевсэ. Ансяк вана мезес а кундыль, весемесь ульнесь аволь мелензэ коряс. Пек бажась роботамс мода лангсо, трямс ракшат. Ды сисемшка иеде икеле арсесь-тейсь ды рамась модань участка Лямбирень райононь Щербакова велестэ. Велесь ашти Саранскоенть эйстэ аволь васоло, эрицятнедеяк тосо ламо. Мекс бу а трямс ракшат? Васняяк стявтсь кардо, рамась колмо букинеть. Ды теньстэ ушодовськак. Аламо шкань ютазь рамась эштё вазнэть ды букинеть, ракшатне седе ламолгадсть. Тевесь аламонь-аламонь сыргась.

Ракшатне ламолгадсть, эрявсь теемс эштё вейке кардо, ней уш седе покш. Теке шкастонть Алексей Елфимов сайсь арендас ниленьгемень гектардо ламо мода, косо касты тикше, конась саты аволь ансяк эсь хозяйствантень, кадови миемскак. Истя жо тевтнень теемга рамась трактор. Эрявикс техникавтомо мода лангсо важодемс а кода.

– Моданть лангс виднян ансяк тикше, сюронть зярс савкшны рамамс, – корты Алексей. – Нама, седе паро, бути сюроткак ули эсеть. Ансяк вана тень коряс зярс улить мелявкст. Эдь сюронть кастомга эряви эштё лия техника – видемка, пивсэма комбайна, сюронь ванстоманть туртов утом. Весе тень лангс эрявить ярмакт, ды аволь вишкинеть.

Телентень фермерэсь анокстась кода эряви – тикшеденть сатышка, вешнесь таркат, косто ускить фуражонть, силосонть, жомонть.
– Течи хозяйствасонть ловови 21 скал, зярыя букат ды вазт. Пелест вазтнэнь миинь, лиятнень жо кадынь эстень, карман ламолгавтомо поголовиянть, – ёвтни фермерэсь. – 2018 иестэ «Агростартап» программанть коряс изнинь грант ды раминь голштино-фризской породань скалт. Сынст андома вадря ды эрьва кодамо коромдо. Ансяк сестэ неть скалтнэнь пельде саят ламо ловсо. Кизна сынь максыть малав 40 литрат. Мон а стяко ютавтынь шка истямо породанть вешнемга. Вадря хозяйства тееви ансяк сестэ, бути ули паро материал. Теке шкасто тонсь весементь парсте содасак ды чарькодьсак. Монь жо икелепелев ламо арсеман ды хозяйстванть виевгавтомга мелень.
Маласо шкастонть Алексей арси ламолгавтомс потявтовиця скалтнэнь кавксть эли колмоксть. Ды теемс тень бажи уликс скалтнэнь вельде.
Цёрась ёвтни, грантонь получамосо течинь чине арасть кодаткак покш стакачить. Улезэ ансяк бажамо.

– Грантонть получамосо монень пек лездасть Лямбирень райононь Администрациясь ды Мордовия Республикань Велень хозяйствань ды продовольствиянь министерствась. Лездыть сынь нейгак. Свал гайневтить, кевкстнить, кода молить тевтне. Бути улить кодаткак кевкстеман, монгак апак кавтолдо молян, пшкадян. Эряви ветеринар, гайневтян, кучить специалист.

Велень хозяйствань министерствась лездась тень содамочитнень кастомасояк. Грантонть получамодо мейле сынст кедьсэ ютынь курсат. Тосо макссть фермерэнь тевсэнть седе эрявикс содамочить. Минь тонавтнинек ракшатнень трямонь-кастомань ёнкстнэнь, андомань тевтнень, ветеринариянть. Аламонь-аламонь эряви содамс весементь. Эдь бути скалось карми вазыямо, ветеринар тонеть лездамо а сы, эстеть эряви содамс, кода весементь теема, – корты Алексей.

Кода уш тешкставсь икеле, Елфимов кочкизе ловсонь нолдамонь ёнксонть. Весе продукциянть (ловсонть ды топонть) фермерэсь уски Саранскоев ды истя жо мии Щербакова велень эрицятненень. Тень коряс кодаткак стакачить а эрсить. Кода тешксты Алексей, вадря продукциянть рамицянзо ульнесть ды кармить свал. Ды те алкукс истя. Неень шкане, зярдо конкуренциясь пек покш, беряньстэ важодиця производствась эсь рамицятнень ёмавтсынзе курок. А бути саемс минек республиканть, косо велень хозяйствань продукциянь нолдыця-анокстыця производстватнеде знярыя эрьва районсонть, лиякс а кода. Ули мелеть ванстомс эсь хозяйстванть, кармат важодеме кода эряви.
Кемтяно, фермерэнть Елфимовонь весе арсеманзо топавтовить. Тень туртов од цёрась а пели стакачитнеде.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».