Сентябрянь 24-це чистэ стака ормадо кулось Мордовия Республикань культурань заслуженной роботникесь, СССР-нь (ней Россиянь) Журналистэнь вейсэндявксос совицясь, «Эрзянь правда» газетань икелень прявт редакторось Виктор Иванович Кечемайкин.
Виктор Ивановичнень те иень июлень 6-це чистэ топодсть 82 иеть. Чачсь-кассь сон войнадо икелень стака шкастонть, 1938 иестэ, Покш Игнатбуе велесэ.
Образованиянь коряс В.И. Кечемайкин ульнесь агроном. Те специальностенть коряс 1965 иестэ прядызе Мордовиянь Н.П. Огарёв лемсэ государственной университетэнть, пингензэ жо алтызе журналистэнь а шожда тевентень. Виктор Иванович свал бажась одонтень, покш мель явсь содамочинзэ кастомантень. Истя, сизьгеменце иетнестэ тонавтнесь Московсо КПСС-нь ЦК-нть юрсо Высшей партийной школасо.
Важодема кинзэ ушодызе кодгеменце иетнестэ «Эрзянь правда» газетасто, ульнесь литсотрудникекс, мейле отделэнь прявтокс. Шкань ютазь прявт редакторонь полавтыцякс.
1975-1981 иетнестэ В.И. Кечемайкин важодсь КПСС-нь Мордовской обкомонь пропагандань ды агитациянь отделэнь прявтонь полавтыцякс, 1981-1986 иетнестэ – МАССР-нь Министрань Советэнть юрсо теезь печатьсэ государственной тайнань ванстомань управлениянь прявт.
Виктор Иванович «Эрзянь правда» газетань прявтокс кармась 1986 иестэ, советско-партийной шкастонть. Виде, неень коряс, сестэ газетанть нолдамонзо перька ульнесть ков седе ламо стакачить, конат васняяк сюлмазельть ташто лувсо типографиянть важодеманзо марто. Ламось теевсь кедьвийсэ, малав эрьва номерэнть лисемазо таргавкшнось талай чокшнес ды лиясто пелевес. Прявт редакторонтень эрявсь сонзэ педе-пев ловномс ды ансяк теде мейле кемекстамс. В.И. Кечемайкин эрьва публикациянть нолдась седеензэ пачк ды пек мелявтсь: «Паз илязо мере нолдамс кодамояк ильведькс».
Нама, сынь, куш чуросто, ялатеке ульнесть, мезень кисэ пек ризнэсь прявт редакторонть седеезэ. Ансяк сонзэ обуцясо арасель истямо ёнкс, штобу тердемс эсь кабинетс сёрмадыцянть ды ушодомс сонзэ сёвномонзо-чумондомонзо. Сон тевенть васняяк ванкшнылизе эрьва ёндо, снартсь содамс, мейсэ тувталось ды кода истя лиссь… Ды теде мейлеяк эзь капша покордамс ломаненть, мекевлангт, маштсь оймавтомо ды варштавкссо весе ёвтамо.
Текенень поладсынек, прявт редакторось шнась паро ушодкстнэнь. Бути ульнесь шказо, сонськак вейсэндявиль аволь ансяк важодемань тевтнень топавтомсто, коллективнек оймсемстэяк. Истя, «сырнень» сёксень вейке маней чистэ якинек экскурсияв Покш Болдинав, шкань ютазь Ульяновскоев ды мик Московов пачколинек. Сон чарькодсь, вейсэнь тевенть топавтомсто, газетась жо лиякс а нолдави, коллективентень эряма ояксчисэ, вейке-вейкень обуцянь содазь.
Виктор Ивановичнень прась а шожда уцяска улемс прявт редакторокс стака вейксэньгеменце иетнестэ. Самай се шкастонть (1990-1993 иетнестэ) сон ульнесь Мордовиянь Журналистэнь вейсэндявксонь правлениянь прявтокс. Виктор Иванович парсте содылизе журналистэнь тевенть, маштсь тонавтомо одтнэнь. Сонзэ пингстэ тиринь газетань лопатнесэ кармасть лиснеме ламо публикацият «Эрзянь литературань сырнень фондсто» рубриканть ало. Тень вельде ледстявсть эрзянь содавикс поэттнэнь, прозаиктнень, учёнойтнень важодевксэст.
Прявт редакторось сонськак ламо сёрмадсь эрьва кодамо жанрасо. Ловныцятне путсть питне «Минек вейсэнь кудо» статьянтень. А стяко мерсть сонзэ ютавтомс рузонь кельс ды печатамс сестэ «Советская Мордовия» газетасо. Теде башка, сон вечксь сёрмадомо пеедькшнемань (юмористической) ёвтнемат, конат лиснесть Вайкин псевдоним ало.
Куш кодамо шкасто газетанть туртов прявт тевекс ашти сонзэ лангс сёрмадстомась. Виктор Ивановичень пингстэ тиринь газетанть тиражозо пачколесь 12 тёжат экземплярс. Печатной изданиятнень ютксо масторонь ёроков (творческой) пелькстамотнесэ «Эрзянь правдась» колмоксть лиснесь лауреатокс.
1988 иестэ, В.И. Кечемайкинэнь пингстэ, «Эрзянь правда» редакциянь коллективесь казезь СССР-нь ВДНХ-нь сиянь медальсэ ды омбоце степенень дипломсо, Ине Отечественной войнасо Изнямонь 50 иетненень алтазь пелькстамосонть тиринь газетантень максозь 1-це таркась.
Виктор Иванович казезь МАССР-нь Верховной Советэнь Президиумонь Почётонь грамотасо, «За доблестный труд» ды «Ветеран труда» медальтнесэ. Газетантень 75 иетнень топодемстэ сонензэ максозь «Мордовия Республикань культурань заслуженной роботник» почётонь лемесь.
В.И. Кечемайкин тусь эрямосто «сырнень» сёксня, «Эрзянь правда» газетанть чачома чистэ. Те чись зярдояк тенек а стувтови. Паро тевензэ кадовить минек коллективенть ды ловныцянок ледстнематнес.
Минек газетась печти седейризкс сонзэ куломанзо кувалма ды ёвты седеймарямо малавиксэнзэ туртов.
«Эрзянь правда»
газетань коллективесь