Воскресенье, февраля 28, 2021
Важное

Кавксоньгемень колмо иень перть минек масторсо юты «100 лучших товаров России» Программанть пелькстамось. Мордовиясь свал невти эйсэнзэ эсь прянзо, ютавты «Лучшие товары Мордовии» лементь ало пелькстамонь региононь этапонть.

Неть иетнень перть республикань конкурсонь участникекс кармасть 350 ламо предприятият ды организацият, конатне невтизь 1500 ламо товарост ды услугаст. Тедеде конкурсонь комиссиясь ванкшнось 24 предприятиятнень ды организациятнень пельде 90 яволявтомат. Федеральной этапонтень кучозельть 25 яволявтомат кеветее предприятиянь пельде. Сынь весе кармасть 2020 иень «100 лучших товаров России» пелькстамонь лауреатокс ды дипломантокс. Мордовиянь кавто предприятиятне – «Рузово» ЗАО-сь ды «Авангард» ООО-сь – саизь сехте покш казнетнень: васенцесь – «Лидер качества» лементь, омбоцесь – «Вкус качества» казненть «Добрый фермер» саразонь алтнэнь кисэ.

Ютазь недлясто Мордовиянь Торгово-промышленной палатасо ютась «Мордовиянь сехте вадря товартнэ» 2020 иень изницятнень каземань торжественной промксось, козонь сакшность Мордовиянь Промышленностень, наукань ды од технологиянь министрань васенце полавтыцясь Сергей Кулебякин ды «Мордовский ЦСМ» ФБУ-нь прявтось Сергей Мунтанилов. Васенцекс тешкстазельть Россиянь конкурсонь изницятне: «Рузово» ды «Авангард» предприятиятнень прявттнэ Алексей Лапшин ды Василий Бурмистров. Сыненст жо максозель «Золотая сотня» башка дипломось. «За достижения в области качества» Почетонь знаксонть казезь «Саранский» консервань заводонь исполнительной директорось Николай Салмов (фотосонть).

Мордовиянь Прявтонть Указонзо коряс «Мордовия Республикань каштанчи» Почетной казнесь максозель РМ Рейл «ВКМ-Сталь» предприятиянтень. «Лидер качества Республики Мордовия» лемсэ казезель «Сармич» сырань теиця заводось.
Россиянь сядо сехте вадря товартнэнь юткс совасть Саранскоень консервань заводонть, «Сармич» сырань теиця заводонть, «Рузово» ды «Авангард» предприятиятнень, Саранскоень ликероводочной заводонть, «Ромодановосахар», «Надежда», «Новомилк» заводтнэнь ды Петр Екатеринин ИП-нть продукцияст. «Продукция производственно-технического назначения» номинациясонть изнясть Ардатовань светотехнической заводось, «Электровыпрямитель» предприятиясь, «ВКМ-Сталь», Сергей Адушкин ИП-сь ды Саранскоень автосамосвалонь заводось.
«Услуги для населения» номинациясонть изницякс лиссь Республикань 5-це № клинической больницясь (прявт врачось – Анатолий Пинямаскин).
«Мордовский ЦСМ» ФБУ-нь прявтось Сергей Мунтанилов явшинзе казнетнень «Мордовиянь сехте вадря товартнэ» конкурссонть изницятненень. Продовольственной товартнэнь ютксо сехте парокс ёвтазельть «Атяшевский» оень теиця заводонть, «Ламзурь» кондитерской фабриканть ды Новотроицкоень «Колобок» пекарнянть продукцияст. «Продукция производственно-технического назначения» номинациясонть изнясть «ЭМ-КАБЕЛЬ», «Магма», «Ксенон» ды «Мордовцемент» предприятиятне. Сехте вадрясто эсь услугаст эрицятненень максыть Саранск ошонь 2-це № эйкакшонь поликлиникась ды Шожда атлетикань коряс олимпийской резервань школась.

Неть конкурстнэ кортыть седе, республикасонть поладовить инновационной проекттнэнь топавтоматне, тееви од продукция, конась явови эсь парочисэнзэ. Эпидемиологической обстановканть лангс апак вано, предприятиятне ды организациятне кастыть-кемекстыть невтевксэст ды а пелить конкуренттнэде кода минек, истя омбо масторонь рынкатнесэ. Республиканть пек покш виезэ промышленностенть ды велень хозяйстванть коряс.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».