Кочкурбуесэ, кода республикань лия районтнэсэяк, важоди «Минь – вейсэ!» СВО-нь участниктненень лезксэнь максомань штабось. Тесэнь Культурань центранть юрсо эрицятне кодыть кекшемань алтымат, пурныть гуманитарной лезкс. «Минь – вейсэ!» штабонь ветицякс тесэ ашти Кочкуровань муниципальной райононь прявтось Светлана Николаевна Герасимова, секретарекс ловови райононь 1941–1945 иетнень боевой ды трудовой подвигень музеень прявтось, поисковой вейсэндявксонь ветицясь Людмила Михайловна Силиванова. Сон миненек ёвтнеськак, кодамо робота ветяви СВО-нтень лездамга.
– Кекшемань алтыматнень кодамо тей сакшныть Кочкурова велень эрицятне. Сынст ютксо улить сеть, кинь цёраст, нуцькаст, малавиксэст СВО-сот. Эрьва чистэ пурнавкшныть кеменьшка ломанть, – ёвтни Людмила Силиванова. – Истя жо сакшныть Социальной фондонь важодицятне, Соцзащитасто, тосо юткошкань кужос пурнавкшныть сыре ломантне. Сыньгак лездыть те тевсэнть. Весенень ёвтан покш сюкпря. Сынст эдь кияк а кармавты алтыматнень кодамо, весементь теить эсь мельсэ. Эрьва чистэ валске марто сыть, чинь куншкас тевсэть.
Кекшемань алтыматнень кодамонь тевенть Кочкуровань Культурань центрасо ушодызь тедедень январьстэ саезь. Ды неть колмо ковтнень перть анокстасть уш 15 алтымат. Теде башка, тесэ тейнить окопонь штатолт, пурныть гуманитарной лезкс. Вейсэ райононь лия эрицятнень марто ды «Эсенектнень а кадтано» куронть лезксэнзэ вельде алтыматнень кодамонть ды штатолтнэнь тееманть туртов рамить эрявикс материалонть, пурныть посылкат, козо путыть минек цёратнень туртов сехте эрявиксэнть – ярсамопельть, оршамот, шлямонть-нардамонть туртов эрявиксэнть ды ламо лия мезе.
Ней весе улить социальной сеттнесэ ды свал ванкшныть СВО-нь лездамонтень алтазь куротнень. Тосто яла ловныть, мезе эряви минек цёратненень, ды сеске ушодыть пурнамо эрявиксэнть. Мезентькак рамить эсест ярмак лангс, лиянть кандыть малавиксэст-содавиксэст ды райононь эрицятне. Истя, аламонь-аламонь пурныть посылкат. Зяро эйстэдест кучсть – кияк а лови. Эдь сехте эрявиксэсь – лездамс.
Кода тешкстызе Людмила Михайловна, кекшемань алтыматнень ды лия мезенть тееманть туртов эрявиксэнть рамамосо лездыть райононь предприятиятне, бюджетной ды лия организациятнень важодицятне. Ве ёнов а кадови кияк.
– Ней вана пурназь ярмактнень лангс раматано коцт. Бути якшамо шкастонть алтыматнень анокстынек телень ушолксонть коряс – ашот, ней, тундонть самонзо марто, сынь пижеть-сёрмавт, штобу улевельть модань тюстнэсэ, – тешксты Людмила Силиванова. – «Эсенектнень а кадтано» куронь важодицясь Юрий Даньчин – минек «связноенек». Сон, бути эряви, миненек уски шта, коцт. Минек кедьстэ жо саи анок кодазтнень. Сонзэ марто минь кирдтяно кеме сюлмот.
Истя жо Людмила Михайловна ёвтась сюкпря Кацялаень, Семилеень, Муранень ды райононь лия велетнень эрицятненень. Весе сынь максыть покш лезкс боецтнэнень посылкатнень пурнамосо.
– Эряви ёвтамс, аволь ансяк пенсиясотне ды важодиця ломантне теить эсь путовксост специальной военной операциянть ютавтомасо, минек цёратненень лездыть школасо тонавтницятнеяк. Истя, тундонь каникулатнестэ «Поисковик-Тимуровец» волонтёронь отрядонь боецтнэ анокстасть кекшемань алтымат. Вейсэ «сиянь» волонтёртнэнь ды Кочкурова велень эрицятнень марто сынь тейсть покш ды эрявикс тев. Вана истя вейсэ минь алкуксонь тыл, ды те вейсэчись максы седе ламо вийть минек боецтнэнень – Тиринь масторонть кисэ аштицятненень, – кемекстызе Людмила Силиванова.
Зярдо минь ульнинек Кочкуровань Культурань центрасо, кекшемань алтыматнень теемасо тесэ важодсть колмо ават – Галина Николаевна Косова, Людмила Григорьевна Дадаева ды Нина Михайловна Беловалова.
Сынь ёвтнесть, чить пурнавить тей ды кодыть алтыматнень, чокшне ланга жо кудосо анокстыть важодеманть туртов эрявикс материалонть – коцтонть эйстэ керсить панкскеть. Кекшемань эрьва алтыманть велькссэ, кода сон весе тееви, аватне чекить ды озныть – кадык Пазось вансты цёратнень!
– Весе минь сакшнотано тей, штобу куш мейсэяк лездамс цёратненень. Мезес улить виенек, сень тейтяно, – мерсь Галина Косова. – Весе вейсэ малавгавттано изнямонть.
Юлия Еремина