Мордовия республикань эрицятнень ютксто допрок эрьвась анок лездамс цёратнень туртов, конатне неень шкасто примить участия специальной военной операциясо.
Минек газетась аволь весть сёрмалесь, районтнэва эрицятнеде, сеть ломантнеде, конатнень превест, седеест ды оймест пешксеть мелявксто тиринь масторонть кисэ. Неть ломантне бажить путомс ламо вий, штобу гуманитарной лезкс вельде невтемс ды пачтямс весе оймень талномаст ды потмовиест сетненень, кить неень шкасто аштить Изнямонть кис.
Истяттнэнь ютксо Орданьбуень райононь Кеченьбие ды Орозбие велетнень аватне, конатне чинек-венек анокт кодамс-сюлмамс кекшемань алтымат, стамс алга оршамот (майкат ды трусат), кодамс понань носкат ды варьгат. Тешкстасынек сынст лемтнень, кить нейгак весе ойменть путозь важодить вейсэнь тевсэнть. Неть Кеченьбие велень эрицятне: Вера Васильевна Слепцова, Татьяна Михайловна Кадичева, Татьяна Александровна Исайкина, Анна Николаевна Еремина, Софья Михайловна Головина, Анна Фёдоровна Головина (цёразо неень шкасто СВО-нь боец), Любовь Васильевна Исайкина, Елена Петровна Головина, Марина Анатольевна Артемьева; понань носкат ды варьгань кодыцятне: Татьяна Кадичева ды Ирина Кочкаева, аватне кенерсть кодамс малав тёжа лембе носкат.
Истямо жо лезксэнь тев СВО-нь боецтнэнь туртов эрьва чи топавтыть Орозбие велень аватне. Эрьвась эйстэдест сакшны велень администрацияв кекшема алтымань кодамо-сюлмамо. Сёксень-телень кувака чокшнетнестэ кодазь понань носкань а вейке пара, стазь сядо алга оршамот, футболкат ды понкст.
Орозбие ды Кеченьбие велетнень эрицятне кучсть а вейке гуманитарной лезкс. Неть посылкатнес ломантне путыть весе эрявиксэнть, саемга: курткат, понкст, лембе варьгат, нардамот, эрявикс кедьёнкст, лецямопельть ды ярсамопельть. А вана меельце посылкантень путсть колмо 50 литрань покшолмасо пластикень парть, конатне боецтнэнь туртов маштовить ведень кирдемс.
Мартонь васенце читнестэ Кеченьбие велев отпусков сась мобилизованнойтнестэ вейкесь ды весе лездыцятненень ёвтась сюконямонь лембе валт.
Алена Артемьева