Неть читнестэ Мордовия Республикань Кудосо ютавтовсь МР-нь Государственной Собраниянь 7-це тердемань 33-це сессиясь.

Депутаттнэде башка тов сакшность МР-нь Прявтось Артём Здунов, МР-нь Правительствань Председателесь Дмитрий Поздняков, МР-нь Прявтонь ды Правительствань аппаратс совицятне, РФ-нь Государственной Думань депутаттнэ, республикань оштнень ды Мордовиянь муниципальной районтнэнь прявттнэ, министерстватнень ды ведомстватнень руководительтне ды лия ответственной ломанть.

Сессиянть панжизе ды ветясь МР-нь Госсобраниянь Председателесь Владимир Чибиркин. Чинь повесткас совавтозель 11 кевкстема. Кода свал, сехте покш мелесь явовсь 2024, 2025 ды 2026 иетнес республикань бюджетэнтень полавтоматнень совавтомадо кевкстемантень. Сонзэ коряс докладонть теизе МР-нь Финансонь министрась Сергей Тюркин. Сонзэ валонзо коряс, маласо шкасто седе ламо ярмакт явовить китнень витнемс, местной бюджеттнэнень судебной акттнэнь топавтомга лезксэнь максомс, промышленностьсэ тевтнень виевгавтомс, онкологиянь орматнень лецямс, стакасто сэредицятненень (инвалидтнэнень) лезксэнь максомс ды истя седе тов. Те кевкстеманть коряс толковамот тейсь МР-нь Госсобраниянь Бюджетэнь, финансонь ды налогонь коряс комитетэнь прявтось Светлана Киселёва. Сон тешкстась, бюджетэнть коряс кевкстематне теде икеле домкасто ванкшнозельть комитетсэ. Депутаттнэ те законопроектэнть кемекстызь.

Мордовия Республикань прокурорось Сергей Лапин пачтясь аттракционтнэнь тевс нолдамонь коряс законопроекттэнть. Сындест минек республикасо ведьгемень, мельгаст жо пшти вановт арась. Эдь кортамось моли эйкакштнень шумбрачист ванстомадо, депутаттнэ сонзэ кирдизь. Сессиясонть ванкшновсть лия кевкстематкак.

Правительствань чассто пурнавозтнень икеле доклад тейсь МР-ва МВД-нь министрась, полициянь генерал-майорось Юрий Поляков. Юрий Сергеевичнень максозельть кевкстемат, конатнень лангс сонзэ анокольть каршо валонзо.