Пётр Семёнович Прокин – республикасонок ды сонзэ томбале содавикс спортсмен, аволь весть лиснесь чемпионокс шожда атлетикань коряс пелькстамотнесэ. Сон – Покш Березникень ДЮСШ-нь прявт, аволь ансяк сонсь эрямонь шумбра лувонть ветиця, лиятненьгак тенень тонавтыця.
Пётр Семёнович вети покш общественной робота. Ламо иеть сон – Эрзянь ды мокшонь раськетнень регионъютконь общественной вейсэндявксонь Покш Березникень организациянь прявт, те райононь ветеранонь организациянь руководитель. Кода течи эрить сеть ломантне, кить пингест алтызь тиринь таркасо важодемантень, мезе сынст течи талновты, ды кода сынь ютавтыть ютксо шкаст, теде тенек ёвтнесь Пётр Прокин.
– Пётр Семёнович, иенть ушодовомсто яла теить цётамот ютазенть коряс ды тешкстыть аравтлувт икелепелев. Кодамо тевсэ сон кадовсь ледстневицякс Покш Березникень ветеранонь организацияс совицятнень туртов?
– Алкукскак, ютазь иесь ульнесь сюпав ламо эрьва кодамо тевсэ. Миненек ледстневицякс кадови отчётонь-кочкамонь конференциянок. Сон невтизе минек организациянтень совицятнень эрязачист ды ответственностест.
Конференциянтень пурнавкшность 30 первичной ветеранонь организациясто 70 делегатт, конатнеде башка сакшность Покш Березникень муниципальной райононь администрациянь прявтось И. И. Игонов, социальной кевкстематнень коряс сонзэ полавтыцясь О. В. Губанищева, республикань Ветеранонь советэнь прявтонь васенце полавтыцясь А. И. Подкатов, райононь депутаттнэ, организациятнень ды учреждениятнень прявттнэ, велень поселениянь главатне.
Отчётонь докладсонть пачтявсь 2018-2023 иетнень перть ветеранонь организациянть важодемадо.
Тешкстаса, весе пшкадематнень, кевкстематнень, энялдоматнень коряс кемекстазельть ды анокстазельть мероприятият, кочказельть райононь ветеранонь организациянь прявтт. Минь покш мельспаросотано организациянтень покш питнень путоманть кис. Сюкпря ёвтан ялгатненень райононь ветеранонь организациянь прявтокс кочкамонть кисэ.
– Инескеть, ёвтнеде, зяро ломанть неень шкасто совить райононь ветеранонь организациянтень ды кодат комиссият эйсэнзэ течи важодить?
– Неень шкасто райононь общественной организациясь вейсэнди 4296 ломанть. Ветеранонь организациянтень совить 1119 трудонь ветерант, 63 тылэнь труженикть, войнань эйкакштнеде, вейсэ пенсионертнэнь марто – 1720 ломанть. Ветеранонь советс совицятнеде – 35.
Минек улить свалшкань важодиця 5 комиссиянок: организационно-методической (сонзэ прявтсо А. А. Тиханкин), военно-патриотической (В. Н. Кувелёв), социально-бытовой (Р. В. Макаркина), культурно-массовой (Г. Н. Денисова), медицинской (А. А. Кострикина).
– Пётр Семёнович, меельце иетнестэ общественной организациянк кассь, улить-арасть од первичкат?
– Эрямось юты икелев, пенсионертнэде велетнесэ аволь аламо. Тешкстаса, велетнева первичной организациятнесэ прявтокс ладятано васняяк сеть ломантнень, кить маштыть муемс кель-вал эрицятнень марто, парсте топавтыть эсь тевест ды свал анокт лездамс кажос понгозтненень. Истя, Симкинань первичной ветеранонь организациянть прявтокс кочкинек Г. И. Тетюшкинань, Прамзасо – А. П. Гаринань, Марьяновкань велень поселениясо – В. М. Чиндяскинэнь, Руз. Наймансо – Н. Н. Ёжиковань, «Школа № 2» ОСП-со –
Т. Н. Прокинань, Пермезь велесэ – Л. И. Славкинань, Эрзянь Наймансо – Т. С. Щербаковань, Присурский посёлкасо – П. Н. Кунаевень.
Ютазь иестэ теезельть ветеранонь первичной од организацият райононь администрациянь культурань отделэнть юрсо (прявтось Т. Б. Новикова), «Присурские вести» газетань редакциянть юрсо
( Н. М. Горяева), эрицятнень социальной ванстомань райотделсэ
(А. А.Тиханкин), Бузаёва велесэ
(Г. Л. Авдейкин). Кемтяно, первичной од организациятне кармить улеме паро лездыцякс икеле важодицятненень ды алкукс топавтсызь лангозост путозь весе тевтнень.
– Инескеть, пачтядо, кода ладяви важодемась ветеранонь организациясонть?
– Эрьва иестэ минь ютавтнетяно кавто пленумт, косо кортатано сехте эрявикстэнть ды аравтано икеленек од тевть. Мордовия Республикань Прявтонть МР-нь Госсобраниянтень ды весе республикань эрицятненень Кучоманзо коряс минь свал тешкстатано ветеранонь организациянть туртов мероприятиянь аравтлув. Невтемакс, ютазь иестэ райононь Ветеранонь советэнь бюронь заседаниясо ванкшнынек Мордовской республиканской ветеранонь общественной организациянь отчётно-выборной вейсэндязь 10-це конференциянь важодемань итогтнень.
Ютазь иестэ Покш Березникень райононтень топодсть 88 иеть, минек ветеранонь организациясь эзь кадово ве ёнов те кенярксов покш чинть ютавтомсто. Истя жо ветерантнэ невтизь ёрокчист финнэнь-угрань раськень весероссиянь омбоце форумсонть. Теевезь коень коряс, эрьва иень октябрясто минь тешкстатано Сыре ломанень ковонть, бажатано явомс сатышка мель пенсионертнэнень. Сехте пек ськамост эрицятненень ды сэредицятненень. Ветеранонь советэсь вейсэ культурасо важодицятнень, школасо тонавтницятнень марто важоди патриотизмань, Россиянь государстванть ванстомань ды тиринь ёнксонть вечкемань тематнень коряс. Покш путовксонок республикань «Сурский рубеж» военно-патриотической творчествань нилеце фестивалентень. Вейсэ Ицялонь ды Дубёнкань муниципальной районтнэнь марто анокстатано ветеранонь ды пенсионерэнь спартакиадат.
Ветеранонь первичной организациятнень прявттнэнь лезксэст вельде ютавтовить ламо мероприятият. Сынь алтавить Отечествань ванстыцянь чинтень, Тундонь ды Трудонь кенярксчинтень. Башка мель явови Изнямонь чинтень.
– Пётр Семёнович, кода Тынь вере тешкстынк, покш мель явтадо одтнэнь патриотической лувсо кастомантень. Меельце шкасто эштё кодат мероприятият ютавтыде Покш Березникень районсо?
– Виде, неень шкане те ёнксонтень минь явтано башка мель. А ёвтавияк, зяро мероприятият ютавтнетяно одтнэнь марто. Вере ледстязь кенярксчитнеде башка, ветерантнэ якить весе митингтнес, од ломантнень туртов алтазь культурно-массовой мероприятиятнес.
Минек районсо теевсь коекс шожда атлетикань коряс райононь велетнева чийнематне, Ине Отечественной войнасо маштовозтненень алтазь кеврунготненень цецянь, каштазонь путоматне. Невтемакс, Эрзянь Наймансо ютавтовсь республикань шожда атлетикань коряс чиема, кона алтавсь Отечествань ванстыцятненень. Эйсэнзэ виест невтизь спортсмент, боевой действиянь участникть, ветерант, кить сакшность Чаунзань, Отяжелень, Дубёнкань, Рузаевкань, Лямбирень, Орданьбуень, Кочкуровань районтнэстэ, Рузаевкасто ды Саранскойстэ.
Нама, сехте покш мель явтано специальной военной операциянь участниктненень ды сынст семияст туртов. Тешкстаса, малав весе велетнесэ кодыть алтымат, тейтерь-аватне, школасо тонавтницятне анокстыть артовкст, кодыть носкат-варьгат, теить окопонь штатолт. Весе, мезе вийсэнек, икелепелевгак карматано тееме ды лездамо минек военнослужащейтненень.
– Кода ладяви ветеранонь организациянть важодемась райононь прявтонть ды депутаттнэнь марто?
– Видьстэ меремс, тень коряс асатыкст арасть. Райононь ветеранонь организациянь бюронь члентнэ, ветеранонь первичной организациянь прявттнэ сеедьстэ вастневить эрьва уровнянь депутаттнэнь марто, сеедьстэ совсить организациянь ды учреждениянь прявттнэнень. Монень, кода Ветеранонь советэнь ветиентень, сеедьстэ савкшны вастневемс Покш Березникень райононь администрациянь прявтонть И. И. Игоновонь, сонзэ полавтыцянть О. В. Губанищевань марто. Сынь свал муить шка кунсоломс ды косо эряви – лездамс. Истя жо а кадновтано вановттомо МР-нь Госсобраниянь депутатонть Е. Е. Ледяйкинэнь ёндо, свал анок явомс тенек мель Покш Березникень депутатонь райононь Советэнь прявтось А. А. Топорков. Ютазь иестэ ветеранонь райсоветс пшкалесть 50 ламо энялдома ды кармавтома марто.
– Кодат кевкстемат сехте пек талновтыть Покш Березникень райононь сыре ломантнень?
– А мезть сёпомс, талновтыця кевкстематнеде аволь аламо. Ломантне пшкалить велетнесэ медпункттнэнь важодемаст коряс, сынст паролгавтомаст-витнемаст, ведень улеманть, Покш Березникень канализациянь сеттнень, китнень витнеманть, ялго ютамонь таркатнень улеманть ды истя седе тов.
Тешкстаса, ютазь иетнестэ минек районсонть аволь аламо теезель эрицятненень. Асфальтсо вельтязельть китне, ламо куротнесэ одкстомтозь тротуартнэ. Ветеранонь советс эрицятнень ёндо ламо пшкадемат ульнесть райцентрасо рынканть паролгавтоманзо коряс.
Те кевкстеманть коряс ютазь иень кизна Ветеранонь советэнь бюронть пельде анокстынек сёрма райадминистрациянь прявтонтень. Мельспарозонок, рынкань администрациянть ёндо асатыкстнэ витезельть, эрицятненень ды микшницятненень теезельть важодемань паро условият.
– Пётр Семёнович, Покш Березниксэ Тынь – спортонть алкуксонь вечкицятнестэ вейкесь, кода лия ветерантнэ совавтыть эрямос эрямонь шумбра лувонть?
– Виде, те тевесь монень ламо кементь иетнень перть пек вечкевикс. Спортонь минек весе пелькстамотнесэ ёрокчист свал невтить райононь ветеранонь президумонь члентнэ, рядовой ветерантнэ.
Районсонть важоди «Эрямонь шумбра лувонть кис» ветеранонь ды пенсионерэнь клубось. Сынст занятияст ютавтовить недлязонсо кавксть «Большеберезниковская ДЮСШ» МБУ-нь ДО-со. Ламот пенсионертнэ, ветерантнэ максыть ГТО-нь норматнень коряс экзамент, кемекстыть шумбрачист.
Ламо иес кадовсь ледстневицякс РФ-нь Пенсионерэнь 8-це спартакиадась, конась ютавтовсь Санкт-Петербургсо, косо 76 регионтнэнь ютксто минь саинек 11-це тарканть. Теде башка, республикань шахматонь коряс спартакиадасонть пенсионертнэ А. А. Тиханкин ды О. В. Крылова лиссть колмоце таркас.
Нурькинестэ, минек ветерантнэ тевтеме а аштить, сынь бажить шождалгавтомс кода эсест сыречист, истя жо максыть лезкс сетненень, кинень ней сон эряви минек а шожда эрямосонть.
Валентина Юдина