Пятница, октября 23, 2020
Важное

Саранск ошсо ютась торжественной промкс, конась алтавсь пожарной службань ветеранонтень В.В. Веривскойнень.

 

Владимир Веривскоень ледстнемга мемориальной лазонь панжомась ютась Россиянь МЧС-нтень 30 иетнень топодема чистэнть. Торжественной промксось панжозель Мордовиянь региононь МЧС-нь Главной управлениянь зданиянть икеле.

Мероприятиясь ютавтовсь МР-ва Россиянь МЧС-нь Главной управлениянь прявтонть Андрей Геннадьевич Наумовонь ушодксонзо коряс, сон эсь кортамосонзо тешкстызе: «Пожарной охранань ветеранонть, внутренней службань полковникенть В.В. Веривскоень покш путовксозо Мордовиясо пожардо ванстомань тевенть виевгавтомасо ды материально-технической базанть кемекстамосо. Сон свал седейшкава лездась сеть ломантнень туртов, конатне ульнесть сонзэ перька, конатне печтясть се шкане эрямонь стакачить…»

В.В. Веривскоень пингстэ ушодозель Рузаевкань ды Саранскоень гарнизонтнэсэ пожардо ванстомань военизациясь. Веривский свал покш мель явсь сеть ломантненень, кить эсь олясо ды питневтеме лездасть пожартнэнь мадстемасо. Истя жо се шкастонть теезель техникань службань отрядось. Веривскоень бажамонзо вельде Мордовиясо стявтозель кеврунгось, кона алтавсь сеть толонь мадстицятненень, конат маштовсть служебной долгост топавтомсто.

В.В. Веривский 1979 иестэ саезь 1990 иес важодсь Мордовиянь пожарной охранань прявтокс.

Те покш чинтень тердезельть пожардо ванстомань службань ветерантнэ, Владимир Веривскоень Евгения низэ, малавиксэнзэ ды ялганзо.

Весе кортыцятненень вейсэндявсь В. Веривскоень низэяк, сон мерсь: «Мон седейшкава ёвтан покш сюкпря Саранск ошонь Администрациянтень, МР-ва Россиянь МЧС-нь Главной управлениянтень, Ветеранонь советэнтень те покш чинть кис. Мирдем свал кортнесь, сонзэ зярдояк мезеяк а лисевель стака важодема тевсэнть, бути а улевель истямо ялгаксчинь кирдиця, вейке-вейкень кис аштиця ды мелявтыця коллективесь…»

Ламо ёвтазельть В.В. Веривскоень лемс лембе валт, валдо ледстнемат, конатне кувать кадовить инжетнень мельсэ-превсэ, седейсэ. Мемориальной лазонть ды кеврунгонть икелев путозельть ламо цецят.

Истя жо МЧС-нь зданиянть икеле ульнесь невтезь пожаронь- идемань техникась ды пожаронь- техникань вооружениятне.

 

Мила Богатова

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».