Ицялонь центральной районной больницясо панжсть мемориальной лаз прявт врачонь полавтыцянть В. В. Леушкинэнь ды медицинской сестранть Е. А. Винтинань лемс. Кавонест сынь кулость коронавирусонь инфекциядонть – иеде икеле, мельга-мельцек чинь ютазь.

Лазонь панжомасонть ульнесть сынст малавиксэст, ояст, вейсэ важодицят. «Неень шкас маряви: вана планёркадо икеле нейке сови Владимир Владимирович, кода свал, весемеде икеле. Ие – те, нама, ламо, ансяк кодаяк а кемеви, сынь арасть ютксонок», – видькстась прявт врачось Ю.В. Шалятов. Сонзэ валонзо коряс, мемориальной лазонть Саранскоень мастерскоень специалисттнэ теизь уш зярыя ковдо икеле, ансяк панжоманть кадызь сынст ледстнемань чинтень.

Ицялонь райононь больницяв В. В. Леушкин сакшнось 1985 иестэ, важодсь врачокс – психиатракс-наркологокс. Мейле кавто иень перть ульнесь Гигиенань ды эпидемиологиянь центрань прявтокс. 2011 иестэ саезь важодсь нурька шкас важодеме амаштовицятнень экспертизань коряс прявт врачонь полавтыцякс. Истя жо ульнесь райононь призывной комиссиянь старшей врачокс. 2020 иень сентябрянь 1-це чистэ Владимир Владимировичнень топодекшнесть 60 иеть. Кулось жо теке иень октябрянь 28-це чистэ.

Теке жо иень октябрянь 29-це чистэ Республикань инфекционной больницясо коронавирусось саизе эрямонзо медицинской сестранть Е. А. Винтинань. Сонензэ ульнесть ансяк 48 иеть. Ицялонь райононь больницясо Елена Александровна важодеманзо ушодокшнызе 1992 иестэ саезь. 17 иеть ульнесь инфекционной отделениясо медсестракс, эштё 11 ие – фтизиатрической кабинетсэ медсестракс. Мартонзо вейсэ важодицятне ледстнить эйстэдензэ, кода тевензэ парсте содыцядонть ды вадря ломанденть.