Ютазь недлячистэ Саранскоень «Мордовия Арена» стадионсонть футболсо налксесть СВО-нь участниктнень эйкакштне. Од футболисттнэнь марто паксянтень лиснесь Мордовиянь Прявтось Артём Здунов.
Эйкакштне сакшность стадиононтень региононь Прявтонть тердеманзо коряс. Сеть инжетнень туртов, кить стадионсонть ульнесть васенцеде, ютавтозель экскурсия, невтезельть весе раритеттнэ ды Чемпионатонь музеесь. Матчонь участниктнень ютксо – СВО-нь участниктнень эйкакштне, эсь тетяст кувалма каштанчисэ аштезь, сынь лиссть паксянтень формасонть, конань лангсо сёрмадозель: «Монь тетям – герой! Эсенексетнень а кадсынек». Эряви тешкстамс, налксесть аволь ансяк од цёратне, истя жо тейтерькатнеяк эзть кадовкшно эйстэст. Од налксицятнень ютксо ульнесть сетнеяк, кинь тетяст маштовсть нацисттнэнь каршо тюремасонть. Захар ды Дмитрий – Чаунзань районсто Александр Александрович Лысяковонь цёранзо, сон чавовсь ютазь иень июньстэ ды Россиянь Президентэнть Указонзо коряс куломадонзо мейле казезь Мужествань орденсэ. Цёратне ёвтнесть, тетяст ульнесь футболонь вечкицякс ды эйкакштнененьгак максовсь те пек виев вечкемась – кода тетяст, «сэредить» «Спартаконть» кисэ ды покш мель марто налксить футболсо. «Тавла» образованиянь центрастонть Вероника ды Виктор Исайкинтнэ – кадровой военноенть, полковникенть Виктор Иванович Исайкинэнь эйкакшонзо, сон куломадо мейле казезь Мужествань орденсэ. Вероника налксесь цёрынькатнень марто вейсэ. Эряви тешкстамс, ортатнень истя жо ванстсь тейтерька – София.
Кеветее од футболистт, кинь тетяст стясть минек Чачома масторонь рубежтнень ванстомантень, лиснесть спортонь аренантень Мордовиянь Прявтонть, региононь Правительствань члентнэнь ды Мордовиянь футболонь ветерантнэнь марто вейсэ.
Налксеманть прядовомадо мейле матчонь весе участниктненень максозельть Мордовиянь Прявтонть пельде ламбамо казнеть ды покш торт! Артём Здунов алтась, Мордовиянь футболонь лиганть лувсо СВО-нь участниктнень семиятнестэ эйкакштнень марто матчтне кармить ютавтовомо свалшкане. «Минек уш улить зярыя турнирт, конат алтазь земляктнень ледстнематненень, кить маштовсть служебной долгонь топавтомсто. Течи недлячи, свалшкань эрямосо тетясь сайсы эйкакшонть ды моли мартонзо налксеме футболсо. Ней тетятне фронтсот, секскак саинек тень эсенек лангс – тердинек эйкакштнень, вейсэ налксинек футболсо. Ды истят турнирт эряви ютавтомс эрьва районсо, седе тов Мордовиянь футболонь лиганть лувсо ютавттано выездной пелькстамот».