Понедельник, октября 18, 2021
Важное

Неть читнестэ 1941-1945 иетнень войнань ды трудонь подвигень мемориальной музейсэ ютась «Они сражались за Крым и Севастополь» книгань презентациясь. Вастовомантень сакшность ламо инжеть.
Сынст ютксо – Крымсэ «Ф.Ушаков лемсэ эрзянь ды мокшонь куро» общественной вейсэндявксонь прявтось В.М. Старчков, МР-нь Правительстванть юрсо Гуманитарной наукань НИИ-нь прявтось Г.А. Куршева, МР-нь Республикань ветеранонь советэнь прявтось И.С. Цыганок, ошонь советэнь прявтось Р.Х. Искандяров ды лият.

– Минек поисковиктне Аджимушкаень кевпандотнес экспедицияв ушодсть ардтнеме 1972 иестэ саезь. Бути лия таркатнесэ важодтяно вирьсэ ды паксясо, ушосо, менель ало, Крымсэ эряви мода потсо ды фонарик марто. Тосо пек якшамо, ансяк +3 градуст ды летьке. Цёратне оршнить лембестэ, понань носкат, ватной штанат, пракстат. Аламос важодезь, лиснить ушов эжнеме. Колмо-ниле часто ламо а кирдеват. Пек стака мода потсо.

Мон свал вейкетьстян Аджимушкаень кевпандотнень ды Брестэнь крепостенть. Меельцесь кирдевсь вейке ков, Аджимушкаесь – ниле ковт. Сынь цидярдсть, эзть туе, эзизь максо пряст. Эрьва вене лиснесть мода потсто ды пансть фашисттнэнь, тукшность партизантнэнь юткс. Те подвигтенть эряви ёвтнемс, ломантне содавольть ды а стувтовольть. Паро ули, пачкодиндеряй те книгась школань тонавтницятненень, – кортась 1941-1945 иетнень войнань ды трудонь подвигень мемориальной музеень прявтось Н.А. Кручинкин.

Сонзэ валонзо поладынзе Крымень «Ф.Ушаков лемсэ эрзянь ды мокшонь куро» общественной вейсэндявксонь прявтось В.М.Старчков:
– Те таркасонть алкукс пек ламо чавовсть. Полковникенть П.М. Ягуновонь кармавтызь ванстомо Крыменть а лововияк зяро немецтнеде. Сон пурнась курсантонь батальон, панжсь военной госпиталь, тейсь противотанковой отделения, кемекстызе разведкань тевенть. Крымсэ вастовкшнынь ветерантнэнь марто. Сынь те шкас кирдить мельсэ Ягуновонь лемензэ. Ней важодтяно вана мезе лангсо: эряви П.М. Ягуновнень максомс Советской Союзонь Героень лементь.
Те вастовомасонть пачтязель, Саранск ошонь администрациясь бажи максомс Ягуновонь лемензэ ошонь вейке куронтень.

Книгасонть ёвтневи Мордовиянь ламо лия геройтнедеяк, кить тюрсть Крыменть кисэ. Те – Г.В. Якушкин, кона чачсь Сыре Шайгова ёнксонь Темяшева велесэ. Сон тюрсь Севастопольсэ Сапун-пандонть кирдемстэ. Керченть кисэ тюрематнесэ чавовсь И.А. Коннов, сон Зыкова велень. Сонзэ муизь Крымень поисковиктне ды одс калмизь Саранскойсэ 2009 иестэ. Крыменть олякстомтомасо покш путовксозо минек земляконть, лейтенантонть И.Х. Аганинэнь, кона чачсь Торбеевской райононь Сургод велесэ. Сон ульнесь СМЕРШ-нь фронтонь томбалень разведчикекс.

Татьяна Маторкина
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».